يا جار لا تسري بك افكار الاوهام

[عيد بن شده]

يا جار لا تسري بك افكار الاوهام
مالك ومال متيهين الجهامه

وقبل صلاة الصبح والعالم نيام
ابعل زرع و أحصد ثمر من صرامه

واللي بلغ ستين حتى ايش لوزام
لو زام ياجاري تضيمه عظامه

ماهوب ويا ناقش الكف بوشام
اقفا شباب العمر واقبل صرامه

لو جاه لطف الروح للنفس عزام
بشر لطيف الروح منه السلامه

ماهوب ويا شوف ترفات الأقدام
اللي عليهن من دلعهن علامه

الشايب اللي يرتكي كل ماقام
تشوف دايم خلته في مقامه

لو هو كفو ومحطمن كل الأرقام
وعنده صبر بالمعضلات وشهامه

ويثبت اليا ذلوّا مقارير الاقزام
وراعي شداد وحض غيره مسامه

البيض عنه تشوم لوكان ضرغام
مرامهن خالف هقاوي مرامه

حتى ايش لو يكشخ بجزمه وبسام
و حتى ايش لو باقن بوجهه وسامه

يبغن من يرقص على دقة أريام
في رايهن يركض سوات النعامه

ويكدد القصه على الوجه قدام
لو ماوراه الا الفلس والندامه

و أنصحك يا جاري ذرا كل منضام
إقصر بصوتك قبل تدفع غرامه

لايسمعك شخصن معك طول ألايام
شخصن لكم دايم يكن احترامه

يعلن عليك الحرب والحرب قصام
وتقوم عندك وسط بيتك قيامه


الشاعر:عيد بن بجاد بن شده

[إبن ثعلي]

صح السانك يابن شدة قصيدة رائعه
ولو ان فيها تحطيم للشيبان
وتحياتي لك

[عيد بن شده]

صح بدنك يابن ثعلي
والشيبان حطمتهم السنين

[عبدالعزيز بن حشيان]

ابو فهد

صح لسانك ولشيبان مامطلوب منهم غير التوبة والاستغفار

[عيد بن شده]

الله يتوب علينا جميعٍ وصح بدنك يالكسر