لم الحزن

[المعتبر]

[poem=font="simplified arabic,4,darkred,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
ألا يا عيوني لا تزيدين ضيقاتي =كفى ماجرى لي من عوادي ونكبات
تجرعت كاس المر والهم والعناء= ولا فاد في الأيام صبري وحيلاتي
تهد العواصف كل ما أبني وأنا الذي= صعيب يا أبو غزاي تحقيق غاياتي
مضى ليال جعلها ما تعود لي= تبات العرب وأنا ليا الصبح ما أبات
عيوني غدت للسهر مركز ومنتجع= وقلبي غدى للهم دار اجتماعات
علىالهون ياعيني عن السهر والبكاء= ترىالدمع يحيي عرق الأحزان لومات
هذا الدور وأنتي كل ليلة مروحة= لكن وش كسبتي غير سهري وضيقاتي
وأنا يوم أقوله ناصح لك وخايف= ويكفيك للعبرة من الدرس ما فات
وأنا مقتنع والوقت هذي طبيعته= ليا زان مرة ضيق الصدر مرات
أمور يقدرها الإله ونطيعه= وفي طاعة الله يسهلن الصعيبات
ولو إن في صدري هموم تلوبني= تعاقب على قلبي جماعات وأفوات
تثور علي أحزان ما لي بها عهد= وترسم على صفحة زماني معاناتي
هموم ليا قلت استقلت وغادرت= تجيني تدق طبولها بالمثارات
تكالب علي وكل باب تقفله= تضيق علي فجوج الأرض الوسيعات
خدعني سراب اللال يلمع ويطرد= وأنا ما حسبت حساب طول المسافات
وأنا كل ما أذكر غلطتي في البداية =تفجر على صدري براكين حسراتي
بنيت المباني فوق ساس من الهوى =ولا بانت إلا عقب شهرين غلطاتي
سكن ذاري النسناس لحظة وحاسني =وتهاوت على الأنقاض كل البناياتي
هذا الشوط الأول والله أعلم بما بقى =عسى الله يجيب الباقية بالسلامات
وأنا يعلم الله ما أتعدى ولا أعتدي =ويلقى كلامي من تتبع بصماتي
وأنا عبد ما زكيت نفسي على الله =وقلة خطاي من أكبر المستحيلات
وأنا أشوف كل له طريقة وسيرة =وأنا سيرتي تطبيق ديني وعاداتي
وأنا ما أتعامل مع هل الغي والجهل= ولا أسلك طريق ما يحقق طموحاتي
ولكن هذا شيء الله مقدره= عساه يتجاوز عن ذنوبي وزلاتي
ليا صرت لا حاسد ولاني بواشي= ولاني بقطاع لوصل القرابات
ولا قط غشيت العباد وظلمتهم =ولا قمت بالتفريق بين الجماعات
أعاشر هل الرأي المحنك وأحبهم= ولا أمشي مع اللي في طريقه شبوهات
وأصاحب هل الإخلاص والعلم والتقى= نظاف القلوب أهل الوفاء والمرواتي
وأحافظ على جزل المبادي وأصونها= ولا أفرح على ربعي عدوي وشماتي
ولاني بأجازي بالردى فاعل الردى =ولاأسير خطوة لين أحسب حساباتي
وأسامح وأقدر وأحتمل وأتجاهل =ولا أبحث عن اللي فات واللي يبى يأتي
أحدد هدف وأسلك له أفضل مسالكه= ولا أركض وراء الأوهام وأضيع أوقاتي
على منهج المختار أواصل مسيرتي =وعلى الطايلات أرخى الأعنة لهقواتي
وأمد النظر قدام وأفطن لما مضى =ولا أخاف غير الله عليم الخفيات
سلاحي رجاي بعفو ربي ورحمته= وزادي جميل الصبر عند الملمات
ولا أقول أنا الصايب وغيري على خطأ= متى ما عرفت الحق أغير قناعاتي
ولاأقول أنااللي ماأخطي الدرب والهدف =يا كم مرة زمن الأهداف رمياتي
ولا أرفع يديني غير للواحد الصمد =هو القادر اللي عالم كل نياتي
عليه اعتمادي في مراحي وجيتي= ومنه أستمد العون في سد حاجاتي
تتابع عليه كل ساعة فضايله= وله الحمد مني عد ما في السماوات
عسى النيم يصحي من منامه ويعتبر= ولا يبني الجايات مثل القديمات
يشيد مبانيه الجديدة على حجر =ويحسب حساب الصادرة والمغبات
وأصلي وأسلم عد ما ذعذع الهوى= على المصطفى بأزكى وأعز الصلوات[/poem]

حشر بن جهجاه العتيبي