:::: (( مجموعة ألغـاااز العطـاااوي )) ::::

[{ أبوفيصل }]

ياويش حيٍّ يعجب الناس بإسمه
لو كان ما هو قد لإسمه وطاريه

إليا عكست إسمه هذا صغر جسمه
يا شين حظ اللي قرا عند أذانيه

[{ أبوفيصل }]

ويش رجلٍٍ معترض عرض الطريق
مرَّ به رجال... حاكم ... معتبر

يوم جاء للتصفيه صفَّى فريق
طلَّع اللي.. مايِشَدّ ابه.. الظهر

يَبْست الأرياق من ريقٍٍ لِريق
والمهابه تِخلِف إقلوب البشر

[{ أبوفيصل }]

يا ويش بنتٍٍ زوجوها بشايب
ماتفرقه دايم في جنبه قريبه

لو فارِق العمر ما يرد القرايب
مزيونةٍٍ في عين أهلها عجيبه

مازوجوها جبر والا غصايب
لاكن لو يدخل عليها مصيبه

[{ أبوفيصل }]

ياويش بنتٍٍ ما تثمَّن بالأثمان
ان جات تسكن ماتحرك شفايفك

ما مثلها بالكون كله والأزمان
من خفها ترفع خفايا خفايفك

[{ أبوفيصل }]

يا هِوات .. اللغز .. للغز وزنَه
ان كان للميزان والوزن وازن

العاشقين إثنين مازن ومزنه
واحلا علاقه بين مزنه ومازن

كلاًً على مخزون فكره وخزنه
إمكملين ال بعضهم بالتوازن

[{ أبوفيصل }]

ياويش بنتٍٍ ناقصٍٍ جسمها شي
لو ما به أحدٍٍ ماخذٍٍ من جسدها

الأم هي بالإسم تنسب لها.. هِي
لليوم تِنسب بإسمها هي وحدها

[{ أبوفيصل }]

انشدك عن رجال يضعف ويهزل
ولْيا مضى له عام يرجع فِتوَّه

ياطا ثلاث ويِكْرِم النَّزْل ويَجزِل
و بهيبته ....... يمرهن ما تِموّه

ماهوب في مهْجر ومنئَآ ومعزل
لو كان عمره.. قبل عصر النبوّه

[{ أبوفيصل }]

يا ويش رجلٍٍ كلّ منا يشوفه
والناس من واجبهم يقدرونه

الشهم واللي فيه خير ومروفه
حتى ترى الوافين ما يجهلونه

في جانبه بنتٍٍ تبيِّن وصوفه
دايم وهي حوله على ساق دونه