بخيت والوازعيه

[جساس]

--------------------------------------------------------------------------------

شاعرنا هواحد كبار فرسان قبيلة عتيبة بخيت بن ماعز العطاوي من ذوي عطية من الروقة من قبيلة عتيبة ، وهو اخو الفارس المعروف شليويح بن ماعز العطاوي ، وحصل مره ، أن اعترضهم هو وقومه ، قوم من البقوم وعرفوا انه الفارس بخيت بن ماعز العطاوي فدعوه وقومه لاكرامهم ، وكانوا في طبيعتهم اكرام بعضهم ولو كانوا معادين ، واستضافهم امير البقوم قاعد بن جرشان ، واثناء مقامه ، حدث ان طلب الامير قاعد هيل للقهوه ، فمرته احدى نسائهم وتدعى (ساره الوازعية) وكانت جميله ، فلما رآهابخيت سقط الفنجال من يده ، وألتفت اليه الامير فقال : شوف لعينك وحظ لغيرك ، فأنشد الفارس بخيت هذه

القصيدة :

طرد النظر ما فيه عيب عليه
أبا تحلا بنت ماضين الافعال

ياونتي يا ساره الوازعيه
ونة معيد ساقه الفجر عمال

تقفي وتقبل فوق جال الركيه
ومن الصلف خالي ظهرها من الحال

لاشدوا العربان ودوجر حنيه
يبرى لها قاعد بتسعين خيال

فلما سمعته ساره اعطته (جوخه) وهي من خيار الملابس ، فقال بخيت : مقبوله وجزاها حصان نكسبه من قومك ، وفعلا كسب حصانا من قومها ، وهذا دليل على مداعبتهم وطيب نفوسهم وعفافهم وشرفهم ، وقصة رد الجميل لساره ان بخيت العطاوي غزا هو وقومه ومعهم الحفاه من الروقة من عتيبه ، ومنهم ساير التوم الحافي العتيبي وهو شجاع وكريم ، ولكن حصانه ردي بالجري ، ومن ذكاء نسائهم ان اخذت ابنته (قويله) يد من الذبيحه واعطتها بخيت ، وأوصته على والدها ساير وهم يسمعون ، فقال بخيت : لاداعي للتوصيه في ابوك ، وكانوا يعرفون ان اللي يتردى من الخيل ، يكسبه الاعداء ، لان السلاح سيف ورمح وبدأت المعركة بين كر وفر وعندما ابتعدت خيل عتيبه ، تأخر حصان (سايرالتوم) لوحده فهجم عليه الفارس قطنان البقمي وهو يقول : الجيره ماتقطع الدشه يعني محدن يبي ينقذك منا ، ونظر من بعيد الفارس بخيت ، بقدوم قطنان البقمي لساير التوم فهجم عليه بخيت بقوه وانقذ ساير التوم واخرجه من تحت يد قطنان البقمي ورمي بقطنان البقمي على الارض وغنم حصانه الاصيل وارسله الى ساره الوازعيه مجازاة لها عن الجوخه التي اعطته .

ثم قال الشاعر الفارس بخيت العطاوي لقويله بنت ساير التوم :

ياقويله جينا بمن يذبح الكوم
لو راح ما تنفع اسمان العذارا

ياقويله قطنان حنث على التوم
وابن الاصيقع خالفه من يسارا

فك الخوي حق علينا وملزوم
مودعين فـك راع الـثـبارا

ياعنك مايقضي لك الحاجه البوم
مايقضي الحاجات كود الحرارا

والله يا لو ان الخوي غانم الروم
انه عشاهن عند خشم النوارا

ابوك نعم فيه مايلحقه لوم
لاشك غوجه قاصر بالمغارا

ياسابقي عرضك بعيد عن اللوم
لا جا نهار مثل هاكا النهارا

تهوي كما يهوي من الجو صيروم
يبي العشاء من نابيات الفقارا



و لبخيت كثير من القصص والأشعار وشكرا....

[فهد العصيمي]

يسلم يمنيك يا جساس على القصه المميزه والى الامام دائما وتحياتي لك يالغالي

[إبن ثعلي]

ماقصرت ياجساس بيض الله وجهك على هذه السالفه
تحياتي

[** راس حربه **]

لاهنت ياجساااس وجعلك تسلم والله

واحسنت الاختيااار وابدعت فيه

والى الامااام طال عمرك

وننتظر المزيد

دمت بود

[فهد العايضي]

بيض الله وجهك ياجساس

وسلمت يمينك على هذه القصه الأكثر من رائعه

[جساس]

الله يبارك فيكم .

[النـايــــــف]

مشكور اخوي جساس


على هذا الاختيار


تحياتي لك ،،،،،


اخوك النـايـــــــــف