قصتي مع سوق حراء بمدينة جدة ( تكفون شوفوها)

[عزام الوسمي]

السلام عليكم ,,,

أتمنى أن تتسع صدورمكم وقلوبكم لمشاركتي الشعرية الخاصة ,,,

قصتي وسوق حراء :

هذه القصة حصلت لي أنا ومعي خوياي عندما ذهبنا إلى سوق حراء الدولي بمدينة جدة وعند مدخل السوق فإذا بجمس موديل جديد الظاهر أنه 2002 ( يعني ذيك الفترة ) ونزلت منه بنت كاشفه الوجه والعباه يغني الله عنها ... المهم البنت مزيونه بالحيل وعاد أنا وقفت قدامها بشوي أناظر فيها قالوا الشباب وش فيك ... سكت وما قلت شي .. المهم رجعنا إلى العزبة ووقتها كنت أدرس في الجامعة ... رجعنا العزبة ... والله يا شباب ما قدرت أنام على أني في هالعلوم ماش ... ( يعني مالي فيها ) بس هالمنظر دوخني شوي ... المهم بعد ما رقدوا الشباب كتبت بيتين ,, مآذن الفجر إلا وأنا كاتب هالقصيدة ( بعدين زبطت فيها شوي ) اللي مدري كيف طلعت معي ( مع العلم أني عليمي شعر ) في الصباح وقبل الدوام صحيت الشباب وقلتلهم أسمعوا القصيدة قالوا ما حنا فايقين لك أنت وخرابيطك بعد مارجعنا من الدوام أصريت عليهم وسمعتهم القصيدة وجاملوني ماقصروا الشباب ............... المهم عندي حبيت أطرحها لكم وأنا عارف أن فيكم شعراء كثيرين ...... أرجو أن تقروء هالقصيدة ثم علموني وش رأيكم فيها بصراحة .. وهل أصلح أطلع في مهرجان ( هلا فبراير ) ..... أقروء ولا تجاملوني يأحبابي تكرما لاأمرا :

قالوا علام عينك ما تومي بالارماش
قلت ياناس أفــــتكر فلي حصلي
في جمعة الخلق وأنا على الرجل ماش
غرو صـغير قدم عــيني خطملي
به الجمال والخفة وكل الحسن حاش
وبه العـيون السود والرمش المظلي
وبه مشية الريم والسلطان والـباش
وله نظـرة تربك خشوع المصلي
وله عنق لماع لو بالذهب ما نــاش
وله قـذلة من فوق الجبين تنهلي
وبه قوسين من شافهن ما عـــاش
ولأدري وقتها وش اللي خطرلي
مرني ويبس الروح واحرق الجاش
واقفى بعيني لا عرفته ولا عرفلي
ودقت أجراس موتي واغرقني الطاش
وقـــمت أتلفت أعاينه ولا فطنلي
لاواحسافه لن راح عمري على ماش
لا سـلـيت ببعاد ولا قربه حصلي
وراحت عليه وراح العمر بــــــبلاش
ياكيف القــلب يسـلا وعيني تملي
وياكيف أبنسى وصورته فــــــــــلاش
و ياكيف بصبر والعــنا مبتدلي
ياليتني مارحت للسوق وبقلبي انحاش
عن شوفة(ن) بها خاطري يسفهلي



وسلامتكم ,<<<<<<<<<<

[خالـد]

قصيده حلووووه بس على ما اعتقد عندك مشكله في الوزن





تحياتي لك

[عـبودي أنا]

يعطيك العافيه يــ اخوي عـــزام

وقصيده حلوه عقبال الي جاي احسن واحسن

مع التحيه عــــبودي أنــا

[عزام الوسمي]

الرائع خالد ,,,, ملاحظتك مقبولة ومشكورة ,,,,

لاتحرمنا الطلة دائما على مواضيعي ,,,,

عبودي أنا أهلا وسهلا مرورك أسعدني <<<

تحياتي واحترامي >>>>>>>>

[منصور الشيباني]

الله الله عليك ياعزام

صح لسانك مليوووووووون ولا يكفون

وانا اعتقد انها موزونه ماادري اذا كان اخوي خالد ملاحظ شي مالاحظته مدري !! بس اللي شايفه ان القصيده موزونه

لا تحرمنا من مشاركاتك القادمه ياعزام

تحياتي لك يالغالي

[عزام الوسمي]

الجميل سلطان أبو فيصل ,, صح بدنك ’’’’’’’’’

إطراء ك لي شرف .,,,, والحقيقة شىء افتخر فيه


لاتحرمني هالطلة المنورة على مواضيعي ,,,

لك مني كل الاحترام والتقدير ؛؛؛؛