قصيده مدح وثناء . للشاعر رويفع بن دبسي

[غليص الشيباني]

( مدح وثناء )

سلام ياهداج ياخيره العرب
ياواحد(ن) عمت علينا جمايله

سلام سلم اسلام خالي من الكدر
لاتلحقه شكه ولافيه عايله

للي ضفر بالجاه والطيب والكرم
ماشال بين الناس قيل(ن) وقايله

نفر عزيز ومالك الروح بالغلا
وسط الحشا دايم مبيته مقايله

حنا ترى ناوين مسيار يمكم
والضيف يكرم ماتراعا فعايله

راي طرى للقلب مع طلعه الفجر
والقش فوق موصل القش شايله

جينا نريد الصلح والصلح مصلحه
يحميك من حرب يبوس(ن) بلايله

لاتزعلون الحال يبلا من الزعل
ترى الزعل ممنوع والله قايله

حنا نوينا الصح والصح غرنا
وصبنا الخطا ثم صار بالقول عايله

والعفو يرجا من كريمين مثلكم
وقت الزعل حلو النبا من خصايله

الله يجيب السيل والبرق والرعد
خمسين ليله ماتجهئ همايله

يوم رعد وبروق وصب من المطر
ويوم ودادين تدرج مسايله

والعشب جاي له ضحاح من الزهر
خطو الفياض يقال غطا نثايله

يصبح عليه الطل يسقيه للظهر
ريان من برق تقافا مخايله

حتى يطيب الكيف للضيف ويطمئن
ويسعد بشوف دلال مجلس قبايله

في ربعه تلقابها خيره الربع
عقب المطر بالظل والظل مايله

دارت سوالفهم على الطيب والنقا
في مجلس ماينتوصف مثايله

امسو وصوت صاحب البيت بالعشا
رجل(ن) كريم ونايله الطيب نايله

قامو وقايدهم على الخير قادهم
شيخ(ن) حكيم ولا يدور بدايله

هاذي حياة الناس في وقت قد مضا
ولا زمان اليوم فرق خلايله

تلقئ الرجل يرتاح في بعد ربعه
مشاكل الدنيا عليه متمايله

كلمة سفيه وجاهل(ن) تجرح الحشا
يبردبها راعي النمايم غلايله

قالو يقول فلان هاذي ومثلها
لو هو برئْ ماقالها قيل قايله

يصبر على الهجران والهم والغبن
والقلب يصلنه مصالي ملايله

والطيب بالتاكيد خير من الردا
لو هر رجع للعد ماحصا فضايله

يوم القيامه يسكن الطيب بالعلا
ويلقى بها راعي العمايل عمايله


وسلامتكم . للشاعر / رويفع بن دبسي الثِقِفِي