لله درك يالشعب السعودي

[صلوا على محمد]

إلى كل سعودية وسعودي ...




اكتشفت انا نحن الشعب السعودي العظيم..شعب.. قوي..مكافح..صبور..
شعب شعاره فلها وربك يحلها..بكل مايعنيه هذا الشعار من معاني وفوائد..



ليه؟..


اولا..على الرغم من الضايقه المالية اللى يعيشها اغلب الشعب..
والتطفير والفقر اللى يشع ويلمع من عيوننا..


الا اننا اكثر بشريه في العالم تتسوق..شغالين مقاضي من سوق لسوق..من محل لمحل..


مايمديك تسمع عن كريم رائع رهيب فله الا خلص..
بلوزة حلوة في المحل الفلاني
تعال افلقني اذا لقيتها في اي فرع من فروع المحل..


روج وردي جنان..جزمه فلات مريحه..تنورة سوداء راكزه..
مافيه بح اختفت
..
وياليته عالاسواق ابد فرمنا ابو المطاعم فرم..
مطاعم الاسواق تشتكي..مطاعم الشوارع..
امه لا اله الا الله عندها..
فتح تشيليز وابل بيز لو تشوف الطوابير حولها تقول هذولاء ماعمرهم شافوا أكل..
(مطفرين و شغالين بلع..)<< اذكر الله


من ناحيه الدراسة..عندنا من اسوأ الجامعات والمدارس..
اغبى الانظمه والقوانيين..تعقيدات ومصاعب
..
مبانينا خربانه..
قاعاتنا مكسره(اذا جيت بدخل القاعة متاهه..
لازم اتأكد ان كل بلاطه بمشي عليها ثابته تفاديا لاي تعكرف والا طيحه ممكن تسبب فشيله)..



حماماتنا زكيه(الله الله يا الحمامات على اخر الدوام وبما ان التصريف عندنا على قدر عالى
ماتشم غير روائح الفل والياسمين)..


مكافئاتنا ماتصرف(تخيلوا كليتنا نزلوا مكافئتنا على البنك بعد معاناه دامت لسنين من التسليم يد بيد..
وبعد فتره وجيزة تطاقوا هم والبنك ورجعوا على النظام الاول)..



قاعتنا ماتبرد(طيب تخيلوا مره ثانيه انه طول الترم الثاني اغلب قاعتنا خربت المكيفات
تخيلوا في هالحر بدون مكيفتدرون ليه؟
برضوا الشركة المسئوله عن التكييف عندنا تخاصموا مع كليتنا)..


بس وفي المقابل الشعب شغال تعليم..طلابنا كثييييير..الجامعات والمدارس مليانه..
واجبات وبحوث تعجيزية نقدم..
امتحانات صعبه نحل..
انشطه نشتغل..
تفوف نتفوق..
نظام التراكمي من اولى ثانوي تحسب الدرجات..
القدرات..
التحصيلي..
تخصصات قليلة ترضى الطموحات..
ومازال طلابنا يحصدون ال99 وال100.. << هب عليكم..ماتعوق معهم ماشاء الله..



سقط سوق الاسهم سقطه..
عورت المجتمع وضربته على قفاه ضربه موجعه..
المؤشر احمر احمر احمر..
والشراء اخضر اخضر اخضر..
ومازال شعبي الجميل يشتغل بالاسهم..



بناتنا يقولون..:
عيالنا شيون.. خشنيين..مايدلون طريق الرومانسيه..انانيين..مشهبين..مايملى عينهم الا التراب..



عيالنا يقولون..:
بناتنا..شينات..دلوعات..مايتحملون مسئوليه..ركبهم سود..مهورهم غاليه..
ومع ذلك الزواجات على افى من يشيل..
القاعات فل..
المشاغل زحمه..
وماليزيا تشتكى..



مافيه اماكن نتمشى فيها..
لاطبيعه ولا تطور..
(ياحبايبي انا..طلعت المملكة والفيصلية من خشومنا..دخلوها في كل شئ حللو ابوها تحليل)..
فماذا فعلنا؟؟..
افترشنا المخططات..
مترنا الاسواق..
استوطنا الثمامه..



شوارعنا محفره..مكسره..معفنه..
وفوق كل ذا نعاني من زحمه مو طبيعيه..



النت عندنا خايس..
وندخل النت ونسولف ونتواصل ونحمل ونسوى اشياء كثيييير ولا يهمنا..



هذا الموضوع الى كل سعودية وسعودي مكافح..
سلخته الشمس واعدمت جلده..
اتعبه الكبت وكتم نفسه..
قتلته الواسطه وحطمت اماله..



صامدون صامدون صامدون..
سنعيش..سنلعب..سنحب..وسنرقص ونغنى ولو حتى بدون موسيقى..


والله اننا قويين..
لله دركم ما أعظمكم

منقول من الإيميل

[ابوسـعد]

اللهم صل على محمد....ومن يتهيب صعود الجبال يعش ابد الدهربين الحفر..هذا هو الشعب الذي قال الرسول صلوات الله وسلامه عليه..اللهم احيني مسكينا وامتني مسكينا واحشرني مع زمرة المساكين..وكلنا فقراء الى الله...والله الغني..وما ذكره ايميلك المبارك فيه كثير من الصحة إذا أخذ بالمحمل الطيب,,,وأن الهدف هو تغيير الوضع الى افضل منه..فالواقع اننا نحتاج الى تربية اكثر من احتياجنا الى مادة..فعلا نحن فقراء الى الله في كل شيء ومن اهم الاشياء التي نحن في امس الحاجة اليها هو النظام واحترامه وتطبيقه..شكرا ودامت اوقاتك بالمسرات وياهلاوغلا

[♥أميرة الـ غ ـيد♥]

.,
لله درك يالشعب السعوودي :)
يكفي نعمة الامن والاماان و الحمد لله .. رغم كل شي عايشين بنعمه كبيرهـ يحسدنا الكثير عليها ..

صامدون صامدون صامدون.. سنعيش..سنلعب..سنحب..وسنرقص ونغنى ولو حتى بدون موسيقى..

., والفقر والشوارع المكسره والقاعات المعفنه ما تمنعنا نثابر ونكمل عشان نحقق طمووحنا



وعلى فكرهـ ترى الشعب السعوودي مُسرِف
...
لاهنتِ

[م ا ج د]

...النت عندنا خايس..
وندخل النت ونسولف ونتواصل ونحمل ونسوى اشياء كثيييير ولا يهمنا


ههههههههههههه
اي والله

الشعب السعودي شعب مطنش ..ومايحب يفكر واجد .. :)

الحمدلله على نعمة الاسلام ..

الله يعطيك العافيه ..

اللهم صلي وسلم على سيدنا محمد ..

[الأدميرال]

ماعلينا الا التنفيس في الكتابه بالمنتديات
ولا زآل وطني وأن جآر علي عزيز
حكيت و مالقيت من الحكي الا الـندم موّال
سكت ومت بالحسره ولا ادري وشهو احسن لي

[صلوا على محمد]

ياحليلك يالأدميرال على هو متنفسك المتتديات

يقول الشعب السعودي سنغني ونرقص حتى بدون موسيقى


الله يعافيكم كلكم كلامكم صحيح
أهم شي نعمة الأمان لكن مايضر لو كان هناك في مشاريع تقيم بالبلد وتطوره

من سيء لأسوأ

[الأدميرال]

المشاركة الأصلية كتبت بواسطة صلوا على محمد ياحليلك يالأدميرال على هو متنفسك المتتديات يقول الشعب السعودي سنغني ونرقص حتى بدون موسيقى الله يعافيكم كلكم كلامكم صحيح أهم شي نعمة الأمان لكن مايضر لو كان هناك في مشاريع تقيم بالبلد وتطوره من سيء لأسوأ

ياحليلك وش تبي من المشاريع اللي تشوفها انها تطور البلد اذكرلي شي منها



ارتفاع أسعار المعيشه في السعوديه في تزايد وفي نفس الإتجاه كل يوم يكتشف المنقبون بئر نفط ...!

الشباب السعودي يبحث عن مصدر دخل من خلال وظيفه وفي نفس الإتجاه صالات القادمون من السفر مليئه بالعماله الأجنبيه الحاصله على وظائف مرموقه في شركات سعوديه .!

حلم كل سعودي بزياده في رواتبه المتدنيه وفي نفس الاتجاه مليارات الريالات تحول

البترول يستخرج من الأراضي السعوديه وفي نفس الإتجاه لا نعتبـر دوله صناعيه ..!

ولازالت هنالك معتقدات خاطئه وافكار سلبيه تحول عن تقدم المجتمع....
تدري لو طبقنا الدين صح مكان هذا الحال

إن الله لايغير مابقوم حتى يغيروا مابأنفسهم

[صلوا على محمد]

كلامك فالصميم والله

حنا مشاريعنا على الورق بس
الله يفضحهم

لو كل واحد صان الأمانه كان حنا بخير
أقرب شي سيل جده والله ماشفنا شي لامليون ولا حتى ألف وفوق هذا بيطلعونهم من بيتوهم على اساس مشروع حي فجده بيصير مثل دبي يعني حتى فالتقليد عميان
عافانا الله <---متزريه

[الأدميرال]

الله فوق << ع قوله الهندي
كل شيء يرتفع .. إلا الراتب ..
كل شيئ يرتفع الا المواطن قدره في انخفاض
الا على الطآري في عندنا شي اسمه هيئه حقوق الانسآن وش وظيفتها بالحياه يعني سؤال ؟؟؟



(( اللهم انا نعوذ بك من الغلا والوباء والربا والزلازل والمحن ))