قصيدتين للشاعر المبدع/ شقير بن عقيّل الجذع العتيبي

[زيد]

[align=center]هذه القصيدة للشاعر الكبير شقير بن عقيل الجذع العتيبي

قصيدة غزلية ويقول فيها ...[/align]



[poem=font="Simplified Arabic,4,black,bold,normal" bkcolor="transparent" bkimage="" border="ridge,4,sandybrown" type=2 line=0 align=center use=ex num="0,black"]
واصاحبي دونه من الشط غبّـه = غبّـات وأمواج ٍ تكيد السفينه
دونه محيطٍ كوّنه حكم ربه = ما حدّدو طول المدى غايصينه
كم قاربٍ هاز العبور وقلبه = وكم ضاع به من صافيات المكينه
في نجد وأنا في ديار المسبه = دارٍ عجزت أعرف لهلها رطينه
دارٍ عسى صم القنابل تدبه = تحرق علو أرضه وتظهر دفينه
دار الهنود اللي مباه ولاحبه = حيث الشريف اللي يجيها تهينه
فيها يعيش اللي نسي خوف ربه = خطو البهيم اللي تهاون بدينه
نذل ٍ لقى الحوض الحرام وشربه = قطع اليدين ولا حياة الغبينه
يمشي على راسه من العيب قبه = تبّاع عبّـاد البقر في عرينه
متى براي الله نروح ونكبه = وأشوف من عيني تبي شوف عينه
لو هو بعيد الدار قلبي يحبه = وروحي عليه من المحبه حزينه
خشفٍ سلب قلبي غلاه ولعبه = لعبة سلوك الوتر مع لاعبينه
زند الغلا فيّه قدحبه وشبه = وطحن ودقق بالمحبه طحينه
بعده مرض قلبي ولاماه طبه = وعليه قلبي باح خافي كنينه
وجدي عليهم وجد من ماه صبه = على بذور ٍ مشتراها بدينه
في خانة المليون سمه وحبه = غير النقود وما تحوشه يدينه
وبعد استتم الزرع وهوه تعبه = خيّل عليه اللي حقاقٍ غشينه
وأخذ عليه السيل ربعه وغبه = لين اختلط حبه وتبنه وطينه
وعوّد وحظّـه فالمجالس يسبه = يطق كف بكف لمعذلينه
على الذي حي ٍ وميت بحبه = الوصف كامل والمذاهب حصينه
لا عاري ٍ عوده ولاهوب دبه = معزلٍ تزها البناجر يدينه
مناحرة صدر ومحاجر ولبه = وليا عرض خصر ٍ يهلّك جنينه
خشفٍ عذا نجد العذيه مربه = غربٍ من الدمام شرق المدينه
في قريةٍ مابين وادي وتَبَّه = أربع حروف الاسم يا عارفينه
للي قرا بأي الكتاب وكتبه = اسمه بحرف من اسم هاك المدينه[/poem]





[align=center]القصيدة الثانية .. قصيدة غزلية يوجهها للشاعر
غازي بن جري .. ولكن للأسف لا يحضرني الآن رد الشاعر غازي بن جري

....[/align]



[poem=font="Simplified Arabic,4,black,bold,normal" bkcolor="transparent" bkimage="" border="ridge,4,burlywood" type=2 line=0 align=center use=ex num="0,black"]
الله من حبٍ تكنه ضلوعي = حتى توزع فالشرايين توزيع
عليك يا زاهي ثلاث الردوعي = أعوي عوا ذيب ٍ وقفله على ريع
ذيب ٍ يجر الصوت من عقب جوعي = وياخذ مع البيدا هذيب ومذاويع
جايع ولا حوله من النزل دوعي = ويجر له صوت ٍ يشيب المراضيع
وعليك من بين الحواجب دموعي = هجّال وسميٍ امزونه مصاليع
قطعت فيّـه يالغزال القطوعي = أشريك وأنت تبيعني بأرخص البيع
وعذبت قلبي يا حسين الطبوعي = وحبك شربته مع نسيم الذعاذيع
ما ارخي لهرج الناس دونك سموعي = لو عذّلوني عنك لااسمع ولا اطيع
ليا غاب عنّي ليلة ٍ بالسبوعي = كنّـه تمزّع بشرة القلب تمزيع
ما عاد أفرّق سبتها والربوعي = يصيبني سجّه عن الدرب وأضيع
خشف ٍ معي ياللهوا طار شوعي = وخلاّ لذيذ النوم عندي تقاطيع
إليا ذكرته والخلايق هجوعي = أفز فزّة غافيٍ عقب ترويع
للبيض نوع ولشقر الراس نوعي = زين الوصوف وكاملات التطابيع
من جفّل الغزلان فيها ربوعي = وفيها وصوف من الحرار المواقيع
لا هو متين ولا قصير الدروعي = ولا هي من الحدب الطوال النعانيع
ولا هو نحيف ولا بمشيه يتوعي = عليه وصف مجدّلات المصاريع
يابن جري قلبي معه صار طوعي = وشرّع له أبواب الهوا الخمس تشريع
واحد منه قلبي تقول مخلوعي = كنّه ينشعني من الخمر تنشيع
وثاني بقى نومي على راس كوعي = أفتح مشاريع ٍ وأقفل مشاريع
في غبة ٍ تغرق طويل البتوعي = يصعب على من طب فيها المطاليع
وثالث بديت وعنه صعب ٍ رجوعي = يابن جري تصعب عليّ المراجيع
ورابع بقى وقتي نزول وطلوعي = يضرب بي الهاجس وساع المخاويع
وخامس ملك ما يملكنّه ضلوعي = لا هوب لا سلفه ولا هوب توديع
ولا هوب غصب ولا رضايه وطوعي = الحب قسمه والمناهج تناويع
هذا الخبر والله عليه السنوعي = وأبغى الحلول من الرجال البواتيع
اللي على الصعبات مثل الدروعي = رحامة ٍ وقت القطاعة قواطيع
اللي مواقفهم سواة الرجوعي = مودع هشيم القاع خضر ٍ مهانيع
وأخص فيها اللي له العسر طوعي = غازي له العسرات دايم مطاويع
رفيقي اللي فيّ دايم جزوعي = ياجب لي أشرحله جميع المواضيع
عساه يلقا حل بأيات نوعي = وألاّ يقنعني عن الحب تقنيع[/poem]



[align=center]وســلامتكم ،،[/align]

[سمران القثامي]

الأخ الغالي // زيد الله يعطيك العافية على الاختيار الرااائع والموفق


والشاعر شقير بن عقيل الجذع غني عن التعريف ومن اعلام الشعر

في قبيلة عتيبة له اسلوبه المتفرد في نظم القصيدة وطول النفس الذي يصعب على الكثير من الشعراء 00مشكور يازيد ولالاهنت

أخوك// سمران القثامي

[الدجيما]

[align=center]تسلم يمناك اخوي زيد وصح لسان الشاعر شقير وياليت توافينا بالجديد.




الدجيما[/align]

[عبد ربّه العازمي]

مشكوووور يازيد ،



وابو فيصل يعتبر من اساتذتي ،


حفظكم الله ودمتم


عبدربه

[الحصان]

صح لسانك يازيد وصح لسان ابوجمال


شقير بن عقيل الجذع شاعرعملاق

[محماس بن عبيد]

بيض الله وجهك يا زيد على نقلك القصيدتين لشاعر غني عن التعريف ، تسلم يمناك ، وصح لسان شقير الجذع 0

فيها ثلاث أوصاف ما يوجدني
عقل وجمال ومنسبه لو تنقيت
هي بنت من يثني إلا دلبحني
سود الليالِ معجزات النعاتيت
ليته يصارحني على قد ظني
أما قصرت الرجل وألا تعنيت
( أبيات رائعة لشقير الجذع )

[محماس بن عبيد]

أخ زيد يعطيك ألف عافية ، أود أن أسألك عن رقم الشريط وأي تسجيلات أجد الشريط لأني أبي الشريط اللي فيه القصيدة الأولى ،
وشكرا على القصيدة ، ولا هنت .