بيت القصيد

[الصهد]

يا رب عفوك عن خط النسيان وكبار الذنوب

رحمتك لا حل الأجل والموت نكبة غافلين

نعوذ بك يالله من النكسة ومن ضيق الدروب

ومن القهر والخوف والرجفة ومن شر السنين

حنا علينا ندعي لوجهك ونطلبك الوجوب

في ساعةٍ فيها ثلاث ارباع خلقك نايمين

يا رب وأسمك يفتح البيبان ويزيل الكروب

أدعيك ودموعي تصب وتنهمر فوق اليدين

يا رب تجعلني من أهل الصبر صافين القلوب

أهل العلوم الوافيات المؤمنين الطاهرين

أمنت بك يالله وانا مليان الى راسي عيوب

وأنا اشهد أنه لا اله الا انت خير الراحمين

بالأمس مالي فالوجع طاري ولكنّ الهبوب

هبت على صدري وهزت فيه ضلع ما يلين

ما عاد هي لحية (بكا ساعة) وفتح زرار ثوب

لا والله الا حاجة لو جيت أبخفيها تبين

المشكل اني كل ما قابلت كذاب ولعوب

قلت الحياة وطبعها يا رب زينها تزين

أستغفر الله كنّ في صدري من الضيقة حروب

ثارت ودارت وانتهت بالموت بين الجانبين

الارض ضاقت وأصبحت مترين والعزم مغلوب

والموت قرّب واصبح وجوده لعيني فرض عين

ممكن يذوب الثلج !! لكن كيف كفيني تذوب؟

من كثر ما أفرك بعضها في بعض ذابت راحتين

ساعة تمر وتمضي الايام والوقت محسوب

والهم ينحت في ضلوع الصدر والحصن المتين

يارب تعطيني من الساعات ما يكفي وأتوب

ويا رب تجعلني على ما فات مرضي والدين

الحمد لك والشكر والمنة على كشف الغيوب

سبحانك الله لا كريم الا انت رب العالمين

أمسيت أصارع قسوة العبرة وأقاتلها وانوب

عن قوم قلبي كل ما شدوا وقالوا : راحلين

يالله طلبتك صحوة الغافل وتخفيف الذنوب

واعوذ بك يالله من النكسة ومن شر السنين