حارثياً مياحسب للخساره

[سطام الجياشي]

هذه القصيدة كتبتها في البر وخوة النشاما والصقر والجيب


واتمنى ان تحوز على رضاكم



[poem=font="simplified arabic,6,blue,normal,normal" bkcolor="transparent" bkimage="" border="none,4,gray" type=1 line=1 align=center use=ex num="0,black""]
راكب اللي لامشى ثّـور غبـاره=منوة اللي عانين يبغا الشمالـي
جيب لاندكروز في وقت الصداره=صنع تسعه وردوه بسعر غالـي
تو مارخص بلوحـه واستمـاره=اظهروه اعصير مع مبدأ الهلالـي
والصبـاح منحرينـه للـقـراره=في ديارٍ زافهـا نبـت السهالـي
في ديار مطير نمريـن النمـاره=عزوة الدوشان حاميـن التوالـي
في ديار الصلب والصمان جـاره=في ديـارٍ كلهـا نبـت ومفالـي
سايقه غمرٍ وفي راسـه سطـاره=مايشيل الا كما شيـل الجمالـي
حارثيـاً مايحسـب للخـسـاره=عزوته جياش في شهب الليالـي
شب ناره والـردي ميـت بنـاره=ماكسب قولة نعم فـاول وتالـي
شب ناره يوم في راسـه نعـاره=ثـم قـرب للمعاميـل الـدلالـي
والخوي اللي معه ساس الشطاره=علق المذبوح عقب الـدم سالـي
ذابح له تيـس ماحليـت غـاره=واشتووه اعلى الجمر شويٍ مثالي
ثم حطوا عفشهم حـدر الغمـاره=عقب ماصلوا جمع قصرٍ توالـي
مايعرفون الخـراب ولا الزقـاره=كل منهم ماشيٍ ممشـىٍ عدالـي
ثم ناموا ساعتين امـن الـدواره=نومـةٍ فالبـر تكفيهـم ليـالـي
والفجر شبـوا بضيـان المنـاره=واشربوا فنجال ثم راحوا عجالي
وكل منهم شايلـه يمنـاه طـاره=الحرار اللي مواكرهـا الجبالـي
ذاكرين الهم بقريـه كـم حبـاره=ناويين الصيد في ذيك المحالـي
الرجال اللي لها خبـرة صقـاره=عارفين الطيـر مافيهـا جدالـي
عبوا البنزين من شيشة خسـاره=وانكفوا للصيد في ذيك العبالـي
ثم صادوا بالحرار اللـي طيـاره=تسبق رياح الهبوب بكـل حالـي
والمزوح البينهم ضحك وعيـاره=مايجيبـون الهزيلـه والهزالـي
والغدا سووه في فيضـة عـزاره=في محلٍ ماوضع لااهل المبالـي
جعل يدهـم ماتجبرهـا الجبـاره=جعل يفداهـم ردييـن الرجالـي
والرعد يرعد وبرقـه كالشـراره=والسمـا كلـه ملبـد بالخيالـي
والمطر مابين تـاره ثـم تـاره=زين شوفه بالمحل اللي طرالـي
ياحياة اللي على الدنيـا خسـاره=همه اللي مشغله جمـع الريالـي
مايشـب النـار حبـه للخطـاره=ماتوثق فـي مواثيـق الحبالـي
لامحـل ولامجالـس للـوقـاره=صكت الحرمه علاه البيت خالـي
ظني انه ماعلـى كبـده مـراره=لعنبوا رجـلٍ مايجـزع للموالـي [/poem]



اخوكم/سطام محمد الجياشي الحارثي