[poem=font="Times New Roman,5,black,normal,normal" bkcolor="transparent" bkimage="" border="none,4,gray" type=0 line=0 align=center use=sp num="0,black"]
لاع الحشاشة لايعٍ لاعها لوع= البارحة يوم المخاليق هجاع
كن النفس عن صدري الضيْق مقطوع = والعين مانعها عن النوم مناع
ياصاح ترسلي تراديد ورجوع=وأقول ياللي لاع خاطرك مالاع
تشكي وقلبك من مراكيه مقلوع=شكية ٍ من دونها ستر وقناع
ماهيب لغز اللغز ياصاح مرموع= اللغز له مغزى ورمعه ورماع
وأنته عن الموضوع ماجبت موضوع = وأنا ماغير أروجع الصوت روجاع
تقدير والتقدير مثني ومربوع= بعنان صفراً فأول الخيل مزواع
تجمح وفيها للمزاهيف قاموع= للعدل ميزان ٍ وللحق مقطاع
عندي وأنا اللي يجذب الراس من قوع = وليا امتلى المولاع شبيت بولاع
اشبها وأسرج دجى كل مهجوع=لاحافها اللي له مع أشناقها أرياع
وليا غدا للنار قيعان وفروع = من عقب ماعرضتها كل ذعذاع
جحيت عنها اللي مثل حبة الكوع = ماهوب كوع ذراع كوع ٍ على أضلاع
ثم جبت محماس ٍ على الشف مصنوع= وأخذت فيما تحتوي خمس الأصباع
برية ٍ قلبتها عرف وسنوع= لين الندى منها على حبها ماع
وفالمبرد اللي بالمقامير مرصوع=نثرتها وأظهرت من حبها أنواع
اظهرت لي شي ٍ عن الكيف ممنوع =حيث ان مقلاعه عن الكيف مقلاع
واللي بقا دقيتها فرد وجموع = ولحبها الماواه مهواه قراع
وليا اختلف صوتٍ بالأنغام مسجوع = حدرتها فاللي على النار مكواع
شقرا وماها يقتلب فوق ويفوع = يفوع فوع اللي كفخ عقب مفراع
وليا استوت زليتها فأم قبوع=عنقاً عليها من مها بعض الأرماع
الحلق وصف هلال والعنق مرفوع = تشدي لغرنوق ٍ على جال منقاع
وبهارها عندي من الخمس مجموع =يبري عماس الراس ويداو الأوجاع
يفتح لشرابه ثمانين مشروع = ويبدل المرماع الأول بمرماع
هذا واخذ من در الأيام قرطوع= لو انها تصفي كذا مالها داع
لابد في حبل الفنا وصل وقطوع= ياقلب لو انك مولع ومولاع
ياقلب لك معلاق ولصدرك ضلوع = مانته بسلعة بين شاري وبياع
خل الجوارح لك مطاويع وخضوع= واطلق مسابيق التجلي والابداع
وانا ليا من الهوى شاعني شوع= ولا ليا ضاق النحر والسنع ضاع
أصخر عنيد القاف ويقودلي طوع= حتى تهيض له المشاعر والاسماع
وأسقي عنود الفكر من كل يبنوع= اللي عنيت لها بملزم ومصراع
قلته وصلى الله على خير متبوع= الهادي اللي للمخاليق شفَاع
والرد لامسبل ولاهوب مجبوع= بني الضمير اللي على درب الأسناع[/poem]
| 
|
10-10-2008, 07:18 PM
العرض العادي
