ليلة الدخله :::: بروفات للعزاب :::::::

[فارس المحقنـي]

بسم الله الرحمن الرحيم

ليلة الدخلة 0 وش بسوي في ليلة الدخلة ؟ وكيف بتصرف ؟ وشلون بحتسي ؟ ووش بقول ان حتسيت ؟ وشلون بتصرف ؟

اسئلة كثيرة ومعقدة افنيت سنين من عمري افكر فيها وابحث وادور عن اجوبة لها وسألت اهل الخبرة بس لين اللحين ما عرفت شي خلوني اقولكم وش قصدي من القصة طبعاً العلم عند الله بس هذي بعض تخيلاتي وتصوراتي للي بيصير لي لليلة دخلتي :

خبطت اقصد خطبت وبعدها تملكت حلو وجا يوم العرس وسبحت ( سباحة استثنائية باالعادة بس في الاعياد ) وفركت جسمي با الليفة وفرشت سنوني ونعمت وكديت قذلتي وحددت شنبي وقصصت اظافري ( علشان ما امخش ) ولبست صراويلي وفنيلتي وبعدها طقيت لك ثوب العرس الكشخة ولا ارضا بأقل من ثوب الدفة طبعاً عريس وبعدها صكيت القلابي وبيحمر وجهي كاالعادة ولبست الطاقية الزري ( وععع) وفوقها شماغ العقل ابو خمسطعش وفوقة عقال متنتف وأخيراً لبست آخر قطعة وهي البشت واكيد بكون متسلفة من واحد من الربع اما بفصل واحد بهاك العدة علشان ليلة معصي0 وبتجي الوالدة الله يطول لي بعمرها ( قولو آمين ) وتبخرني وتصبصب علي من انواع الاطياب وبتقول " ما شاء الله عليك حارسً يحرسك يا وليدي كلك ملح وقملة اقصد قبلة وبتجي جدتي سوير وبعد ما تبسي ( الفلم الهندي زي العادة ) بتقول هي بعد" ولااااااااك يخزي العين شو ما احلااااااااك يا بيزاا ( حشى وراها قلبت لبنانية ؟) لا بتقول " مبروك يا عميري والله عشت وشفتك معرس عقبال ما اشوف عيالك معرسين ) وطبعاً بيخلل كلماتها هذي دموع ومشاهق ووقفات لمسح الدموع با الشيلة ثم المتابعة وبينقصنا صوت ربابة علشان يكمل المسلسل يعني شغلة تبخرت وركبت في سيارة اخوي ( كراسيدا 95 جي ال) اكشخ موتر عندنا طبعاً بركب ورا وابوي بيركب قدام ولو ابو العريس وادهرت الصوالين تحمل باقي الحريم وما يحتاج طبعا صياح البزارين ولجتهم هذا بيركب قدام وهذا يبي يجلس عند الدريشة وذوليك قالبين المرتبة الاخيرة فرع لملاهي ((عطاالله)) وانواع الصياح وذيك تجلد في البزر علشان يوقف عن الصياح ( هذي اللي لين اللحين ما فهمتها عجبي ) ! سرت القافلة او الموكب وبدو طبعا دحيم وعبيسة يظربون بواري بسياراتهم ( ددسن 85 وهايلوكس 88) وعلى بالهم يسون لي زفة وفضحونا بسياراتهم ( من زين السيارة اللي عاد انا راكبً فيها ) والقراوى دحيم وعبيسة يحسبون لا صرت في موكب عرس يحقلك تقطع الاشارات وتعاكس في الشوارع وتسب وتلعن في اللي ما يفتح لك الخط 0 انا اصلاً من شفت ضرسة اللي في الواجهة طايح ويقولي توة لبان وانا غاسلً رجلي منة وصلنا للقصر واكيد انة بيكون في حي عبد الله فواد لاني طفران وماني قد قصور الافراح اللي يشمال الدمام زي فرح وطقتها بيعرض اخوي بسيارتة عند المدخل وبيجون يركظون اخوان العروس يفتحون لي الباب ( هين كلها شهرين ويتوطون في بطني ) 0 بنزل وبسمع الخنبقة المعهودة " مبروك مبروك منك المال ومنها العيال " بيجي ابو العروس يسلم على ابوي ثم علي وبيجيون اثنين شايلين مداخن البخور وبيغمتوني بريحتهن واكيد طرف شماغي بيغط داخل الدخنة وبيحترق زي العادة0 مع ها الاجواء الحلوة والريحة الزينة بيهجمون علي الناس ويحبحبوني وبلقى انواع السعابيل على خدودي عقبهم وعقال بيطيح اكثر من مرة وطرف بشتي بيوطونة لين يقلب لونة وكل هذا عادي ومستعد لة0 عقبها بيمسكني ابو العروس مع يدي تقل اني اعمى ماشوف دربي وبياخذني الى الصالة وبيجلسني على البيست ( طلع ديسكو مهوب قصر افراح) بيدهرون المبزرة باالقهوة والواحد منهم لاجا بيصب لي الفنجال بيقعد ينتفض ويرجف من الرهبة ولو هو جالس يصب للعريس ! بيغثوني قهوة وشاهي ومتأكد انة بينكب فنجال قهوة على ثوبي من واحد من ها المبزرة اللي يصبون 0 عادي حصل خير وعقبها كل شوي جايني واحد يسلم ويحبب فيني وابو العروس بيسوي فيها فاهم وبيقولي هذا فلان وهذا علان موش مشكلة بمشيها لة 0 بعدها بيجي دحيم وباقي العيال يستهبلون علي عند ابو زوجتي ويتطنزون علي ويعلقون على شكلي ويضحكون ويستخفون دمهم بس برضو بعديها لهم 0 في اللحظات هذي اخوي بيكون في مطعم ((الشامي)) يشتري لي ولزوجتي عشاء وغالب الظن بيكون مشويات وخلافة ولايهون عصير ابو طبقات 0وبعدين بياخذ العشاء ويودية لشقتي ويحطة في المطبخ بعد ما يغطية بسماط0 في القصر بيقوم ابو العروس ويرفع راسة وكرشتة وبينسف شماغة ويقول بصوت عالي للضيوف " ياالله تفضلو يا جماعة على قل الكلافة العشاء جاهز وهذي والله الساعة المباركة اللي خلتنا نشوف وجيهكم الطيبة 0 بيقوم ابوي ويروح عني بعد ما يسلم علي وبيجي ابو زوجتي وبيوشوش في اذني وبيمسكني مع يدي مرة ثانية ( صار يمون بقوة ) وبياخذني غالباً مع الباب الخلفي للقصر علشان نوصل للغرفة اللي عروستي بتكون جالسة فيها ( سندريلا على غفلة ) 0 طبعاً بتجيني ام الركب وبحس بدوار البحر وحرارتي بترتفع والعرق بيبدا يصبصب 0 وصلنا للغرفة وفتح الباب بعد ان يقول العبارة اللطيفة " يا هيش يا هيش " 0 بينفتح الباب وبيدخل وبيجرني معة ووجهي بيكون لونة ازرق + احمر واتصور انة بيطلع في وجهي لون جديد بس مدري وشو باالضبط 0 بدخل وبلقاء عروستي واقفة ولابسة الثوب الابيض والشرعة على الراس وماسكة باقة ورد بيدها واكيد انها بتكون منزلة راسها " طبعاً هذي اول مرة اشوفها " واكيد انها بتعجبني طبعاً " بنت " 0 المهم جنب المخلوق الرقيق اللي هي عروستي بتكون فية وحدة واقفة جنبها من فصيلة الثديات زينا بس اشباها شرانية وبتناظرني بقرف وودها تخنقني ليش ما ادري هذي هي حماتي ام زوجتي 0 بجي مدرعم وبسلم وبعدين بروح لحماتي واحب راسها والله يعيني على ريحة الحنة اللي براسها 0 بجي عقبها اسلم على زوجتي وبتلخبص مدري احبها والا لا ؟ اخاف احبها ويجلدني ابوها بس الظنة منيب حابها بعدين خخخخخ 0 بيطلعون امها وابوها بعد ما تقعد تقرقر امها با الحتسي اللي ما لامة داعي وهو " حط بنتي في عيونك " وش قالو لس فاتح فندق في عيوني يوم اني احط بنتس فية ؟ والا خذ هذي " ترا بنتي هذي اغلى ما عندي وابيك تحطها بين عيونك " وهي عندها غير ذا البنت خمس وكل ما اعرست وحدة قالت نفس الحتسوة !0 طلعو وصرنا لحالنا انا وزوجتي وبتمر الثواني كنها ايام علينا مغير ساكتين هي تعفط في ثوبها وتكسر اصابعها وانا ماغير اغير شخصية الشماغ مرة انسفة منا ومرة منا والتالية بصك اللطمة 0 بيدخل ابوها علينا ويقول ياالله بتروحون لبيتكم والا بترقدون هنا وهو يضحك ( على بالة ينكت عادل امام على غفلة ) 0 اكيد بضحك وبقهقة مسموعة مجاملة لة هو وكرشتة اللي تقل كيس شعير وبقوم انا وهي بتلبس عباتها وبنطلع لسيارتي واكيد بتكون الكريسدا حقت اخوي بيمدية رجع من المطعم ولبق سيارتة في الكراج وخلا مفتاحها عليها 0 شغلت السيارة وجت بتركب زوجتي وبتجلس ساعة بحلة بعمرها هي وثوبها المنتفش ووردها اللي معها وباالاخير بينصك بابها وبدق الريوس واطلع من القصر 0 متأكد في اللحظة هذي دحيم وباقي العيال بيكونون في سياراتهم وبيلحقوني على بالهم بيصرقعون بي ويبهذلوني ! وبيوقفون جنبي عند الاشارة والله من زين الاشكال اللي يطالع ويضحك علي ودحيم بيزيد على صوت المسجل وبيرقص سامري على بالة اقلاع بس بعطيهم اشكل وبيروحون في حالهم0 عاد حنا مازال الصمت مخيم علينا في السيارة سوا صوت بعيد باالعافية يسمع خارج من سماعات السيارة وكان صوت بشير شنان يغني وصوت المراويس وفلة الحجاج والعالم الله اخوي نسى يطلع الشريط لانة مجنون بشير 0بسوي فيها عاقل وبصك المسجل وبلتفت على المدام لعل وعسى يبدا الكلام بيننا طبعاً ماراح اشوف شي غير السواد وبقول مو مشكلة في البيت نسولف على راحتنا0 وصلنا البيت وفتحت باب الشقة وولعت اللمبات وقلت لها تفضل يا عروسة نورتي بيتك ( اسلوب صح ) وبتدخل بحياء ممزوج بدلع على شوية شطة ( صارت شورما مهيب آدمية ) 0 فصخت العباة ووقفنا في الصالة وريحت العشاء فايحة في كل مكان وخصوص الثوم مع اني بكون محرص على اخوي قلهم بدون ثوم بس ياالله 0 بقوم افرجها على الشقة مع العلم انها قد جتها قبل يوم انها تجيب خلاقينها وعفشها وكا العادة بكون مسوي جرد على كل شي جابتة عقب ما يطلعون من الشقة خخخخخخخخخ بعد الفرجة وبكون اتميلح اثناء الفرجة واحط تعليقات مظحكة محاولً استخفاف ثقل دمي 0 رجعنا للصالة وانتصينا فيها واقفين ! ياربي وش نسوي اللحين ؟ بقول اوووة العشاء نسينا العشاء ههههه وبضحك كذا هههههه ( يا شيني ) بروح للمطبخ اجهز العشاء وفي اللحظة هذي بتتكلم اخيراً وبتقول : آاااا لا لا استرح انا اجهز العشاء 0 بكل تأكيد كل صواميلي بتنحل بعد حتسية ذا وبتنح شوي وبقول : لا والله ما تروحين الليلة ليلتي وبسوي كل شي بنفسي انتي عروس ما تسوين شي انتي بس تآمرين ( آاااة يا مصلحجي لك غرض ) بدربي دميجتي للمطبخ وبكون لين اللحين ما فصخت بشتي من زود الثوارة وقلة الدبرة 0 تعشينا وكني اشوف شكلي وانا اتعشى مسوي نفسي فاهم وآكل با الشوكة والسكين وانواع الحوسة والمطرسة وكل ما جيت امسك شي با الشوكة طارت من صحني واستقرت على فستانها 0 وكني اسمع صوت المماطق اللي بيطلع من اثمي وانا آكل الحمص وبيبقى شوي حمص على اطراف خشتي زي العادة وزين ان ما طال خشمي شي بعد 0 وهي بتآكل اكل نمل ابد بتقعد تقطع من ذا الخبز وتاكلة من زود الحياء ( او يمكن بتحوم تسبدها من طريقة اكلي ) 0 وجا وقت العصير وبشرب ابوة كلة وبقعد اتفنن بشرب آخر قطرة في الكاس با الشفاط وبتطلع ذيك الاصوات المزعجة ( جغغغ غررر جغغغ) 0 الحمد لله عاد العشاء وخلصنا وضفيتة ومعد اشوف قدام عيوني غير شاي بس المشكلة مستحي من البنت0 بس اللي براسة شي بيسوية بقولها اوووة نسيت اوراق مهمة في السيارة وبروح اجيبة بس دقيقة وراجع بطلع لأقرب مطعم وشربلي كأس شاي منعنع وبتفاجأ انها لين اللحين بفستانها ؟ طيب وبعدين ؟ بنقضي الليل وحنا مشخصين بثيابنا انا ببشتي وهي بفستانها بفكر وافكر بطريقة المح فيها لها على انة خلاص عاد يا الله 0 بنقابل التلفزيون شوي وبعدها ببدا اتثاوب ( يعني فيني النوم ) 0 ان كانها ذكية فهمت بس احس ان زوجتي بتكون غبية فعلشان كذا فكرت بطريقة ثانية الا وهي بقول لها " ما ودك ننام " ما فية باالوجة عدل 0 تبي تتلخبص البنت وبيقلب لون وجها لعدة اشكال وبان الاخير بتقول " تونا بدري هذانا نسولف بعدها عاد

[البارق]

زواج سعيد هههههههههههه

[فارس المحقنـي]

مشكور على المرور

تقبل تحياتي

[النـايــــــف]

يعطيك العافيه اخوي فارس

على هذا الموضوع الرائع


وإنشاء الله ينفعني وينفع كل عزوبي


هههههههه


تحياتي لك ،،،،

[كحيلان]

اذا اعرست اعلمكم بالطريق المريحه

[فارس المحقنـي]

هههههه كفو كحيلان

مشكور على المرور


عطرت الصفحة بمرورك

[الذيب العتيبي]

حوسه الشغله كلها حوسه بس لين يجي ذاك اليوم يحلها ألف حلال


شكرا أخوي على موضوعك الحلو

[وحش عتيبه]

[align=center]ههههههههههههههههههههههههههه

يعطيك العافيه يا فارس على الموضوع,,


تحياتي,,[/align]

[فارس المحقنـي]

الذيب شآكر لك مرورك
::

::

::

::
وحش الله يعآفيك
وعسى هالضحكه دايمه

[حمد الحمادي]

مبروك السجن يا المحقني







.