سلام يا غيث المواطن والأوطان (حشر بن جهجاه العتيبي)

[المعتبر]

[poem=font="simplified arabic,5,black,normal,normal" bkcolor="transparent" bkimage="" border="none,4,coral" type=0 line=0 align=center use=ex num="0,black""]
بسم الله الرحمن الرحيم
سلام يا غيث المـواطن والأوطان=سلمان سلمان السعد والبطولة
محبوبنا الوافي سلايل كحيلان=اللي يعز الرأس فعله وقوله
راع الشكالة والبسالة والإحسان=والقول لا قاله يقول ويطوله
هو فيه أمير للعرب مثل سلمان=النادر اللي نادرات فعوله
والله يا أنا ما أشوف مثل أبو سلطان=في العالم الموجود عرضه وطوله
الله يخلي للعرب طير حوران=هو عون والله من تضده حموله
ملوكنا درع الوطن شأنهم شأن=كم واحد من كربته فرجوا له
وضع الجزيرة قبل يأتون وش كان=كان الجهل والشر له فيه صولة
فيه الظمأ والجوع الأزرق زويان=وإبليس فيه مسرجات خيوله
وفيه الفتن والخوف والناس عدوان=والخير فيه مقطعات سبوله
لين الله أنقذهم بذربين الأيمان=اللي لهم في الوقت صولة وجولة
العادلين مناصرة خير الأديان=اللي جمايلهم على كل دولة
في ظلهم صرنا بني عم وأخوان=وساد الأمن والخير سالت سيوله
وفي ظلهم مات و خزى كل شيطان=والشر ذب الريع يسحب ذيوله
وفي ظلهم علم وحضارة وعمران=والشعب طال بظلهم كل طولة
لكن بلانا الله بناقة عريمان=إما عدت وإلا تقول معقولة
ناس عن الإسلام والحق عميان=الفكر غادي والعقول مغسولة
والعلم ما معهم منه غير عنوان=والدين ضايع والقلوب معلولة
على الفساد يدفهم كل خوان=ثم جوك كل شايل له حمولة
واشتالوا الآثام من دون حسبان=والشر والإرهاب طبوا وحوله
هدوا بمعول هدمهم كل بنيان=ما ميزوا شارون وش قدموا له
لكن يوم العرض للحق ميزان=كل يبى يلقى نتايج فعولة
الفتنة العمياء تبي علم وسنان=قدام فتق ما ترقع خلوله
شر يروج بين ناعق وفتان=لكن عند أهل الزعامة حلوله
والحل بالدعوة وبالسيف شامان=من لا تراجع عن ضلاله يزوله
ومن تاب زال العفو كسبان كسبان=كم واحد ضل ورجع واسمحوا له
الحق واضح ياحديثين الأسنان=توبوا وخافوا ربكم وارجعوا له
قدامكم نار تلظى وديان=بيوم يشيب الرأس من عظم هوله
نبينا بين لنا الحق تبيان=ولا فيه قول عقب قوله نقوله
والعلم له منهل وللسفن ربان=بر الأمان بهن سهل وصوله
مشرع للي يبى الحق بيبان=ما أحد يرد مدوره عن دخوله
والعلم يرجع به لمثل ابن فوزان=وغيره وغيره من نوادر فحوله
والمفتي آل الشيخ وابن لحيدان=اللي على هدي السلف برهنوا له
واللي يشن الحرب زورٍ وبهتان=ما همنا حربه ودقة طبوله
مخالف منهج سليمين الإيمان=والخير والإصلاح ما هوب حوله
إن قال وإن ما قال خايب وخسران=وش عاد لو حثالته روجوا له
والليبي الحشاش حقده لنا بان=ولا هي غريبة منه يرسل خبوله
في كل عام مضوي ٍ كبر نجران=كم خزوةٍ يشتالها في حثوله
وتقليعته هذي لنا خير برهان=مغرض ومعطىً له عليها عمولة
مهسترٍ قلبه من الحقد مليان=الله يشيل النذل ما حال حوله
حنا بفضل الله على الحق وأعوان=نحكم بشرع الله وسنة رسوله
في ظل قادتنا مقاديم الأكوان=أهل العدالة كاملين الرجولة
ننعم بخير منه يكفينا الأمان=ومن لا يشوف يميز الوضع حوله
الله يخليهم لنا درع وأركان=وينصر بهم دينه ومن ناصروا له
ويعينهم على غرابيل الأزمان=والحق يرزقهم بفضله قبوله
ويجعل لهم في الآخرة حور وجنان=ويكرم منازلهم بفضله وحوله
حشر بن جهجاه العتيبي [/poem]