من أروع قصائد مطلق الثبيتي وهي مجاراه قصيدة عايض العصيمي

[ناصر بن سعدي]

هذه القصيده للشاعر عايض بن سعود العصيمي عندما كان يتعالج في ألمانيا ( رحمه الله )


[poem=font="simplified arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
يالله يافارج هموم ٍ ليا جن = ياواحد ٍ فوق السماوات عالي
يارافع سبع وسبع بسطهن = ومرسى الجبال الشامخات العوالي
يامحصي ٍ خلقـه من الانس والجن = وأخرجت يوسف من جبا جو خالي
واصبح بريّ ٍ من خطايا يكادن = الأوله واللاحقات التوالي
افرج لمن كنّـه على اللي يقالن = جمر الغضا لازاد فيه اشتعالي
وادموع عيني فوق حجري يصبّـن = تشدي غروب تحت هجف المحالي
دايـم على خدّه وعينه يكفّن = مثل المطر من مستهل الخيالي
وليا سألت إعيون وشبلاهن = جات الاجابه قبل فتح السوالي
امس الضحى في دار واليوم مع من = إمع اليهود محرّمين الحلالي
في دار هتلر مانعرف المؤذ ّن = دار ٍ عساها بالمحى والزوالي
ياعيد ماصبركم على ديرة الجن = لاإخوان لاعمّان لا من خوالي
عزّي لكم ياعيد مثل المسجّـن = وأنا بعد ياعيد عزّي لحالي
عقب الجماعه جالس ٍ في بلد من = لاحد مسفّرني ولانيب جالي
ياعيد لو تعرف فروخ ٍ يلجّن = في دارنا مايدركن النوالي
قصار ريش ومالك الله يطيرن= حب تحت ربّ ٍ عزيز الجلالي
ويانجر يامشكاي عينك عليهن = وخلّـك عليهن مثل وصف الظلالي
وياسعود ظنّـي فيك لاتخلف الظن = إتروف بخوانك سواة العيالي
حاذور لامرّوك ناديت ياهن = وتميل مع بقعى على كل جالي
وأوصّيك ياهندي وصيّة عليهن = أنت الولي والله على كل والي
أرفق عليهن لين حتى يضفّن = وآمر عليهن بالرضا والعدالي
وإفطن لهن ياذيب لين يتعشّن = ولايمرحن الليل والبطن خالي
حتى يجي يوم خواتك يقومن = أنت اللذي تربا وانا راس مالي
واسلم وسّلم لي على من نشد عن = وقلّه تراي بدار ساكن لحالي
ماعندي الاّ قوم جنّ ٍ تراطن = لاحد ً يسال ولايجيب السؤالي
وعيونهن زرق ولاأدري وشنهن = يحرم عليهن سترهن والجمالي
وجدي على شوف الهضاب يتزامن = دار ٍ سكنّاها قديم ٍ وتالي
إديارنا في نجد محروم ينسن = أمّ ٍ غلاها من وراء كل غالي
وزواجها من جدّنا سنها سن = على الشريعه واشقر الدم سالي
يوم إنحدر بجموعه اللي تبارن = من حد بيشه للمدينه شمالي
وعزّ م ولزّ م للمعارك يخوضن = ماهمّـه اللي قاعد ٍ بالتوالي
حتى سكن في نجد غصب ٍ بلامن = وإحتـل دار مكرّ مين السبالي
من بعد خيل وجيش للشيخ يهدن = خلّـوه عن داره يشد الرحالي
ربعي ترى عتبان ياقايل ٍ من = اللي تكرّ م ضيفها بالخيالي
ذبح المربّي عندهم دايم ٍ فن = هذا بعد تقديم كيف الدلالي
لاجيت مجلسهم لزوم ٍ يلقّـن = ماحسّـبوا في دقـها والجلالي
وياعيد ماأرسلنا التذاكر يحجزن = ماغير أعد أيامهـا والليالي
متى نوادعكم إليا جن يمشن = ومتى تحـلق بالسما ياطلالي
حتـى نجي بديار من يحرق البن = سواة ابو يونس صديقا ً صفالي
ابـو محمد يوم عندك تلافن = وجيـه النشامى الطيبين الغوالي
بلّـغ سلاما ً مرسلينه بلا من = بأفضل تحياتي لهاك الرجالي[/poem]

عندما سمِع الشاعر / محمد بن عبود العصيمي قصيدة عايض بن سعود كان لها في نفسه بالغ الأثر
فقال هذه القصيده مجاراة لقصيده عائض سعود :


[poem=font="simplified arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
ابدأ بذكر الخالق اللي له المن = الخالق المعبود رب الجلالي
الخالق الرازق محصي ثقلهن = علاّم ماب الكون أوّل وتالي
هات القلم واكتب بيوتا ً يشوقن = من صدر ابن عبود مثل الزلالي
بيوت ٍ على صدق المحبه تبرهن = تنقد كما نقد الذّهب والريالي
أغلى من الدولار واغلى من الين = للصاحب اللي للمواجيب شالي
ابو سعود اللي على الجار يومن = عساه يرجع للوطن والعيالي
شال الحمول الكايده ماتوهّـن = عساه يرجع للوطن والعيالي
شال الحمول الكايده ماتوّهن = عسـاه يسلم مايجيه الهزالي
يابادع القيفان بالشعر لك فن = انته حكيم وكل قولك عدالي
حرّكت مكنون الحشا ياولد من = اللي له الطاله كريم السبالي
خواطرك جتنا وللقلب يشقن = هلّـت دموع العين مثل الخيالي
بكّيت وابكيت العرب في بلدهن = حيثك رقيق القلب حين السؤالي
اصبر وخلّـك للمقادير مؤمن = الصبـر مفتاح الفرج والكمالي
ارفع يديك لخالق الكون واهتن = يعطيك مطلوبك وكل النوالي
لاتشتحن لفروخك اللي يلدّن = يم الرحيم اللي على الكون عالي
لاتشتحن ياشيخ وللنفس تشحن = تحمّـل المكتوب يابن الرجالي
الكل في خدمتك يامحرق البن = قوم ٍ تشيل الحمل مثل الجمالي
اولاد عتّـاب صواريم يهون = أهل المهار اللي تجيب المثالي
هيلا ً تهايل فوق الاضداد تنجن = ترسي كما ترسي رواسي الجبالي
اسيافهم مثل البروق يتواشن = يذكرهم التاريخ لاجاء مجالي
قوم ٍ تعز الجار وتكمّـل الفن = صولاتهم صوب اليمن والشمالي
ولهم مع المشرق تواريخ يقرن = والغرب يذكرهم على كل حالي
تذكر لنا زرق العيون المفتّـن = في ديرة مالك بها راس مالي
ومادام لك صدّه عن الخمر لاجن = نرجو لك التوفيق ونيل المعالي
عسى عوضك الحور لامرك يطيعن = عطا ً من الخلاّق رب الجلالي
حنّا بدار اللي له الخيل يهدن = ابن سعود اللي حكم بالعدالي
سيفه على حزب الضلاله ممكن = حامي حمى البيتين من أهل الضلالي
وصلوا على اللي علم الانس والجن = المصطفى المختار لاجا المجالي[/poem]


وهذه قصيدة الشاعر الكبير مطلق بن حميد الثبيتي مجاراة لقصيدة عايض بن سعود :


[poem=font="simplified arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
ياراكب اللي يوم نفّاثها حن = تسبق قمر عشرين وقت الزوالي
طيارها فنّي وطبلونها فن = ويازين للنفاث فيها اشتعالي
ياكن تحت إجناحها يضحك الجن = ولاصواتهم تحت الجناح إجتوالي
اثقل على كبد الثرى من مية طن = وأخف من ريش الوحش فالعلالي
منوة غريب لاذكر ديرته ون = وجاته همومه من يمين وشمالي
ملفاك رجل ٍ عادته يحرق البن = والنجر يعول وبين صبح الدلالي
في مجلس ٍ مافيه تهمه ولاظن = ياماذبح للضيف من كبش غالي
يرسي كما يرسي مكانه جبل عن = معروف لو صكّـت عليه الجبالي
ابو سعود إليا الركايب تلافن = قدّم لاهلهن كيف مرّ ٍ وحالي
وإليا عطا يعطي عطايا ً بلا من = ماتعرف اليمنى عطايا الشمالي
قلّـه ترا غبر الليالي تقافن = واقبل سعدك وعنك حملك يشالي
لاتـثـّر العبره ولاتقرع السن = أطلب وحنّـا لك خوان وعيالي
والنفس عن شطحاتها عنّـها عن = عن ّ الفرس بمثولثات الحبالي
أنته عتيبي مانت هن ّ ٍ ولد هن = ممدوح لن جا للسوالف مجالي
ربعك عتيبه والتواريخ كتبن = كيـد العدا وامكرمين السبالي
كم فارس ٍ خلّـو بناته يونّـن = عليه واسي مجلس الشيخ خالي
ستر الخوي والضيف والجار يأمن = في ضفهم من خاينات الليالي
ياما تمنّـى موتهم ناس لكن = زادوا وزادوا بالوفا والكمالي
ياجاذب الطاروق في مدحهم غن = تطرب وتطرب لك قروم الرجالي
يابوسعود الفكر تايه ومنجن = يبا يسيّـر يمكم ياحلالي
سلّـم على هتلر وسلم عليهن = إمكحّلات عيونهن بالدلالي[/poem]



منقول

والله يرحم أموات المسلمين ..

[خيّال الهيلا]

والله يرحم أموات المسلمين
درر
كلهم كبار قيمة وكبار شعر ..

[نايف تراحيب]

ابن سعدي


نقل مميز كتميزك يالغالي


بصراحه قصائد مميزه من رموز من قبيلة عتيبه

تقبل خالص أحترامي وأعجابي بنقلك


نايف العتيبي

[ناصر بن سعدي]

إخــوي الغالي


خيال الهيلا

مشكور على المرور والله يرحمهم ..

[المرقب]

مشكور يبن سعدي على نقل قصايد الكبار

والله يرحم من مات

قصايد جزله ومنها استفدنا

[..الراسي..]

السلام عليكم


رحمهم مولاهم




ولك الشكر يابن سعدي


تحيتي

[النجم الأصيل]

ابن سعدي بيض الله وجهك يالغالي على النقل والاختيار الجميل الرائع

[إشراقات]

رائع مانقلت يابن سعــدي ..استمتعت بقرأتهــا حقيقه قصائد من ذهب ..

[ناصر بن سعدي]

إخــوي الغالي

نايف العتيبي

مشكور على المرور المميز ..


ولك خالص تحياتي ..