قصيدة الشاعر مفلح بن عويد بن الثعلي

[ابن سرور]

أتمنى أن تعجبكم أول مشاركة لي

.
.
.
.
.
.
.
.
.

في حوالي عام 1263هـ أجار عايش بن عويد الثعلي
شخص من المطران اسمه بطي القعياني المطيري
وبعد عدة شهور اتى إليه ثلاثة أشخاص من قبائل الروقه
وسألوا المطيري عن كيفية دخوله ديار العتبان واخبرهم انه كان جار للثعاليه وذهبوا وتركوه ثم عاد اليه احدهم في اليوم الثاني وقتله واخذ جميع مواشيه وتوجهت زوجته واولادها مشيا على الاقدام حتى وصلوا ديرة الثعاليه بعد ثلاث ليال حيث لفوا عند ضيف الله بن معجب قاضي الروقه وكان نازلا على الحفايروابلغته الخبر فأمرعلى احدى نسائه باخلاء بيتها والخروج منه دون اخذ أي شئ ممابداخله من ارزاق وسلمه لزوجة المطيري وابنائها وكانوا صغاراوفي الصباح اعطاها بعيرين و35رسا من الغنم . وارسل معها اثنين من ابناء اخوته حتى اوصلوها وما اعطاها الى جماعتها في ديار مطير.
وارسل الى جماعة الروقي القاتل واخبرهم انه سدد المطران في الحلال وان عليهم دفع دية المطيري ا للي ذبحوه وهو في وجه الثعالية وردوا عليه بانه مابينهم وبين مطير مخاليص
وثارت ثائرة الشيخ ضيف الله القاضي وجماعته وجهز نفسه ومعه ثمانية اشخاص من جماعته واتجهوا لمنازل القبيلة التي قتلت جارهم في مكان يقال له مسيحه وكانت هذ القبيلة متحذره ولكن الثعاليه هاجموهم وقتلوا الشخص اللي قتل جارهم وقتلوا شخص ثاني والمعركه موصوفه بقصيدة مفلح بن عويد الثعلي
حيث يقول:

[poem=font="simplified arabic,4,black,normal,normal" bkcolor="transparent" bkimage="" border="none,5,gray" type=2 line=0 align=center use=ex num="0,black"]
يقوله من تهيض يوم عـدا راس مزبانـي=يغني له جواب مـا يخجـل مـن يغنونـه
جواب حلو واحلى من لبن حلوات الالبانـي=ليا شربت قرار الصيف من بسيان وركونه
انا هيض علي الاسعـدي هـو والقعيانـي=بعد شربولهم من مـارد(ن) زادو يعافونـه
تمـدا الاسعـدي يـوم الله امـره بميذانـي=يحسب انا نكب الوجه مثـل الـي يكبونـه
غزناه مغزا يقطع طنا مـن كـان طنيانـي=سبرنا الوادي الي من على اولهـم يحلونـه
سبرنا فالرها واليا البيوت وحوم رعيانـي=وقلنا كمنو و الليـل يمسيكـم و تمسونـه
وحفناهم واليالا حـس طاحـون وطحانـي=واثرهم بارزين و ما هرجنا به يخمنونـه
وجينا حولهم بين البيوت وبين الاضعانـي=ليا هم يفرزون المال وا لراعـي يوصونـه
واخذنا عندهم لين الضحى امن كل شفقانـي=لياهم في شديد وعندهم زمـل(ن) يردونـه
وتناخانا وليا حنا عيـال العـم واخوانـي=صقور قادها صقر صبر وانبـاح مكنونـه
هذاه الاهـذاه وروسهـم فيهـا الحميدانـي=على ماكر صقور وماكر اهلهـم يعيدونـه
وقسمهـم وجـا للدلـو جذابـن وشطانـي=مضاريم يبا كـل(ن) يعمـر راس غليونـه
يبون الي يدرجه النصيب ويومـه الدانـي=اثنين و لو الهم ثالث ورابـع مـا يخلونـه
وجوهم واحترك قوس الهنادي حس الاكواني=من ا يمان العيال الي قطرهـا مايخونونـه
وقلنا ياهل البندق ترى عمر الفتـى فانـي=نهار اليوم لاتـدرون لاعسـره ولا هونـه
وطاح الي يطيح ونحسب انه يومه الدانـي=كمنه جوه سلفـان(ن) يشوفونـه ويوحونـه
ولجو بالصوايح يـوم جـا للملـح دندانـي=مشاريـف علينـا كـل مجـدار يعدونـه
وقمنا من مكان ليـا مكـان فيـه مزبانـي=زبنا ابن خليل حرز قصر(ن) مايهوزونـه
زبنا ابن خليـل مالنـا خامـس ولاعانـي=كمن اللي يحطـون الزوايـد هـم ينجونـه
وجانا ابن الهميش وقال من جاء ماتعدانـي=يقولون القصير و القصـار الـي يسمونـه
نشدناهم نبا ندخل وجانـا ابـن صوابانـي=وححنا مانعرفه مير جونـا الـي يعرفونـه
وقام ادخيلنا ماهيب قومـة واحد(ن)وانـي=الا يا كبر حظ المجرم اللـي لاذ بامتونـه
ذيابي جهيمي مـن عزاة(ن)شانهـا شانـي=عليه البيض كبر منى وكبر الـي يحجونـه
وقمنا ثم واجهنـا منيـع الشيـخ عجلانـي=وقال الله يلوم اللـي مايحميكـم وتحمونـه
وحنا لوما بارونـا نخـزي كـل شيطانـي=نغيظ ابليس والي يستجـن نغيـظ مجنونـه
ثعالية(ن) عراب وجدتا الادنـا عضيانـي=وابونا مزحم الادنا والاقصاء روق يردونـه
الياشكانا من الباطل بشيمه فـوق صوانـي=يثورها الشرار وتاكل الـي شـان بانونـه
عواريف صـوارف للرفاقـه بيتنـا بانـي=عيات مع هل الباطل نشار اللي يشارونـه
ولارحنا لابن شـلاح والا لابـن عيبانـي=موامين النقاء حنـا ليـا ضيعـت مامونـه
وذقها ثم ذقها ياسعـدي مـادري سعيدانـي=كمن اللـي يعانـي بالقبيلـه مـا تهابونـه
والا ياذيب ياللي حـارس قبـر القعيانـي=تجدد فالزراب اللي وراه وشي مـن دونـه
نقاء في جارنا واللي بقي من جاره الثانـي=عساهم ياخـذون اللـي بقـاء ولا يخلونـه
والاياطيب كبدي يالنقاء من بايـق العانـي=بنصرالله يا نزال القريـن اللـي تعمدونـه
ولايارب انـك خابـرن مانـي بجحانـي=ولااسعرت الريال لواحد(ن) ماجاب ماعونه
ولامفخـم ولابشـا واحد(ن)قـدام يبشانـي=ولابعت وشريت محلـق اللـي مايبيعونـه
ولك الله يالبعير اناجزاعا ان كنت جزعاني=لكن الناس مـا يامربـه الله مـا يردونـه
تسير في مسيحه صابغـن ثوبـك برمانـي=وحنا لابسين الثوب الابيض مانقلـب لونـه
وحنا مارضينا بالديـات وقطـع الايمانـي=ولانرضى علينا بالسواد ان كان ترضونـه[/poem]

لقد ذكر هذة القصة محمد دخيل العصيمي في كتابة (شعراء عتيبة) ص 488 وقد أوضح أنه ناقلها من كتاب (ديوان الامراء) لماجد الشلاحي

[إبن ثعلي]

مشكور يابن سرور والسالفه والقصيدة معلومه وكل القبيلة تحفظها ماحنا في حاجة العصيمي والشلاحي يعلمونا بها وموجوده في هذا المنتدى من سنين
تحياتي

[مخاوي النشامى]

سلمت يمناك بن سرور على إيراد القصة والقصيدة
بانتظار روائع جديدك

[ابن سرور]

الأخ إبن ثعلي نعلم أن القبيلة تحفظها ماحنا في حاجة العصيمي والشلاحي يعلمونا
ولكن كثرت الروايات واختلافات القصة وحبيت أن أثبت أن القصة الحقيقية . ذكرها محمد دخيل العصيمي في كتابة (شعراء عتيبة) ص 488 وقد أوضح أنه ناقلها من كتاب (ديوان الامراء) لماجد الشلاحي

الرواية الثانية هي :
كان في الزمان السابق بطي القعياني المطيري جار لآبن ثعلي ، وأبن ثعلي ، وقام الاساعدة من قبيلة عتيبة وذبحوا المطيري جار ابن ثعلي ، وأخذوا أبله وقام أبن ثعلي وجمع أولاد عمه الخاصين وعددهم أثنا عشر رجلا ، وقال لآولاد عمه اليوم جارنا (بوجهينا) أي تحت حمايتهم ولا يسعنا هذا اليوم الا أن نأخذ ثأرنا من الاساعدة الذين قتلوا جارنا المطيري ، وكان الاساعدة أكثر عددا من الثعالية ، وغزا بأولاد عمه الذين كان عددهم أثنا عشر رجلا ، وصبحوا الاساعدة وقتلوا الرجل الذي قتل جارهم وقتلوا معه رجلا أخر يقال له البعير وهو ليس من الاساعدة بل كان جارا للاساعدة وكان قتل البعير خطأ .....

وتلاحظ الاختلاف بين الروايتين
وحبيت أن أن نعرف الرواية الأقرب للصواب





وأنا ذكرتها لكي يعلمها كل شخص أو زائر للمنتدى سواء من داخل القبيلة أو خارجها

وأرجو منك يا إبن ثعلي أن تكتب الرابط التي عليه القصيدة من سنين حيث لم أجدها ....

وشكراً



كما أشكرك يا مخاوي النشامى

وإن شاء الله أكون عند حسن ظن الجميع

[شاعر روق]

تشكر يابن سرور على طرح القصه والقصيده المشهوره

تقديري لك

[برقاوي هواوي]

تسلم يابن سرور على ايرد هذه القصة والقصيدة

[اخو من طاع الله]

مشكور يا ابن سرور على السالفه والقصيده الرائعتين

[محمد العتيبي]

ابن سرور

مشكور على القصه والقصيده ويعطيك العافيه

تحياتي

[النـايــــــف]

مشكور يا ابن سرور


على هذا الموضوع


تحياتي لك ،،،،