السلام عليكم ورحمة الله وبركاته
اسعد الله جميع اوقاتكم بكل خير
هذه مشاركتي الاولى في هذا المنتدى الرائع
وهي القصيده التي جاراها اخوي ابن شبلان جزاه الله خير:
[poem=font="Simplified Arabic,5,blue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
يالله تعافيني ولاتبلاني=يارب عفو(ن) منْك يارحماني
يارب انا مذنب ولا لي غيرك=اغفر ذنوب المستجير الجاني
اغفر لأبويه واشتمْله بعفوك=وامي وربعي مع جميع اخواني
والمسلمين المؤمنين ارحمهم=القاصي اغفر زلّته والداني
ماينقفل من دون مسلم بابك=وفلان بابه ينقفل وفلاني
مديت كفّي واطلبِك ياربي=عزّيت نفسي واْقصرت ذرعاني
مارحت ادوّر مال من خلق الله=لو ان فقري هدّني واشقاني
انت العظيم المعتلي في عرشك=انت الكريم المعطي المناني
احمدْك ياربي على نعمائك=سمعي وتفكيري وشوف اعياني
فضلِك كثير ونعمتِك لاتحصى=ياذا الجلال وصاحب السلطاني
يارب صبرني ولاتشقيني=يارب تنصرني على عدواني
اصبر على الدنيا ولا لي حيله=بعض الصبِر مايبري الوجعاني
مشكاي للي سائله يفْرِج لي=هم(ن) من اسبابه غديت اعاني
ماكنت احسبْني تخور عزومي=ماكنت احسب ان الزمن يقواني
لين اصطدمت بواقعي واشوفه=يبتر جذوري يستبيح اغصاني
الوقت غيّر بالسّواد الوانه=غيّر ملامح بهجتي والواني
واشوف امور(ن) قبْل كنت اجهلها=مدري وش اللي صابني واعماني
وابصرْت..ويش ابصرت بآخر دربي؟=ابصرت والظلما تحوف اركاني
ماكنت اظنْ الغدْر فعله كايد=خص(ن) من اقرب ناسي وخلاني
لين اكتويت وبان لي مفعوله=منّي وفيني جمرة(ن) تصلاني
واصحابي اللي لابغيت احصيهم=وقت الشدايد ينحني ميزاني
امحق رفاقه فالسّعه مااوسعها=لاضاقت..اسمح لي ولا تلقاني
دستور يالصاحب ولا لك قيمه=تلميع وجهك غرّني واغراني
من دون فضل(ن) لي ولا لي منّه=اعطيت محد(ن) من عطاه اعطاني
الاّ الاله اللي عطاه اغرقني=من زود فضله سالت الودياني
اكتبْك ياشعري واجرّ لحونك=معناك ضيف معزبه قيفاني
البيت صدره لا طربت وشلْتِه=بالهون..قال العجز:ياطرباني
مال الشّجر طربان حتى غصنه=قام يتمايل فيه عود الباني
ياهيه ياللي ميلتِك في نهجك=اعدّلك من قولي الملياني
ارْسم طريقك بأحتراف وخبره=ماوافقك في فكرك الشيطاني
خيّرتني مابين نار وجنّه=جنّتْك فتنه تشعل النيراني
لو فكّر لساني يردد قولك=قصّيت دون احتار عِرْق لساني
عقلك مزيج افكار صار الناتج=صربي وصهيوني على علماني
ماتدري ان الدين قدْ وحّدنا=الجيل ينقل عزّته للثاني
واليوم في حكم الســعود اصبحنا=للدين حصن(ن) دونه الفرساني
دوله وشعب(ن) مايبيع الدوله=عشنا بأمن بجوها الروحاني
دستورنا بالنور صاغ احكامه=وحي(ن)..وقانون البلد ربّاني
دستورنا معروف شرع(ن) منزل=سنّة نبي الله مع القرآني
يارب تحفظ ذخرنا عبدالله=مالك قلوب الناس بالاحساني
يارب تحفظ اسرته واخوانه=وعيالهم وسلالة الشجعاني
يارب شاعر نوب اهيم بوادي=وادندن بدانه يالا لا داني
اقوال من بنك الخيال اصرفها=لعلّها تطفي لهيب احزاني
يارب تغْفر زلّتي واخطائي=يارب ثبّتني على ايماني
وختام قولي مسْك مااختم به=اعداد مزن(ن) يسقي الريضاني
ازكى صلاتي يرْدفه تسليمي=على الرسول المصطفى العدناني [/poem]
| 
|
01-25-2008, 09:24 PM
العرض العادي
