راع الوفاء

[إبراهيم الصيخان]

راع الوفاء

للشاعر: ابراهيم علي الصيخان

الليل مسرى والمواقف تجاريب
............والشمس نوره مايقدي لعميان


والسيف حدبه مايجيله عذاريب
............والرمح نصله حامل الموت بسنان


الراي شور ٍ والتجارب تهاذيب
............والعقل حكمه والشدايد له اركان


للعين شوفه دون سمعك مقاضيب
............والقول دون الشوف ماهو بوكدان


الضن عصمه والبغي له محاريب
............والخوف واضح للفتى فيه حقران


النفس روض ٍ والكرم له مكاريب
............الطيب وبله والبخل فيه نقصان


الجود صهوه واللزز له معازيب
............بـالمد عــند الــعسر للرجل برهان


الحر طير ٍ للحباري مناديب
............ومندوب نفسه للجيف دوم غربان


القول دون الفعل ماله مهاريب
............والفعل دون الهرج عزه بنيشان


الطيب حصن ٍ والردى له تواليب
............لاجاد فيه الرجل عيبه لمنان


الوقت عسره والرخى له دواليب
............والبيت رفعه بالوطى فوق سيسان


الخيل ماهي للحرابه مهاذيب
............يوم الجحش لاطاب ركضه بخذلان


راع الوفاء بالكون زبن المحاديب
............ولا الردي حفاظ مال ٍ مع الظان


وصلاة ربي عد شمس ومغاريب
............على النبي الهاشمي خير من كان