في نون عيني بارق الوسم لايح ..!

[اصايل]

صباح ../ مساء ..الشعر

:

:

اخذت من روحي لروحي نصايح



ثلاث يرضن النفـوس الضياقـي



جمع الحطب ومعلقـات الذبايـح



وحذف النشامى للغتر والطواقـي



بقفر خلا عشبه بالازهـار فايـح



وغصن الخزامى له بالاخر مراقي



تلقى ام سالم به تجـر النوايـح



ويطيب مع طير الربيع التلاقـي



بين اربعة جدران مانـي بطايـح



قطع الخرايم جبرت عظم ساقـي



في نون عيني بارق الوسم لايـح



كن السحاب تسل فيـه السناقـي



ان عودوا غب المطـر للفلايـح



مانـي بفـلاح يعـدل سواقـي



عـودت للـي يكسبـن المدايـح



فيهن طرب قلبي ولـذة مذاقـي



سود البكار المكرمـات المنايـح



هذي ضوت خلفه والاخرى ملاقي



ملحا تفاهق بالصميلـي وتمايـح



وتركي على كبد الحسود العَراقي



خلوني اقضي باقي العمر سايـح



مادام للعمـر المطـرف بواقـي



امشي تحت غر المزون الروايح



هذا هواي ورغبتـي واشتياقـي



يرتاح بالي يـوم اوده واصايـح



وابسط فراشي في مبارك نياقـي



انحاش عن ناس تسوي الفضايح



عاشت بسوء اخلاق كذب ونفاقي



ناس تسـرد للمشاكـل شرايـح



تثير من بين الاخـوان الشقاقـي



كل الحياة احلام والعمـر رايـح



طرقي بهالدنيا وغيـري طراقـي


خلف بن هذال