ولا ينشري وسع الخواطر بالاموال

[نوف]

ماكل ما يطري على البال ينقال*
ولا كل من جاب الطواريق غناّ
ولا ينشري وسع الخواطر بالاموال*
كم واحدٍ من كثر ماله تعنّا
وكم من فقيرٍ جر بالصوت موال*
نجره على فقر الليالي يدنّا
البيت اجار ولا خزاين للاموال*
وصينيته لضيوف بيته تدنّا
رجلٍ على فعل الرجاجيل فعّال*
الى وقف في لازمه ما تثنّى
وان جا الجهل من ناس ماشين جهال*
جنب وقال الله لا يمتحنّا
وفالضيق يكفي عن ثمانين رجال*
الى اظلمت منّا وحدّوك منّا
وركضت تطرد بالخلا ضاحك اللال*
وامسيت كنّك بالصحاري مجنّا
وطاولك همٍ يبري الحال سلاّل*
يصير لك درع ٍحصين وتهنّا
هذاك جنسه يوم يطري على البال*
أدعي عساهم يكثرون بوطنّا
عيال واحفاد للأبطال وابطال*
كم سيروا من شامنا لا يمنّا
منهم طرالي واحدٍ ماله امثال*
لاضاق بالي صحت يابو مهنا
يفز لي حافي بلا شماغ واعقال*
ماكن بالدنيا حليه يكنّا
يابو مهنّا طافحٍ كل مكيال*
والناس قدمي كنها ازوال جنّا
مهيب حسّة عم والاّ خطا خال*
ولا بيعةٍ فيها الرجال تغبنّا
هي حاجةٍ تنقال في حال وبحال*
أقفل عليها قفل ابو تاج منّا
جتني وانا بين التردد والامهال*
ومدت لي السيف الشطير المحنّا
وقَدمت واخليت المنازل لنزّال*
ولقلامه اللي بالخفا عبرنّا
وحط الخطا منّي على كل الاحوال*
واهتز ماله بالضماير مبنّا
ولا زال باقٍ شي بالقلب لا زال*
مستامنه عندي بعد ما ومنّا


محمد النفيعي