ياقاصد خير حياك الله بين اخوانك الاعضاء وانا بالنيابة عن اخوي عبدالله وهذا ليس نقص فيه ولكن عبدالله اراد لك الخير ولكن انت اصريت وانا الحين ابي ابين لك
وعندي نصيحة ياليت تسمعها وابعلمك ببعض بحور الشعر
بعد النصيحة
انصحك اخوي انك تقرا قصايدالشعراء الكبار بكثرة وباستمرار
ثانيا استمع دائما للاشرطة الشعرية وايضا للشعراء الكبار
ثالثا انت بنفسك تستطيع وزن قصيدتك اما عن طريق التلحين وارى ان التلحين ليس في كل القصايد بل بعضها وكذلك ابي انبهك على شي قاله لي الشاعر الكبير خلف بن هذال شخصيا عند مشاركتي في امسيات مهرجان الجنادرية سابقا
قال لي بيت الشعر مثل طعس النفود اذا كنت تمشي في خط صحراوي وجاك هالطعس اكيد انك تعرف ان البيت مش موزون
لان يكون فيه طلوع ونزول وانت بالتالي ترجع وتصيغ البيت بمفردة سهلة وترجع تقراه هل راح الثقل او لا وهكذا على هذ المنوال
وابعطيك نبذة عن بحور الشعر ليس الكل بل البعض
عندك
1/ بحر التفعيلة وهذا بحر صعب جدا ويبغاله تمرس وخبرة كافية فالشعرمثل( راجع قصائد الامير بدر بن عبدالمحسن)
2/بحر المسحوب وينقسم الى قسمين
مسحوب طويل ومسحوب قصير
3/ بحرالهجيني وهذا من ابسط البحور واكثر القصايد اللي تسمعها اوتقراها هي على هذا البحر
وفيه من البحور مالا حصر لها وكل يوم يطلع بحر جديد لكن اسمع نصيحة اخوك عبدالله ولاتشغل افكارك بالبحور الصعبة
تحياتي لك واتمنى انك استفدت من هذي المعلومة البسيطة
واترك المجال لاخواني الاعضاء
اخوك/ نايف بن فانك المرشدي