الموت هين .. البلا وش ورا الموت ؟؟

[أبونايف]

هذه القصـــــــــــــــيده للشاعر // متعب التركي

فيهـــــــــــا من الحكم والعبره والنصح الشي الكثير



الموت هيِّـن والبـلا وش ورا المـوت
عند الحسـاب يهـون سهـم المنايـا

باكر نموت و تصبـح قبورنـا بيـوت
وعقـب القصـور بضيقـات الزوايـا

في جوف الارض وكل من حولك سكوت
و تعاقبـن بالقبـر عــوج الحنـايـا

يارب يا منجـي نبيـك مـن الحـوت
سترك وعفوك يـوم كشـف الخفايـا

باكر ليا جينـا علـى داعـي الصـوت
شيبـان واطفـال وشبـاب وصبـايـا

ندعـي وحنَّـا بيـن باكـي ومبهـوت
ورحنـا لهـا ننقـاد مثـل السبـايـا

يا رب تهدينـي قبـل لحظـه الفـوت
وتغفـر ذنوبـي يـا كريـم العطـايـا

أشكيك هـمٍ داخـل الصـدر مكبـوت
وأيَّامـي الـلـي بالخطـايـا مـلايـا

إن لاذ بك من كان طايـع و مبخـوت
فـي مـن يلـوذ المرتكـب للخطايـا

يا رب يا قـادر علـى كـل طاغـوت
لا ياقـف اللـي وحّـدوا بـك خزايـا

رحماك لا منّـا صحينـا مـن المـوت
واليـا وقفنـا عنـد بـابـك عـرايـا
.

.

[نجداوي نجد]

الله يحسن الخاتمه

يعطيك الف عافيه اخوي على الاختيار

[سلمان]

ايه والله يالله حسن الخاتمه



مشكور يابو نايف على اختيار هاذه الرائعه
وصح لسان شاعرها

[فهد العايضي]

صح لسان التركي

والف لاهنت يابونايف على نقل هذه الرائعه

تحياتي لك

[أبونايف]

المشاركة الأصلية كتبت بواسطة نجداوي نجد الله يحسن الخاتمه يعطيك الف عافيه اخوي على الاختيار

هلا وغلا باللي شرف الموضوع
مشكوووووووووووووووووور يا نجداوي على مرورك العذب

[أبونايف]

المشاركة الأصلية كتبت بواسطة سلمان ايه والله يالله حسن الخاتمه مشكور يابو نايف على اختيار هاذه الرائعه وصح لسان شاعرها

حياااااااااااااك الله يا سلماااااااااااااااااان
يامرحبا بك يالغالي ..

[أبونايف]

المشاركة الأصلية كتبت بواسطة فهد العايضي صح لسان التركي والف لاهنت يابونايف على نقل هذه الرائعه تحياتي لك

لااااااااااااااهنت يا فهد على تشريفك متصفحي

[عزام الوسمي]

قسم بالله رررررررررررررررررررروعة هالقصيدة يابونايف <<<<

ومتعب التركي شاعر خطير أعتزل الشعر بعد إالتزامه الله يثبته <<<

أذكر له بيت من قصيد خرافية وهو اخر بيت

لا تعتذر وبنسى كل ما قلته
وش ينفع العذر لمن ضاعت أيامي

أبو نايف متدري وش هو يعني من اي قبيلة هالشاعر ؟؟؟؟؟

تحياتي واحترامي لك "<<