|| قصائد الشاعر الكبير / فلاح القرقاح || امام خادم الحرمين الشريفين في منطقة عسير

[وحش عتيبه]

[align=center]
السلام عليكم ورحمة الله وبركاته
يسرنا أن ننقل لكم خطياً وبالصوت
القصائد الثلاث للشاعر الكبير / فلاح القرقاح
والتي القاها أمام خادم الحرمين الشريفين الملك عبدالله بن عبدالعزيز
أثناء تشريفه حفل أهالي منطقة عسير يوم الخميس 11/10/1427هـ
.
القصيدة الأولى
http://www.qahtaan.com/works/up/down...1162817846.ram
الرعد والبـرق والغيـم وانسـام الهبـوب
والمزون اللي تشـوق العيـون نصوبهـا
ساقها الرحمن من كل حدب وكـل صـوب
والتقت من فـوق قمـة عسيـر دروبهـا
نطحت السحب الركاميـة جبـال الجنـوب
وفي سماها ذابـت جنوبهـا فـي جنوبهـا
الشوامخ لبست الثلج والماء لبـس ثـوب
والسهـول استقبلـت ضيفهـا باسلوبهـا
الارض صارت تحت زخم النوامي والعشوب
جـادلٍ صبحيـة العيـد تلبـس ثوبـهـا
عيطموس وبنت شيـخٍ معنـز ومحسـوب
فتنـةٍ مـن ناصيتهـا الــى عرقوبـهـا
ربعَت بقـدوم غيـث المنـازل والقلـوب
المـلـك عـبـدالله محبـهـا محبوبـهـا
حاكم يرهيٍ على شعـب ويسانـد شعـوب
ويدعـم الامـة وحكامـهـا وشعوبـهـا
جنُب بـلاده الاهانـة وويـلات الحـروب
يوم غيره صـارو اذنـوب فـوق ذنوبهـا
مرحبا بك يا أبيض الوجه حـلال الكـروب
في الظروف اللي تهول العقـول خطوبهـا
بين أهل صدق موالين مـا فيهـم كـذوب
استغلـوا فرصـة قدومـك وفرحـوا بهـا
انت بأمر مكـون الكـون عـلام الغيـوب
قبـل تملـك مملكتهـا ملـكـت قلوبـهـا
وابو خالد مرحبا بـه تراحيـب الوجـوب
عد نـور الشمـس وشروقهـا وغروبهـا
ياهلا يا رمز الاخلاص والجهـد الـدؤوب
لا احضرت اهل المواجيب في مـا جوبهـا
في ديارك وانت فيها يا سلطـان محبـوب
ابـرك الايـام يـوم يجيـبـك صوبـهـا
عشت والي عهد غيث المنـازل والقلـوب
المـلـك عـبـدالله محبـهـا محبوبـهـا
حاكمٍ يرهي على شعـب ويسانـد شعـوب
ويدعـم الامـة وحكامـهـا وشعوبـهـا
.
القصيده الثانيه
http://www.qahtaan.com/works/up/down...1162818107.ram
يا سيـدي قبـل تقريبـا ثلاثيـن عـام
سقت اول خطاي بين البيـت والمدرسـة
ودرست كل الكلام اللـي عليـه الكـلام
في الفقه والجبر والتفسيـر والهندسـة
قريت سيـرة رسـول الله خيـر الانـام
وادركت ليش الوطـن يستاهـل نقدسـه
وعرفت كيف انتصر عبدالعزيـز الامـام
ووحـد وطنـا ولـم اشتاتـه وسيسـه
وزميلي اصبح مثالي في الادب والنظـام
يهتـم فـي كتبـه ويهتـم فـي ملبسـه
اللي من اول يشيل مسدسه فـي الحـزام
صار قلمـه محزمـه وكتابـه مسدسـه
الطالب اكـرم بعلـم وتربيـه واهتمـام
والحر يفـرح بـه الصقـار لا قرنسـه
حصل على ملبس ونقل وشراب وطعـام
وجوايـز تدفـعـه للعـلـم وتحمـسـه
حمـلات وزارة الصحـة تجـي بانتظـام
بوقايـةٍ مـن جراثيـم الوبـا تحرسـه
العلم يمحى الجهل والنور يجلـى الظـلام
لولا الفكر فضِـل العامـل علـى ريَسـه
كنا بدو قح نجهـل حتـى آداب السـلام
والجهل لو جا على العود الخضر يبسـه
احدٍ يسوق النخل واحدٍ يسـوق الجهـام
وأحدٍ ورى الصيد كامل جهـده يكرسـه
كم خشف ريمٍ ما يرعى الا غصون البشام
خلى المشوك مع الصفره يصـك نفسـه
رغم الفقر والمشقه والظـروف الجسـام
ما منا رجال عن ضيفـه قفـل مجلسـه
بجهودكم ياهـل العوجـا بلغنـا المـرام
عز الله انها جهـود مـا هـي بمفلسـه
التنميـة والبنـا والـبـذل والاحـتـرام
يشهد لهـا الواقـع اللـي كلنـا نلمسـه
.
القصيده الثالثه
http://www.qahtaan.com/works/up/down...1162573670.ram
بريةٍ ما طـب فـي السـوق نوعهـا
بهارهـا غالـي وحـالـي قدوعـهـا
خيـرة ثمـار الباسقـات المشمرخـة
خضر الجريد اللـي طـوال فروعهـا
عـز الله ان فنجالهـا يبعـد الـخـوا
وهـاذي مواطنهـا وهـاذي ربوعهـا
يا خـادم البيتيـن يـا حاكـم الوطـن
حجابهـا لا خفـت وطـار شوعـهـا
يا نورنا الوهـاج فـي ديجـر الدجـى
درع الجزيرة مـن ضماهـا وجوعهـا
صقر العروبـة مـن بحرهـا لبرهـا
ذخر أمـة محمـد مطبـق شروعهـا
حلال عسرات القضايـا ليـا اصبحـت
صعـبٍ تقدمهـا وصعـبٍ رجوعهـا
حقنـت دم الأمـة الـلـي تنـاحـرت
ووحـدت كلمتهـا وهديتهـا روعهـا
واللي ورى القضبـان فرجـت كربتـه
رفيـت خـلاتٍ مـا ترفـى شلوعهـا
ولو نبغي نعـدد خصالـك يـا سيـدي
ناخذ سنـة مـن سبتهـا لا ربوعهـا
يهناك حـب الشعـب باكمـل طوايفـه
ويهنـاك نفـس مـا تغيـر طبوعهـا
وقلبٍ يحـس بكـل شـيٍ نحـس بـه
وجــوارحٍ لله عـجـلٍ خشوعـهـا
وعينٍ باذن من سلسل الماء من السماء
يوم القيامـة تشهـد الهـا دموعهـا
واخوك ابو خالد ولي عهـدك الوفـي
راعي الجهـود اللـي كبـارٍ نفوعهـا
سلطان سلطـان النواميـس والسعـد
امانهـا ومـروع الـلـي يروعـهـا
غيث الضعيَـف والمعـوق والارملـة
اللـي مـن الفرقـا ولعهـا يلوعهـا
جتها الفجيعـة فـي شريـدة رجالهـا
ومـن البكـا بغـت تحطـم ضلوعهـا
هو سترها الضافي وهو ستر غيرهـا
لان المكـارم تنثنـي لـه بطوعـهـا
وأنتوا يا ابو متعب ذرانا من القصـى
لازاع حـزات الرخـا مـا يزوعـهـا
وحنا علـى الميثـاق والعهـد والـولا
قوة وطـن تجلـى الملامـة وقوعهـا
آمالـنـا فيـكـم كبـيـرة ودارنــا
نبغي معزتهـا مـا نبغـي خضوعهـا
العالـم الثـالـث لا بــد نتـجـاوزه
ونكبـر الفرحـه ونوقـد شموعـهـا
نـدرس جديـد التقنـيـة ونتعلـمـه
ونعرف طرايقهـا ونعـرف سنوعهـا
ونبنـي لنـا صـرحٍ يليـق بمقامنـا
له طلعـةٍ يشـوف الاعمـى طلوعهـا
عدواننـا عــارٍ عليـنـا سلاحـنـا
ان كـان مـا قمنـا نفـرق جموعهـا
حـنـا لدولتـنـا جـنـودٍ مجـنـدة
حنـا ذخايـرهـا وحـنـا دروعـهـا
[/align]

[بدر الروقي]

صح السانك والسان الشاعر فلاح القرقاح


وبيض الله وجهك يالغالي



تحياتي ...!!

[حنين الماضي]

نقل مميز فعلا

لقد سعدت بمصافحتها

سلمت على نقلك وصح الله لسان شاعرها

تقبل فائق الود

[مستر عتيبي]

صح لسانك أخوي وحش عتيبه
و صح لسان الشاعر فلاح القرقاح
و الله يعطيك العافيه

[النـايــــــف]

صح لسانك اخوي وحش عتيبه

وصح لسان الشاعر فلاح القرقاح

وبيض الله وجهك يا الغالي

على هذا الاختيار الرائع

تحياتي لك ،،،

[محمد العتيبي]

وحش عتيبه

صح لسانك ولسان الشاعر القرقاح

ويعطيك العافيه على النقل الرائع

تحياتي