كان الفارس الشهير فهيد الفواري من العمود من شمر من اهل الجزيرة بالعراق فقد سمع عن عقاب العواجي ومافعله في شمر وجاء من الجزيرة رغبة منه في مقابلت عقاب والانتقام منه .
واول ماوصل كان مجيئه على اهل فيد شرق مدينة حايل وقد كان عقاب يأخذ عليهم الاخاوة
فــ سأل فهيد الفواري الحاضرين عن احوالهم كماهي العادة في تبادل السلام واثناء تبادل السلام قام شايب كبير من شمر لا اعرف اسمه
وقال هذه الابيات بدل مراد السلام****
ان كان تنشدني عن الحال يا فهيد = حزين لا جرا لك اللي جرا لي****
باكر يجينا عقاب ينزل على فيد = ولا عندنا اللي للسبايا يوالي****
تولموا يا اهل البقر والمعاويد = كلن على معيده يسوق الريالي****
اخاوة لو به علينا مناقيد = فرضت علينا من بعيد المدالي****
ثم رحل فهيد الفواري الى ديار ولد سليمان غرب حايل واصرعلى ان يقابل عقاب ويقال انه قد نصحوه بعض عقلاء شمر عن مقابلة عقاب ورفض
وكان هناك منطقة خطرة بين القبيلتين وفي نفس الوقت خصبة مراعيها ووفيرة فقام فهيد الفواري بــ توجيه ابله الى هذه المنطقة والتي تقع غرب ريع المغني جنوب فيضة ابن سويلم 7 كم تقريباً وتسمى ابواعة والمصيد .
ثم قال فهيد الفواري هذه القصيدة.
انا من العصـلان واصلـي عريبـي = علي بالقفر المطـرّف الـى هيـب****
قالوا ابواعـة والمصيّـد خصيبـي = تعكفت جرع المصيّـد مـن الطيـب****
وانا على اللـي كنهـا راس ذيبـي = اكحيلة(ن) من محكمـات المجاذيـب****
انطح عليها كـل ليـث(ن) مريبـي = واثني عليها دون زمـل الرعابيـب****
عابينهـا لـمـدرّع(ن) مايهيـبـي = ان حل ضرب(ن) بالسيوف المحاديب****
تلاوحوا من فوق شهـب السبيبـي = خيل(ن) تطارد دون حرش العراقيب****
صاح الصياح وحان ثـار المغيبـي = وتسابقـن ريـع المغنـي جناديـب****
شهب(ن) عليهن مهزمين الحريبـي = اللي على جمـع المعـادي مهاذيـب****
وقد شاهده عقاب العواجي وانقض عليه وحصل بينهم كر وفر وحاول عقاب اللحاق بالفواري الا ان فرس الفواري كانت سريع فصاح عقاب ثم اخمرت فرس الفواري وترجل الفواري على الارض مستسلم لعقاب وقد اسره عقاب ثم عفا عنه وذلك من فعل الرجال الكرما وفهيد الفواري يستحق ذلك لانه جاء على وضح النقاء وليسى مثل الجبناء الذين يعاقبون القوم ويتسرقون من خلفهم وقال عقاب للفواري الفرس والابل لنا والزمل خذه تشيل ابوك عليه اذا رحلوا شمرحتى لايبقى على الدار(المراح) وهذا ايضا من فعل الطيبين والكرماء وقد روح الفواري مامعه غير الزمل ثم سئله والده وين البل؟
فقال فهيد الفواري الابل اخذها الولد اللي يستاهلها فقال والده اخس ذلك سمي الطير فرد على والده بهذه الابيات****
يابـوي يازبـن الجـواد الهزيلـه = ان حل عند اقطيّهن ضرب مسنـون****
ان جاء نهار(ن) مظلم(ن) مثل ليلـه = ياملحـق اللـي بالمعـارة يخلـون****
الديرة اللي اخمـرت بـه الكحيلـه = والله ماتسوى عندنا شرب غليـون****
ما اقعد بهـا ياوالـدي ربـع ليلـه = ماهي لنا ديرة عقاب(ن) وسعـدون****
دونه عقاب الخيـل يلمـع صقيلـه = كم فارس(ن) من حربته طاح مطعون****
وحيـاة منشـي المـزون المخيلـه = ان الجزيـرة مـا لنـا دونهـا دون****
الديرة اللي اخمـرت بـه الكحيلـه = والله ماتسوى عندنا شرب غليـون****
وذلك اعتراف من فهيد الفواري
ثم بعد ذالك قال سعدون العواجي هذه القصيدة مفتخر بفعل ابنه عقاب****
عقاب حق الطلع من راس مرقـاب = خم الفواري يـوم مـاح الجناحيـن****
جلاّه من نجد(ن) على غير ماطـاب = وقبله عثا بجموع قـوم(ن) قوييـن****
له مخلب(ن) مايقدره كـل مخـلاب = ليث الليـوث الهايجـة بالاكاويـن****
نجمه طلع وفهيد نجمه عنـه غـاب = مااسب ذيب الخيل مار السعد زيـن****
تعيش ياعقاب(ن) ذعر خيل الاجناب = اهل الرمك من سطوتـه مستخفيـن****
ان جاء نهار(ن) فيه وقفات الاشناب = يوم(ن) به يثارون طلابـة الديـن****
سيفه بهامـات المناعيـر قصّـاب = عوق الخصيم اليا تعـدى القوانيـن****
يلكد على الصابور والجمع ماهـاب = اليا عثى فيهم عثـى فيهـم البيـن****
يلكد ملاكيد(ن) لبـا زيـد وذيـاب = ليث السبايا ماضي(ن) له براهيـن****
ان مد عقاب الخيل للسـرح جنّـاب = نامت عيون اهل الدبش مستريحين****
حنا تنام عيوننـا فـي ذرا عقـاب = واضدادنـا منـا يباتـون سهريـن****
ونلاحظ ان سعدون العواجي ماسب فهيد الفواري انما قال****
نجمه طلع وفهيد نجمه عنـه غـاب = مااسب ذيب الخيل مار السعد زيـن
والسلام عليكم ورحمة الله وبراكاته
| 
|
02-11-2016, 11:21 AM
العرض العادي
