شاعر الحكمة ابن دبسان الشيباني وثلاث قصائد

[زيد]

[ALIGN=CENTER]
السلام عليكم ورحمة الله وبركاته

نأسف للتأخير يا أعضاء ومشرفي الشبكة
أتيت ومعي ثلاث من قصائد الشاعر المعروف
عبدالله بن دبسان بن دوخي العتيبي سيد الكلمة وشاعر الحكمة
كما لقـّـب نفسه ،،، أتمنى ان تحوز على رضاكم ويكون الاختيار موفق

( بالنسبة لصورته اخوي ابو سعود سأوافيك بها برسالة خاصة
حين تصل من الشاعر ولك خالص تحياتي )


هذه القصيدة يقول فيها :::



ياراسي اللي هناديبه مشيـّـبته
............ ماجور ماجور ياراس الحليفاني

يا ما وطيت الوعر والنوم شلهبته
............ أهذل هذيل الفهد لين الشلل جاني

رجلي قدمها على الطالات عذبته
............ الله يقصي زماني كيف يقصاني

وقتي غدرني وصدقته وكذبته
............ شره يبيني لكن الموت ما جاني

يا وجهي اللي سموم القيظ لاهبته
............ من شوف وجهي ضحك خطوا نسيواني

لي غايةٍ مايل الصرّه مصاحبته
............ كلب النمايم شبيه الذيخ ندهاني

اللي ترده عن الطاله معزبته
............ بين العجايز مثل كلب المريكاني

الله على اللي ليا منـّي تقرّبته
............ ترسل بواجيه يم البلف ضياني

لا دار سلفه بلوف النار جاوبته
............ تقول عطني وأنا بعطيك برهاني

فوق البساتم تشب النار كهربته
............ من هورشيما ورد والصنع ياباني

إليا تحرك تروس القير صالبته
............ جيب الشبح غايتي في كل ميداني

يا زين صوته ليا غنـّـا ولاعبته
............ واليا زهمني عطيته قيره الثاني

والعبد ما ياخذ ألاّ كود كاتبته
............ والفضل لله ولبن سعود سلماني

الحاكم اللي ليا جيته وخاطبته
............ منـّـي تبسم وبالمكتوب ناداني

اللي ملوك الوطن بالعدل ناصبته
............ أجيه جايع ومنه أروح شبعاني

مخبلك ياللي كلامي فيه كذبته
............ بالشرق الأوسط مثل سلمان ماكاني

راسه علينا ملوك العرش مندبته
............ بالحلم والعدل والرحمه والإحساني

أبو المساكين سمـّـيته ولقـّـبته
............ كفه عليهم تمد الصاع ملياني

أخو فهد غيثنا اللي شامخٍ نبته
............ يا رب تجزاه بالجنة على شاني

فيصل صفاته جسد سلمان قاضبته
............ الله على طاعة آل سعود يهداني





وهذه القصيدة مرسلها الشاعر عبدالله بن دبسان العتيبي
إلى سلطان بن مجرّي الشيباني (أبو مدين)




اليوم أنا عالي المشراف عديته
............ أبيه يبري غليلن قام يطويني

والله لولا طويل الرجم لا جيته
............ إني لجوّد بنيباني ذراعيني

مبدا المراقيب مشط الرجل لاويته
............ وإليا رجيته مَـعاد اليوم يرجيني

حبل الرجا دون بعض الناس قصيته
............ حتى لو إنه على الجنـّـه يناديني

وابن مجرّي نويت أجيه في بيته
............ وأنخا الذي ياخذ الأرواح بالدّيني

واليا وصلته بعال الصوت ناديته
............ سلطان لك موقفن بالضيق يرضيني

وأكبر دلايلك مدين يوم سميته
............ سلطان ياخوي تكفى لا تخليني

العام ذيب الخلا بالليل خاويته
............ واليوم أشوف الثعل ودّه يخاويني

سلطان يا خوي راسك يوم خصّيته
............ ما شفت غيرك يابو مدين يشكويني

الشرق الأوسط ترى شيمتك ماليته
............ سلطان غيرك وجوده ما يذريني

يابن مجرّي وصلك العلم وأوحيته
............ يا جعل والدك للجنّه ووالديني

في جوفي الهم يا سلطان ضميته
............ لا ناموا الناس هم القلب يوذيني

عيني بردها هموم القلب معميته
............ شفلي مرادي عسى شوفك يقدّيني

بيتك نصيته وعندك سرّي أفشيته
............ ياللي بجاهك يميلن الموازيني

سلطان يا عزوتي غيرك ليا جيته
............ يمكن كلامه بوسط البطن يلويني

يمكن كلامه يجي فكري بتشتيته
............ بعض السوالف على قبري توديني

راحت حياتي على صبره وحلتيته
............ بين الشراشيف نار الصبر تكويني

سلطان ثوبي دموع العين مرويته
............ تطري عليـّـه همومي لين تبكيني

من جور الأيام جيب الثوب شقـّـيته
............ يالله طلبتك من اللي فات تعفيني



أما هذه القصيدة (رغم قصرها) اخترتها من بين قصائده

وأتمنى أن يكون هو الاختيار المطلوب ..!!..

يقول فيها:



ألا يا عيوني صاب شوفك ذواري عج
.......... وأنا اللي بعقلي من زماني بدا رجـّـه

ألا واهني الطير لا من باله ضج
.......... يرج الفضا بالريش في صافي اللجـّـه

إلا ضاق باله من مكانه بشفه سج
.......... وأنا كل ما شفته بقلبي بدا سجـّـه

غزونا الأجانب بالوطن والمواطن دج
.......... يشيل الهوّيه عايش ٍ عيشت الدجـّـه

ضحيـّـة فريضة بأيدي مخلفات الحج
.......... يجر الحنين ولا حدٍ يسمع الضجـّـه

لنا ياولاة الأمر مدري متى تفرج
.......... عن أمر اليد الوسطى رفعنا لكم حجـّـه


@^^@^^@^^@

انتظروا مني المزيد بإذن الله

أتمنى يثبت الموضوع لأني بضيف كل يومين او ثلاثة
قصيدتين او ثلاث

علشان بس ما يرجع الموضوع في الصحفات القديمة

وتنسونه ....

لكم خالص تحياتي ،،، والسلام[/ALIGN]