قصيده لــ مرير الحبيل

هذه مشاركة قصيدة للشاعر مرير الحبيل في الحب ..اعجبتني..



نشدني صديق قال حبك ورا ما بان ... ورا فالغزل مالك بيوت مسويها
ولا لك غزل يالقرم بسم الله الرحمن ... ورا كن ما تذكر هنوف مهاويها
وأنا أقول قلب ما يحب الهوى غلطان ... وابشرك والله من هنوف مصافيها
وأبعلمك وأنته تعوذ من الشيطان ... دام النشامى تستمعني بأذانيها
أنا أحب لي حب تولع به العربان ... عيال النشامى اللي طوال يمانيها
أحب الرجولة والرجولة لها سيسان ... ترا ساسها لاطاب يرسي ويرسيها
وأحب الكرم وأهل الكرم والكريم معان ... كريم ونفسه للمواجيب مصخيها
وأحب أشتري لي عود أزرق من الدكان ... وأطيب رجال سيرت لي وأقهويها
وأحب الدلال الصفر من صنعة الرسلان ... ليا دارت المجلس وماجوبها فيها
وأحب الحرار اللي لها فالعشاء برهان ... تقضض على جول الحباري وتدميها
وأحب الحصان اللي سبق والحصان حصان ... وأحب الذلول اللي تقدم براعيها
حسينة حلايا مالها فالحلال أثمان ... خطاة الأصيل ليا أفرحت وجه قانيها
وأحب الجيوش ليا أرزمت داخل الميدان ... ليا قادها القايد وهرول يباريها
وأحب الصحاري خص ليا شبعت الحيران ... لا بكر الوسمي وزانت مراعيها
وأحب الحلال ليا انتشر داخل الصمان ... قطاعين ذود والمواتر بتاليها
وأحب البيوت اللي تظلل بها البدوان ... عيال الجزيرة ساكنين بأراضيها
وأحب الخيال المدلهم لأنهمر ودان ... وأحب الفياض اللي تناسف علاويها
وأحب أمّزّع رجلي وأشرف على الجيان ... وأمد النظر فاللي عسى المزن يسقيها
وأحب الجيوب اللي تمرهد مع الخليان ... تعانق طيور الجو تمشي مماشيها
وأحب الرفيق اللي وقت الشدايد بان ... رفيق الرفيق ورفقته ما يخليها
وأحب الخوي اللي تجي كلمته ميزان ... وزن كلمته لأجل الرياجيل تغليها
وأحب القصيد اللي يحكم على القيفان ... وأحب الصفوف ليا استوت قدم واليها
وأحب السوالف وأتسمع من الشيبان ... ليا وردوها بيضت وجه راويها
وأحب المثايل لا ضربها مثل راكان ... وأحب العلوم الطيبة وأفتخر فيها
وأحب القصير اللي يبين لك الصفطان ... مثل جيرة كل المخاليق تطريها
وهي قصرة محمد ليا عدت الجيران ... له قصرة ما جاء لها اللي يحاليها
حياة المهادي مع مفرج جمل زومان ... زحول الرجال اللي بقى ذكر ماضيها
وأحب الهنوف اللي لها فالحشى مسكان ... فتاة على السنة عزاز مواطيها
ستيرة ولا تحرص على فتحة البيبان ... ولا تلتفت للي يبي يلتفت فيها
وأخير المناوي كلها طاعة الرحمن ... لا واهني اللي صلاته مصليها

وسلامتكم

[الصهد]

صح لسان مرير ولسانك الباسل
وكرما اذا عندك قصيدته في الصوت الناعم اللي يقول فيها
يكفي غزل للناس ياخاينه بس خلي حلالك قفر لاحد يعسه
تحياتي وتقديري

حياك الله يالصهد وصح الله بدنك

وبالنسبه لـ القصيده المطلوبه موجوده في القسم الان

بعنوان : قصيده الشاعر مرير بن عبد المحسن الحبيل العتيبي

للعضو ابن هميجان الحمادي

[وجودك يكفي]

صح لسان الشاعر مرير ولاهنت ياباسل على النقل


احترامي

صح الله بدنك

وشكرا لمرورك