ألا يا نجد يا شينك بعد سلطان مع سلمان

[حصة العتيبية]

[poem=font="simplified arabic,7,orange,bold,normal" bkcolor="green" bkimage="" border="none,4,gray" type=2 line=1 align=center use=ex num="0,black""]
ألا يا ذا القمر وصل كلامي سيدي سلطان=وأمانه ثم أمانه معك طمنّي عن أحواله
وقلّه حصه تسلم عليك وتحلف الأيمان=لو إنه في يديها ما توانت جتك وصّاله
ولكن دونك بحور وصحاري وعندها شيبان=ولا تقدر تفارقهم ولو هو يوم بلحاله
لعل الله يدخلها سببهم في فسيح جنان=ليا طاشت صحاف الخلق وكل(ن) شاهد اعماله
فألا يا ابوي يا درعي عسى يفدونك الرديان=وش علومك ترى الأفكار من سافرت شغاله
وترى مشتاق لك شعبك ومشتاقه لك الأوطان=وكل(ن) يشتكي بِعدك ولا احد(ن) غبت عن باله
وترى ما عاد للدنيا طرى والكل لك ظميان=ويدعي لك ولي الكون لا ارخى الليل باسداله
وترى بِعدك جرح كل القلوب وهيج الاشجان=ودمع احداقنا لا مر طيفك يَرخْص اسباله
فمتى ترجع يابو خالد وابو الجوعى وابو اليتمان=ومتى ذاك القصر نسعد ليا جيته بمدهاله
ومتى طير الفرح يكفخ ليا من عدت بالجنحان=ويطربنا حداه وينسي المهموم غرباله
فالا يالله عسى ما جاك يكتب لك به الغفران=ويظلك سبته رب الملا بالحشر بظلاله
وألا يا نجد يا شينك وابو خالد معه سلمان=طوانا دونهم طول النيا يا شين سلاله
عيال العود هم ما غيرهم عدّالة الميزان=ليا من طفف اللي ما يخاف الله مكياله
حماة الدين للتوحيد من يوم (ا)طلعو صبيان=وهل العوجا ليا من العزاوي جا لها قاله
وسلاطين البلاد اللي زعامتهم لها برهان=ولا جتهم بحي الله كلام وعزف طباله
يشوشون ويهوشون ويحوشون اشرف النيشان=وليا جفت مشاريب الشجاعه فهم شلاله
هل الفزعات والجزعات والجزلات والسلطان=وهل الشيمات والعزمات والقامات والطاله
وهل الطاعات والرحمات والمدات والإحسان=وهل النخوات والسطوات قوّاله وفعّاله
فألا يالله رجعهم لنا وانته عظيم الشأن=بعاجل وقت قبل الصوم يعلن شوفة (ا)هلاله
كريم الوجه يا حنان يا ديان يا رحمن=سألتك لا تخيب من سألك وحقق آماله
وصلاة الله وتسليمه على المبعوث من عدنان=عدد من طاف بالبيت الحرام وحل ترحاله[/poem]