لا وحسايف يابن شايق تعبنا للشاعر رويفع بن دبسي

[غليص الشيباني]

سالفت القصيده / كان رويفع بن دبسي في العمل جالس يتقهوى مع اخوياه الا يوم جاء واحدن قحطاني من اخوياه اللي هو الشاعر محمد ابن شايق اخوعبدالله ابن شايق بعد ماجاء القحطاني يبا يتقهوى لقاء الدله فاضيه قام ابو محمد اللي هو رويفع قال ابشر بالدله يابن شايق . راح ابو محمد ضبطله دله يوم جاء لاوالله الرجال ماهو موجود وكتبله القصيده هاذي قال فيها :

لا واحسايف يابن شايق تعبنا - عند الدلال احرقت كفي على النار

ومن شان خاطركم لك الله ذهبنا - انته طلبت البن والناس حضار

والا ترانا قبلكم قد شربنا - اربع دلال(ن) كامله بن وبهار

بن(ن) يماني دوك ريحه جذبنا - ومثلك رجال(ن) جو على الدرب عبار

ومن الزعل جبنا القلم ثم كتبنا - عشرة بيوت(ن) كل كلمه بمقدار

وحذفت تاليها عن اللي طلبنا - والا ترا قيفانها قد الابحار

ومن طاب فينا يافتى الجود طبنا - وصرنا له احلى من هماليل الامطار


وليا زعلنا كيف تامن عتبنا -لازم تفكر زين وتدير الافكار

وانته فهيم وجدكم من عربنا - وقت الصحيح تعد من ضمن الاخيار


وليا بغيت تقول وشهو طلبنا - ارسل لنا مردودها عبر الاقمار

رد عليه ابن شايق قال في قصيدته

جانا كتاب فيه زود عجبنا - نضم البيوت اللي على الطرس سطار

الشطر الاول كاتبينه على ابنا - والشطر الاخر كاتبينه على آر

ترا بيوت الشعر تحكم وتبنا - على المعاني ماحلى بدع الاشعار

يابو محمد كان تطلب طلبنا - منكم اثبات الحق يانسل الاحرار

واسلومنا على الحقوق تغصبنا - ماهي سوالف كيف حالك والاخبار

مشوبها شيبان واحفاد وابنا - وصية وصابها الوالد البار

ولا عليكم زود جبتم وجبنا - كل العلوم سمان وجزال وكبار

انتم كسبتوها وحنا كسبنا - يوم الزمان يدور والوقت دوار

رجع رد عليه رويفع بن دبسي قال في رده

الرد جانا قال حنا كسبنا - كل القضيه وانته اليوم محتار

وقعت بالعشره اكيد انسحبنا - مال الجمل نصيب في عشبه الغاز

جنيكم ياشيخ شعره غلبنا - وجنينا يرفس على القاع ماثار

وجنيكم عند القضيه سلبنا - وجنينا يجفل من الشيخ ثم نار

واليوم يارجل الكرم منك هبنا - كل الحقوق انسيبها جل وصغار

مطلبونا فنجال يطفي لهبنا - وتنسى القلوب الغاضبه كل ماصار

في ربعة البيت الشعر تو يبنا - بالصاهد اللي زاهيه فيه الازهار

وليا ومرت وقلت يالله ركبنا - الجيب واقف والنشامى لهم كار

وان كان مشوارك بعيد عزبنا - نبرى لذود(ن) شقح نوا بمحدار

يازين شوف الجيب يبرا جنبنا - ونقع المطر قدام ويمين ويسار

وسواقنا وقف ونزل حطبنا - عقب العصر ياما حلى شبة النار

يوم ان خطوا اللاش عودعقبنا - صوب البلاد يقول زانت بالانوار

عود يشجع في البلد منتخبنا - مصروع مايدري الى مره المار

البر يامشكاي حبه جذبنا - والعشب لازانت زهوره والامطار

ولو قلت مطاوع جماله غصبنا - اقوم من نومي ترى وقت الاسحار

من طول معاين للافاق شبنا - الصبح والمغرب نحذف بالانظار

وعن العمل ياما تركنا وغبنا - ومديرنا ياصاحبي صار صبار

وحنا ليا حقق معانا كذبنا - والرب يعلم يافتى الجود الاسرار

وسلامتكم / وانشالله تعجبكم واسف على الاطاله