بعض ماقيل من قصايد في الشيخ قاعد الوهاب

[الملكي]

الشيخ قاعد بن قعدان بن عبيد الوهاب وحفيد الفارس المعروف والشاعر الشيخ قاعد بن عليثه الوهاب

احد شيوخ قبيلة الدماسين من العضيان من المزاحمه من الروقه من عتيبه

اسس هو ووالده الشيخ قعدان بن عبيد الوهاب رحمه الله بلده ابوركب كما اسس هجره جديده في منطقه عنز وسماها بروضه الوهاب

وقد عرف بالفزعه والكرم والنخوه والاخلاق واصلاح ذات البين والراي وقد ورث الكثير من الصفات

الحميده من والده رحمه الله له من الابناء سته ابناء اكبرهم ضيف الله والذي هو رئيس مركز ابوركب حاليا كما

يمتلك من الابل ثلاث ذيدان من العفر ومجاهيم وشعل



له العديد من القصايد وقيل فيه الكثير من القصايد ومنها




الشاعر محمد فيحان الحلاج




بديت باسم الله قبـل بـدع الامثـال =وقدام يطـري للهجـوس ادراجـه

ومن عقب هاذي صار للشعر مدخال =مدخال والهاجوس راقـن مزاجـه

نص البيوت اللي على الطيب تنقال = للطيب في الطيب سـواة انبلاجـه

والطير الثلاث بدون شك ولا جدال =في ذمتي ماقـول قـول السماجـه

وياللي تبون العـود الازق وفنجـال = ومعزب للضيف يضحـك حجاجـه

ومشـرع بابـه ولا فيـه مقـفـال=وقولة هلا للضيف غايـة علاجـه

ان اشهـد انـه للمناعيـر مدهـال = مدهال راع الصيت يوضي سراجـه

راعي هلا له عند الاجـواد منـزال == شيخ يميـز مدخلـه مـن خراجـه

قاعد ولـد قعـدان للحمـل شيـال = ربي عطاه الطيب والطيـب تاجـه

من الكرم يمنـاه ماحسـب المـال = فيه الكـرم والديـن زاد اندماجـه

هداج تيماء اللـي يقولـون لا زال = لازال ياربـي مـن الوقـت ناجـه

ومنصاء لمن حده زمانه على الجال = ون كبرت القالـه زهـم بنفراجـه

راسه شجيع معرب الجـد والخـال = يبـدي برايـن مايجيـه انعواجـه

ذخر الامارة ذخر ماضين الافعـال = اللي تبيـن فعولهـم فـي المواجـه

لا جاء نهار فيـه للحـرب عيـال = خصيمهـم ماعـاد يـذري ملاجـه

وتمت بعـد الحـق والحـق ينقـال = واقولها من غير قصـدن وحاجـه

وصلاة ربي عد مـا هـل همـال =على شفيع الخلـق يـوم المواجـه



قصيدة الشاعر عقاب السحيل




ياقاعـد الوهـاب يازبـن الدخيـل==اللي تنصاء حماك يبغا ضلالها

يلقابها بعـد الولـي ظـل ظليـل==يضمن حياته والعدا مـا سالهـا

يامسندي لا جاء للاصايل صهيـل==والسابق ارخا اعنانهـا خيالهـا

واقبل عليه راعي السيف الصقيـل==اللي ليا ناش الرقـاب اغتالهـا

وايقنت باني واقـع بامـر مهيـل==وانا اعزل وعيني تخيل اخيالهـا

اذكرك يا قاعد بها الخطب الجليـل==واقول من لـه عـزوة يلجالهـا

واجر صوتي واعتزي وانا الاصيل==اللي تهـزك عزوتـه لاقالهـا

وعز الله انك تحتمينـي مـا تعيـل==يا مرجح الوزنه علـى مكيالهـا

ابسيفك البتـار واليمنـى الخطيـل==تودع عـداك بحالتـن يرثالهـا

شجاعتك من راس جـد ولا تميـل==عن نخوة اللي يذكرك بهوالهـا

يامفرج كروب العرب راع الجميل==ياعـم راس المرجلـه ياخالهـا

يالوافي اللي جـار بيتـك مايحيـل==يكرم بجيـرة منزلـك لا نالهـا

لانك لبيته من غـذا بيتـك تكيـل==مايبلش بقوت المـره وعيالهـا

يالماجد اللي ما تحـال ولا تحيـل==ياللي مواجيب الخـوي تسعالهـا

ياغايه المجمـول نقـاض الجديـل==اللي ماتنضر فالرجال اشكالهـا

ماتلتفت للاش بالطـرف الكحيـل==وتقول مال الغيد غير ارجالهـا

ياللي تشب النار في خشـم الفتيـل==بقدح زندك ماعسـرك اشعالهـا

يامن عشقت الطايلـه والمستحيـل==ماحدك ومن طيب راسك طالهـا

يامسري العليا وصلت ابـلا دليـل==فاول شبابك ما تثنيـت اعقالهـا

يامنومس عتيبه عسا عمرك طويل==يوم الشـوارب عزهـا لسبالهـا

مسيرتك تحكي حكايه عمـر جيـل==سيرة فخر وانته عقيـد ابطالهـا

ياشهم ياللي كيف راسك ريح هيـل==وادلال المروة شـارب فنجالهـا

يامكرم الظيفـان بالوقـت الهزيـل==يوم البسيطه راد ربي امحالهـا

ماتحط في وسط الصواني غير حيل==يفـداك جالبهـا علـى دلالهـا

وليا نصاك اللي على دينـه كفيـل==والناس عيـت تسعفـه بموالهـا

ما تنشـده كثيـر دينـك او قليـل==تقضيه والحسنه بعشـر امثالهـا

عز الله انك غيث بالمـد الجزيـل==ارخا ثعولـه والسعـد يبرالهـا

براقـه ايلـوح ولرعـاده ظويـل==لله لا يجـاز البشـر بعمالـهـا

لاهلت امزونـه وسالـت بالمسيـل==تطري على مدتك مـن همالهـا

والله تـم والله ماغـيـره وكـيـل==عالم دقـاق نفوسنـا وجلالهـا

ماقلت غير الصدق ماقصدي حصيل==واهل الجزايل ماتغـط اجزالهـا

يا قاعد الله ماخلـق كفـك بخيـل==محكي لها واللي حكـت افعالهـا

لك سمعتن مثل الذهب ماله دخيـل==افخر بها واطرب على موالهـا

واليوم جيتك داخلـي مثـل المليـل==فالكبد حـرة ضرنـي سلالهـا

مهيب ياكحيلان مـن فرقـا خليـل==فالكبد ما حط الهجـر منزالهـا

لا والله مـن الزمـان المستطيـل==اللي همومـه طالنـي غربالهـا

لوعـه غرابيلـه يفوحبهـا الغليـل==يامحزمـي فـال الله ولا فالهـا

بديت عمري غايتي فعلـن جميـل==افخـر بـه وقبيلتـي يحلالهـا

لكن شبيـت وبـدي الهـم الكليـل==فاول حياتي هـل قبـل هلالهـا

ماذاقت عيونـي مـراح ولا مقيـل==على مدى ايـام السنـه وليالهـا

وفالمملكه عيت همومـي لا تزيـل==ولا عاد عندي حيلتن واحتالهـا

ومدام للنومـاس والوقفـه عميـل==اهل الجزيره تذتـري بجبالهـا

جيتك يابو ضيف الله بحملن ثقيـل==يوم الحمول الجايـره لجمالهـا

ماباقين فالحال عنـد عقـاب حيـل==يا شيخ نزل حملتـي واشتالهـا

لاصرت عني ما تحـط ولا تشيـل==من غيرك اللي يرتكـي لثقالهـا

انت الذي عندك دوى القلب العليـل==وانت الوحيد امن البشر يقوالهـا

لد النظر يشيـخ بعقـاب السحيـل==قدام يرمـي غترتـه واعقالهـا

واسلم سلمت ابكل يوم وكـل ليـل==ياللي رقيت من الجبال اطوالهـا






قصيده الشاعر محماس بن شميسان





يابوعلـي قاعـد الوهـاب ياطيبـه=عز الله ان امه اللي جابته جابـت

جابت لها وافـي يوفـي مواجيبـه=عن فكر قاعد علوم الطيب ماغابت

شيخ لكسب العـلا يتعـب مناجيبـه=دعوى مقاديمها شـرواه ماخابـت

حر على الطايلـه يرمـي مخاليبـه=ليا انتهض تبكرا الدعوى ليا شابت

نجم لمع في ضلام الليـل يوضيبـه=تسري سواري النجوم ونجمنا ثابت

وقـت المهمـات نبديبـه ونعديبـه=زومه نفوس الغضب من هيبته هابت

العرف يبتاع بـه قاعـد ويشريبـه=والطيب هو والكرم مع خافقه نابت

ماقلتها ارجي عوضماقلت من جيبه=مير المدايح بمن يعمل لها طابـت

تطيب في مثل ابن قعدان ومصيبـه=ولولاه يزهن المدايح فيه ماصابت

من ماكر الطيـب ثابتـه مجاذيبـه=مواكر عمرت بالمجـد ماسابـت







الشاعر الكبير طلق الحويقل في احد مناسبات الشيخ قاعد الوهاب



يامرحبـا ترحيبـه تـرفـع الــراس=باللـي لفونـا مـن روابـي الجزيـره

ترحيبه تكتـب علـى سطـر قرطـاس=اقولهـا مـن شـان شـوخ العشيـره

عـداد ماتمشـي علـى البيـد الانفـاس=وعد الحجـر وعـداد نبـت الشجيـره

احلى من السكر ليا صـب فـي الكـاس=والا المطـر لاقـام يطـرق غديـره

ياكاسبيـن الطيـب فـي كـل نبـراس=ياهـل المواقـف والبيـوت الكبـيـره

شـوف الوجيـه الطيبـه يبعـد اليـاس=والطيب فـي سمـو النشامـا ذخيـره

يقولهـا الوهـاب مـن فكـر وقـيـاس=قعـدان ابوقاعـد قــوي البصـيـره

رجل كسـب طالـه وشيمـه ونومـاس=ون كان جات صعـاب عنـده يسيـره

خاله وابوه اليا اعتلـوا قـب الافـراس=تفـرح بهـم مـن روعتهـا المغيـره

يثنون في وجه العـداء باشهـب المـاس=وهم مشبعين الذيـب ون حـام طيـره

ون راحت الارياء على الاخماس واسداس=الـراي منـهـم كلـنـا نستشـيـره

الهم مـن البيضـاء محازيـم والبـاس=حصـون مـن دون القبيلـه ستـيـره

ويسلم ولـد قعـدان معـدوم الاجنـاس=طير السعد ون جـت ليالـي عسيـره

قاعد عضيد اللي مـن الوقـت منحـاس=ينقل حموله عنـه لـو هـي ضريـره

ياما عطت يمناها مـن يشـك الافـلاس=مثل البحـر عمـق الجمـام الغزيـره

هيف الجمال اللي تمضـرس تمضـراس=حطـت علـى صنـيـه مستـديـره

شبحه بعيـد وبالوفـاء ماهـو ينقـاس=كبـدن لهدهـا وكبـدن الهـا بريـره

واكـرر الترحيـب مـع كـل مـرواس=بشمر وحرب ومن وصل من مسيـره

وترى التواصل حـق والنـاس بالنـاس=سلم الرجـال اهـل العقـول المنيـره

وصـلاه ربـي عـد ماتثمـر اغـراس=اللـي بعـثـه الله بشـيـره نـذيـره




الشاعر الكبير عيد سمير الحربي



سلام مني على عتيبه هل الطالـه=يضفي عليها من اقصاها لايدناها

على الوعد قاعد الوهـاب جينالـه=شيخ لياقام اله في قالـه انهاهـا

يستاهـل اللـي يجيلـه ويتعنالـه=ويستاهل المدحه اللي في قلناهـا

قاعد لنا يقوم في حاله وفي مالـه=ون جت له ضيوف كرمها وحياها

ولا اكثر الناس لا ماله ولا حالـه=حـي مثـل ناقـه الله وسقياهـا

المرجلـه مـن بغاهـا ماتهيالـه=الا على واحد يتعـب مطاياهـا

ومن لا يحوش المراجل حي يرثاله=اليا توفى تـرى ماهـو بوياهـا

واثني سلامي على عتيبه هل الطاله=يضفي عليها من اقصاها ليدناها






الشاعر عقاب بن عبد الرحمن السحيل





يالله يارحـمـان ويامـنـان ويـافـرد وصـمــد=يامعتلـي فـي قدرتـك عمـا سـواك وياكبـيـر

ياذا الجلال انـت المزيـد لمـن شكـر ولمـن حمـد=ياعالمـن مابالـصـدور وياسمـيـع ويابصـيـر

اسألك تنجينـي وانـا اللـي لغيـر وجهـك ماعبـد=اوالـدي وكـل مسلـم مـن عـذاب اهـل السعيـر

يامـن بسـط سبـع الاراضـي للمخالـيـق بـوتـد=ورفع سماه ابـلا عمـد للخلـق مـن تحتـه تسيـر

من بعدها صلى الله وبارك على اللي من المهدحتى اللحد=طـاهـر بعـثـه الله عـلـى الامــه بـشـيـر

ماخـاب مـن برسالـة محمـد رسـول الله شـهـد=لـو امـة المليـار تـال الوقـت واقعهـم مـريـر

يسـب قايدهـم وقدوتـهـم بـعـد طــب اللـحـد=ولاغيرو ساكـن دخيـل الله مـن بئـس المصيـر

قلـب العـرب دمـه بـرد لاوالله الا قــل جـمـد=واهل الكراسـي مـادرو بـأن الكراسـي تستديـر

مبغـا اتكـلـم بالسيـاسـه مـاوراهـا الا النـكـد=مدام فكري هاض عن نظـم الشعـر مالـي مطيـر

هيضنـي اللـي جعـل عينـه ياجمـاعـه للـرمـد=من بعد ماصـار الـه مكتـب دون بابـه سكرتيـر

جيـت المديـر اللـي لـزوم انـه يشـوف المستنـد=قلت السلام ولا وقف يابـو سعـد وضعـه خطيـر

يبغانـي اسـلـم علـيـه وهــو قـاعـد ياحـمـد=اهـب وانـا راعـي العشـواء عشانـنـه مـديـر

يومنـه فـوق الكرسـي اللـي دونـه الماصـه قعـد=يابو سعد هو يحسبنـه صـار مثـل الظيـط اميـر

والله لونـه قـاعـد الـوهـاب مـحـزام السـعـد=عشـان تسليمـي عليـه وهـو قاعـد مايضـيـر

علـى الاقـل لقاعـد الـوهـاب سـيـره فالبـلـد=من دون منصـب هيبتـه فيهـا نجـات المستجيـر

شيخـن بذكـره ينعـرف ماتجهلـه يـابـو سـعـد=عز الخوي والضيـف ريفـن للعوانـي والقصيـر

راع الكـرم راع الوفـاء سقـم العـدا حـر الـهـدد=راع المقـام اللـي بجاهـه لابـدا جاهـه كبـيـر

ابنـشـدك وابــا اسـألـك بالله قـلـي يـاولــد=مـن يجهلـه فالمملكـه عـز الغنـاوي والفقـيـر

اكبـر مثـل بـأن الرجـل مايرفعـه منصـب ابـد=قاعد بذكره مـع هـل الطـالات زاد عـن الوزيـر

مفعـول هيبـت منصـب الرجـال لاكـبـه فـسـد=ياهل الكراسـي والمناصـب ماعلـى الدنيـا قريـر

واسلـم سلمـت وجـاك قافـي ياحمـد يابـو سعـد=يومن جاني علم بأنـك شاعـر وهـاض الضميـر



الشاعر الشيخ نواف بن رازن






يا راكبن بنـزن جديـدن طـرازه=بديه من الفولاذ والصلب منحـوت

آخر موديل ولا نقص فيـه عـازه=من وارد الالمان بوراق وكـروت

جاين طلب ومهندس الصنف أجازه=تعمى عيون أهل الحسد عنه وتموت

ليا تلـه السايـق وشغـل جهـازه=ما يغبط اللي مالكٍن قصرمريـوت

وليا نهض صـدره وزان امتيـازه=اسرع من اللي بالفضا تسبق الصوت

عليه قرمٍن حـر صعـب مـرازه=عاقل ومن ناسٍن لهم سمت وبخوت

ملفاك بيتن كبـر أبـان ارتكـازه=وبه مجلسن ما فيه شامت ومشموت

بيت لشيخنٍ تـاج الأمجـاد حـازه=صميدعنٍ من شجرة الطيب منعوت

بانيـه قاعـد ليـن كمـل نجـازه=وعمار يا دارٍ على الطيب مثبوت

وعطه الكتاب اللي نسجته علـى آزه=مثايلن منـي جزيـلات وبيـوت

وبلغ سلامـي واشهـره بعتـزازه=سلامٍ أغلى من ذهب حص ياقوت

والذ من ذوب العسل فـي حجـازه=وأحلى من السكر على زاكي التوت

ثم قل لبو شـارع بكـل اعتـزازه=الله من همن بالضـلاع مكبـوت

قلبي تصرم مثـل صـرم القـزازه=وعانيت ما عانا العواجي على نوت

علـى وليفـن هـز قلبـي ورازه=ولاعاد نفسي تقبل الزاد والقـوت

اقفا وجاء بالصدر عقبـه حـزازه=هز المدافع في جنوبـي بيـروت

أبعد من البصرة اعن اقصى المحازه=ومن دونها ضلعان وسهول وخبوت

ولا همني بعـد الديـار وغـرازه=همي زمانن كنه السيف مصلـوت

وقتن تسـاوى فيـه حـره وبـازه=والحر يشكي الضيم والريش محتوت

والذيب جر اعواه والنيـص هـازه=ما فيه غير اعواه والعالم سكـوت

واخترت رايك وانت رايك مفـازه=يا عز من جالك من الوقت مبهوت

والقول نعرف معربه مـن مجـازه=وهذا صحيح القول والكذب ممقوت




الشاعر بدر الوهاطي المطيري






ياقاعد الوهاب انا ويش ابـا اقـول=الرجل عيت لا تـروح وتسجـي

والقلب من كثر الهواجيس ماسـول=والعين من نثر العبايـر تبيجـي

على عشير صرت يافهيـد متلـول=عشرة وفاء ماهو ضغيف يدجـي

قاعد ولد قعدان لـو يكثـر القـول=يكفيك عن كثـر الكـلام التلجـي

قوله هلا لضيف ياخـذ بهـا دول=ومداخن بالعـود الازرق تبجـي

وابوه في تاج الفخر صار محمـول=صدق وفاء لو المعـادي يحجـي

وجدة ليا من الطلب حل في الشـول=وصاح المصيح واكثر البوش هجي

وطال النهار وصار عازل ومعزول=وجاء لرمك ضبضاب كون وعجي

سج وسهج عده على الموت مرسول=يمناه من ضرب المجـوخ تبجـي

وانا مطيري وارفع الراس بالقـول=مانيب مسكيـن جـداه الترجـي





قصيدة مهداه لشيخ / قاعد الوهاب


ياقاعد الوهاب جينا على شان == تقديرلك ماهو بشان العزيمه

وحنا ليا شفنا طويلين الايمان == نتعبلهم ولهم معزة وقيمه

ومشوارنا هذاه الك ياكحيلان == ماهوب من شان الاكل والوليمه

ولوربعنا سوى سوات ابن قعدان == مافية احد يخطي وياخذ قسيمه

وقاعد بطيبه نعم في كل الافنان==في كل موقف مايخصمه خصيمه

من ربعتن يوم المواقيف شجعان ==الذكر طيب والفعايل مقيمه

وقاعد ذخيرتهم وهو طير حوران == الرجل وافي ماحصله هزيمه

لياجيت قاعد رضت لو كان عجلان==واقلط ولنت بقالطن في وكيمه

تلقى علوم مبرية كل حزنان ==والعود الازرق في المباني العضيمه

معه الشحم من حشو وذناب خرفان == وهوه وربعه في الملافي كريمه

وهيلن حبش والبن بدلال رسلان == تروي كبود من ضرمها محيمه

وحضن يحوش احلاة ماهوب خسران == اقولها بصدق ماهي ضليمه

وسبعين نعم نسوقها لبن قعدان == من عندنا تعرف عليها الوسيمه

من الاد عاضي موفية كل ميزان == حمايه الميقاف ولهم قديمه




الشاعر

راشد بن مسعد العازمي








قصيدة الشاعر فواز حنيف بن مهرس فـي الشيخ/ قـاعـد الـوهـاب






البارحـه دق بـي هـنـداب=خطر ٍ على الرجل لا صابه

دليـل عطنـي قلـم وكتـاب=وأنـا زبـونـه وكتّـابـه

سـلام يـا قاعـد الـوهّـاب=يـا مثبـت حـدود وهّابـه

يالشبـل يالحـر يالمعطـاب=يامتعـب ٍ مـن تهقـوابـه

مبداه فـي عالـي المرقـاب=ومالي من الصيـد مخلابـه

ضرس ليا عض ضرس وناب=أقوى من طويق واهضابـه

حلحيـل حـلال للانـشـاب=وعـداه تخشـاه وتهـابـه

ياليت نجم ٍ طلـع مـا غـاب=وليت السبـع خلّـف اذيابـه

ولا ياولد مـن يفـك البـاب=طول الدهـر فاتـح ٍ بابـه

وحجاج يضحك وحسن ألبـاب=والكيـف والطيـب يعدابـه

وجلوبـت الشـاوي الجـلاب=شـراه مـن عنـد جلابـه

شراه بأغلى الثمن مـا هـاب=جابـه للضيفـه وهـلابـه

رحـب وعاداتـه الترحـاب=يا جعلني ما أسمـع اغيابـه

وعيال عمـك ذرا وحجـاب=تلطـم علـى العـد شرّابـه

درعك ليا مـن كـل ٍ غـاب=ضـد السهـوم وتـذرابـه

وأنـا ليـا عـدت الانسـاب=أنـا أحمـد الله مـن لابـه

من لابـة ٍ توكـد المضـراب=في السلم والحـرب حرّابـه

حرّث هل الموقف الغصّـاب=مـا نعطـي الحـق طلابـه

بحد النمش نقطـع الارقـاب=ويموت من ربعـي اسبابـه

حريبنـا ينطـل الاســلاب=من خوفنـا ينطـل اسلابـه

ودخيلنـا بعالـي المـرقـاب=سنـة ولا احـد يتهمقـابـه

وستيـن يـوم وادق حسـاب=وثلاثـة ٍ عـنـد هـرّابـه

والضيف ياخذ ثلاث اوجـاب=في البيـت وانكـرّم اشنابـه

بيت ٍ تقـل مجـزرة قصّـاب=وانكـرّمـه وانتحـفـوابـه

وقصيرنا فـي ذرا وحجـاب=في اللازمة نحسـب اقرابـه

والبارحـه دق بـي هنـداب=خطر ٍ على الرجل لاصابـه


الشاعر عوض بن مبارك ال عيد





يالله عسى غر المـزون المحاميـل=تسقي هضاب اجله وذاك الحمادي

تمطر عليها صادقـات المخاييـل=بامرك يامنشي الغيث رب العبادي

وتنصب منها مضلمـات الهماليـل=ويسيل منهـا كـل تلعـه ووادي

وليا نشف سيل يعلـه بعـد سيـل=حيث ان لي في هضبه اجله مبادي

عديت فيها والعصر يقهـر الليـل=قبل الغروب ودق بالفكر حـادي

ومديت شوفي يمه الجدي تفصيـل=وشفت القليب اللي هجرها البوادي

اللي عليها عـدة اشجـار ونخيـل=ويشوبها هجر الاهـل والبعـادي

وذكرت اهلها اهل الفعول المشاكيل=اللي لهم مجد علـى المجـد زادي

اهل الكرم واهل الوفاء واهل الخيل=واهل الفعل يوم الوغى والطرادي

واهـل بيـوت للنشامـى مداهيـل=ليا شح نذل بخيل وان شـح زادي

يلقون فيها الهيل والقـرح الحيـل=وقوله هلا تسبق سـلام المنـادي

اقصد بها الوهاب قـرم الرياجيـل=قعـدان ابوقاعـد كـلام وكـادي

وقاعد رفيع الذكر ريـف المقاليـل=حكيم راي من الوجيـه البـوادي

عرفي لهم ذكر لمـع كنـه سهيـل=والذكر خلانا نعـرف المهـادي

سوالف تنقـل لجيـل بعـد جيـل=وذكر الحيا والطيب كالنور بادي

ولا قلتها ارجي من وراها محاصيل=ولا لي ورا ماقلت شف ومـرادي


الشاعر فرح هذال المطيري






الله من قلـب مـن الهـم داوي=وقلب يجيـه الهـم واعزتيلـه

اداري الافكار سارح وضـاوي=ولاعاد اللي في عسر الايام حيله

انا اليا كثـرت علـى الدعـاوي=ارهي على الطيب بكل الوسيله

عز الله انـي للمساييـر نـاوي=واللي يبى المسيار دعوا سبيلـه

ابنطـح اللـي مدهـل للفـداوي=قاعد لياعـدت شيـوخ القبيلـه

شيال حمل اللي عن الحمل ثاوي=مثل الجمل ماحط فوقه يشيلـه

الصيرمي نسل الحرار النـداوي=صيده من الجزلات ماهي هزيله

كفه على بذل الجميلـه رهـاوي=يمنى تمد الجود ماهـي بخيلـه

اعرف هل العادات ماني بغاوي=ولا الردي لو يعترض ما نجيله

ذكر الحيا والطيبيـن متسـاوي=والطيب في وجيه النشاما دليله

من روس ربعن تنعرف بلعزاوي=عضيان حماية عقـاب الدبيلـه

ان جاء نهار فيـه رد البـراوي=رد البراء بين العميل وعميلـه

هذا كتابي مـع سـلام شفـاوي=عشرة بيوت مانباهـا طويلـه




الشاعر زيد بن مبشر الحثل





قاعد قعـد لطيـب ليـن استحلـه=كلمه نعم يملا بها الصاع ويزود

المـدح بـه يقبـل وهـوقـابلله=له بالوفاء من اهل الوفا جمله شهود

ماقولهـا طامـع ولا هـي مذلـه=ولاحدن بمدحه ملحق زيد منقـود

الا ضعيـف ذكـر طيبـه يملـه=حتى غدى قلبه مثل جمرة العـود

ماهمنـي غيضـه ولا حاسبـلـه=بيني وبينه باب نجـواه مسـدود

ابمدح الطيـب علـى كـل ملـه=والله مالي من ورى المدح مقصود

الطيب بـن قعـدان تاجـه ودلـه=زوره وتلقى ماذكرنـاه موجـود

لبا جيت سايقك الزعل قـال خلـه=كلمه هلا يشفي بها جوف ملهـود

عندي ترى اسمه يالنشامـا مدلـه=يدله اللي من عنى الوقت مضهود

اقـول واقابـل بـكـل الادلــه=فيه الكرم موجود والبخل مفقـود

ذكر بناء في مرقـب المجـد فلـه=واصبح مدله من معاديه محسـود

لو الجبـل ينـزاح يبقـى محلـه=تولد معه مولود وترافقـه عـود

والقـل مايقصـر يديـن المقلـه=وراع الكرم من خالق الكون موعود

طيـب النبـاء ومقابـل ماتملـه=لا قام بالواجب بذل كل مجهـود

الرجل تشهد له صحايـف سجلـه=ذكره دليله دون ناشـد ومنشـود




الشاعر ذيب عبدالعالي الثعلي





مبداي باسم الواحـد الرحمانـي=الخافض الرافع عزيز الشانـي

اللي بسط سبع وثبـت اوتادهـا=وسبع رفعهنـه بـلا عمدانـي

ومن عقب ذكرالله نضمت المثايل=سوات نضم الولو والمرجانـي

فلـي يشـرف ويرفـع راسـي=ذكره نهارا تذكـر الشيخانـي

قاعد عسى الله ما يعجـل باجلـه=ريف الضعيف ومزبن للجانـي

ماهو مثبـور قصـار بتوعـه=حصان في الميقاف وابن حصاني

الطيب طبعه ورث ابـوه وجـده=من ماضي الايـام والازمانـي

دماسين قـوم ماحـدن يجهلهـم=عز الصديق وسقـم للعدوانـي

فكاكه الابل من جمـوع عداهـا=لا ثار عج الخيل في الميدانـي

اقول قول الصدق واللي يزعـل=يضرب براسه شامخ الضلعاني

ياقاعد الوهـاب مسنـد راسـي=من المحاني جيت يمك عانـي

حيث انت منصى من زمانه حده=اليا كشر وجه الزمان وشانـي

تعطي ولا ترجي من اللي تعطي=الا من اللـي كـون الكوانـي

وانا تحدانـي زمانـي وحدنـي=فرحوا اعدايه وازعلوا صدقاني

جيتك ومثلـك مايخيـب ضنـي=والضفر ناجي والكريم معانـي

الامل في الله ثـم فيـك ومثلـك=والله على الرديـان لا يحدانـي

بشر عساك بكل بخيـر مبشـر=ومن كل شر يجيرك الرحماني







الشاعر نايف بن عبدالله الحربي






ياعيـد عينـي لاتحالـت هجوعـهـا==ياقف لهـا دون الكـرى مايلوعهـا

ليـا سرقهـا النـوم ساعـه تنبـهـت=تبقـى عليهـا ليـن يكمـل سبوعهـا

يسوقها ماسـاق فـي خافـي الحشـا=هم تضمـه مهجتـي فـي ضلوعهـا

اسهـر وينعـم بالكـرا خالـي المـلا=علـى بقعـاء صايـلات جموعـهـا

اسرح مع هجـوس تضيقبـي الفضـاء=ومشاكـلا مايـدرك الطـب نوعهـا

مضيت خمس سنيـن مابديـت علتـي=ليا ما بحور اليـاس طبيـت قوعهـا

ليابغيت اعـوم واطلـع مـن الـدرك=وروحي هدى من عقب الاحراج روعها

تزفنـي مـع غبـت المـوج عوبـاء=عميـا بصايرهـا وصـم اسموعهـا

خداعـه بقفايهـا تبـحـث الخـفـاء=ماهبلك ياللي جاهـل فـي طبوعهـا

خذ كلمـه اللـي قـد صفتلـه وباقتـه=اليـوم يشريهـا عقـب مايبوعـهـا

من عقب ماتسقيه من صافـي العسـل=يشرب قراطيـع المـرار ويزوعهـا

ليـا قـال ساقتلـي هواهـا وسانعـت=صكت حواجبهـا ومالـت سنوعهـا

في حملها مـع جرهـد البيـد ساقتـه=يمشي مثل مشـي البليهـي يطوعهـا

لين اجدعت فـي سبـع القـاع غبتـه=وعضت به الضلفه ونادى افزوعهـا

واسند علـى شيـخ شريفـه مواقفـه=بـروج المعالـي مايكـودة طلوعهـا

قاعد رفيع الجـاة والصيـت والنسـب=من شجـرة بالهيـل تثمـر فروعهـا

عتيبـه الهيـلا هـل الطيـب والثنـاء=قبيلـة حسـن المكـارم طبوعـهـا

وترى المثل قد قال من طـاب ينصـاء=مثل الحيا طاريـه يجـذب نجوعهـا

وانـا علـى ذكـرة نصيتـه بقالـتـي=ولا يشيل قـالات القنـا الا دروعهـا

سقت النضاء ناصيه في حملة النضـاء=منصـاي نـادر مانصينـا تبوعـهـا

قـدام بيـت الشيـخ نوخـت فاطـري=من الثقايـل زورهـا طـق كوعهـا

وناديـت يالوهـاب يـا معـدن النقـاء=اسـم بـه الهقـوة تحقـق رموعهـا

تـورد المـاء حايـم الكبـد فزعـتـه=ليا كنه الجـوزى وقفـت رجوعهـا

من لاذبه شاف الفرج عقـب حرجتـه=وخلص نشب نفسه وولـع شموعهـا

هو مسند اللـي غبـر الايـام ضدتـه=وناشه من ضروس المنيه قضوعهـا

يامعـرب الجديـن مضمـون غايتـي=اللي على روس الاصابـع ربوعهـا





قصيدة الشاعر سويلم بن عيسان في الشيخ قاعد الوهاب


ياهل الجمس لاتقفلون الباب*** نزلوا فالقزازه على شاني
سلمولي على قاعد الوهاب*** كانكم ياهل اجمس عتباني
سلمولي على مورد الهياب*** عن سميه تراه بن قعداني
يوم كلن تمرجل بصك تراب*** مانفعني فلان الفلاناني

وكذالك قصيدة فيحان بن نشار

ياليت في نشوة الروقه**** خمسه مثل قاعد الوهاب
الشيخ ماتوخذ حقوقه **** ينفعك لوهو من الاجناب





الشاعر الشيخ مناحي بن صلال الهيضل


شريتلي جيبا من السلم شارية == يقضى اللوازم من بلاد لديرة

والشف ياقاعد عرفته ونبغية == في يمة القبلة تراها بديرة

واللي يبينا ينحر البيت ويجية == ومن كان لة لازم عساها سفيرة

والسيل بالوادي مشاء مع مجارية == وسيل الفحل ماينعدل عن مسيرة

والحر يقنا من مواكر مجانية == واليا طلع خلى الحباري حشيرة

والرجل ماودك يعلم بطارية == واليا مشاء في الدرب يخفى السريرة

ياباذل المعروف والحق تعطية == تعيش في دنياك مابة قصيرة

اشرة على اللي بينات شوارية == يرسي كما ترسي بحور الجزيرة

هات القلم نكتب كلاما لقارية == احلا من الماء من سحاب المطيرة

يحاملين الخط قاعد ملافية == انا اشهد انة من شيوخ العشيرة

واختم كلامي في صلاة نصليه == على نبي الحق منجي جويرة




قصيده مهداه لشيخ قاعد الوهاب




سلام نبدابة على كل مرقاب == مرقاب يجلي عني الهم ويريح

من هاجس ناره نلهب تلهاب == وهمومه اللي ياردنه مشاويح

ياشيخ مال الوافيه عنك مجناب == ياعز من هو يرفع الصوت ويصيح

قاعد لياعدوا ستر خدر الاهداب == عد الروى مانته بعيد الضحاضيح

ياريف ربعك والقبيلة والاجناب == مقر مدح وزاهيتك التماديح

يهدى عليك من المشاعر والاعجاب == هيض النفوس اللي مايحتاج تنقيح

العلم يالوهاب واحسب له حساب == للمجد ناس وللمواقف مفاتيح

للطيب باب وللفقر والغنى باب == وللضيق فزعات الرجال الزحازيح

والادمي يمشي تحت حكم الاسباب == والعالم الله والليالي مراجيح

والحي لامنه عن المرجلة غاب == يقصر عن علوم الرجال الطحاطيح

ان مالبس مثلك على هامته كاب == بقرح كانه عاش وان مات بقريح

واسلم وبلغلي عريبين الانساب == تحية عد النجوم المدابيح

اللي لهم بالطيب وقفات مرقاب == ومدلهين اهل القلوب المجاريح

ياطيب اهل سمحات لاكشر الناب == ماعاش من فيهم يدور مرابيح

بالضيق عادتهم يفكون الانشاب == وملوحين بنخوة الطيب تلويح

والمدح لاقلته بعكفان الاشناب == تاج الشعر مدح الوجيه المفاليح

بمشاهدك تنزال ضيقات وصعاب == وفي فزعتك توضي بوجهي مصابيح

ماتقدم اعذارك ليا جاك منصاب == لايا بعد من نرفعه فوق ويطيح

عن من بغاك بشي ماتسكر الباب == دايم معودنا على هبه الريح

واقع زمان فيه صادق وكذاب == مثل البحر كم مات به من سوابيح

حر وبراد وضيق وسيوف وحراب == شي صحيح وشي يحتاج تصحيح

داب ورى داب وداب ورى داب == وناس تهل دموع مثل التماسيح

دنيا توالت تقلع الضرس والناب == ومكارم الاخلاق مثل التباريح

ورث السلف عند الخلف للهوى الهاب == يكود من يفرق عن العاذر الشيح

والمتعظ محسوب من ضمن ا لالباب == والا المجرب ساد لو عاكس الريح

ومن لا وقف لاقراب واصحاب واجناب == يارد على ميراد ورده مشانيح

ولانام من حط المراجل له كتاب == من خوف لايطمر له سطور ويطيح

هذا وانا الي يمة الشيخ جذاب == داع به صدور النشاما مشاريح

قرايح غر رفيعات واسناب == فيهن لبن قعدان دين الفلاليح

طيبك ملبسني على ثوبي اثياب == ياصعب مرقى النايفات اللواليح

الشاعر الكبير صباح قعيد الضفيري








سلام يارجـل لـه الطيـب عنـوان == رجل فعولـه فـي زمانـه مكيـده


كل الخصال الطيبه جات في انسـان == ياجعـل ربـي بالسعـادة يـزيـدة


ترفع له البيضاء على مر الازمـان == ويعيش طول العمر عيشـه سعيـده


ان اشهد ان الطيب لك يابـو قعـدان == مـادام طيـب الجـد ورث الحفيـدة


قاعد عريب الاصل من روس عضيان == شهم على الطـالات ماتقصـر ايـده


من لابـه يـوم الملاقـى بالاكـوان == ترسي كما ترسى الجبـال المشيـده


الطيب دولة وانـت لطيـب سلطـان == حكمتهـا بفعـول يمنـى حمـيـدة


باسمي واسم ربعي نصيتك على شان == ماخاب رجل صـار قاعـد عضيـده


تكفى نصيتك يابـن عمـي كحيـلان == في لازمـن تقـدر عليـة وتجيـدة


وقفتـك والله ماتـقـدر بالاثـمـان == ولك شيختن في الوقت ماهي جديـده


تكفى وحملي زاد من فوق الامتـان == ويمنى بـلا يسـرا تراهـا وحيـده


ينخاك شبل مـن جماعتـك نشبـان == ويشكي من هموم الزمـان الشديـده


جيت اطلب الفزعه ولا جيت طمعـان == ودمي نشف ياشيـخ داخـل وريـده


انخـاك مافيهـا مذلـه ونقـصـان == وراع الحمـايـا كلبـونـا نـريـده


في الوقت انا وياك ياقاعـد اخـوان == لي حق وانته لـك حقـوق عديـده


لك فزعتن تروي ضما كل عطشـان == وياشيخنـا فزعتـك ماهـي بعيـده


ذكرك بقولـه نعـم ياشيـخ مليـان == ولا النعـم ماكـل واحـد يصـيـده


واخذ الكلام اللـي موثـق برهـان == عـز الله انـك يـا سندنـا وليـده


الله يبيـض وجـه قاعـد بليـهـان == ويحفضة رب معتنـي فـي عبيـده


والكـم هذاتقديـر منـي وعرفـان == ياللي على العليـا خطاكـم وكيـده


هذا كلام صدق مـن قلـب ولسـان == ماهو مجامل في سطـور الجريـده


وابي اختصر شعري على كم قيفـان == لو كان في مدحـك تطيـع القصيـده


وختامها عنبـر ومسـك وريحـان == متجمعه مـن كـل حاجـه فريـده






الشاعر الكبير / تركي بن نجم بن ثعلي



هذا ولكم فائف احترامي