حنـــــــــــا عتيبه,,,,,,,,نعم خضعنا روسنا وانحنينا

[ملكة الأحساس]

[align=center]

حنا ليامنا وعدنا وفينا
واليا عطينا نعرف الجود ونجود

ما نذبح البسمه ليا من حكينا
ولا نفرض الغلطة على البيض والسود

من طبعنا لا من عطينا عطينا
جود من الموجود والجود موجود

بعنا المذلة للضعيف وشرينا
عزة نفوس وجد واخلاص وعهود

نضرب خطانا بالعصا لاخطينا
حتى ولوكان الخطا غير مقصود

ومانزعل اصحاب الجمايل علينا
هذا وحنا نجزي الجود بالجود

يكبر غضبنا لاتعزوى حدينا
نرضيه لو نبذل على ارضاه مجهود

واليا انتخن المترفات اعتزينا
نفزع ولا نرضى على البنت منقود

نزعل ونغضب وان زعلنا نوينا
كن الهدب والعين نار وبارود

نرضى نموت ومدنا في يدينا
ولانعيش بمجد ضايع ومفقود

نعم خضعنا روسنا وانحنينا
لله ما غيره مع الناس معبود

مثل الغصون اليا انثننّ انثنينا
وقلوبنا خشاع ركاع وسجود

نتبع ونومن وبالرسل واقتدينا
بمحمد وعيسى وموسى وداود

خفنا من اسباب الضياع ان قرينا
باهل الجحيم وقصة اصحاب الاخدود

نمشي على كف التراب وروينا
من قلب مزن مرعد يرعد ارعود

يكفي فخرنا بأصلنا لا انتخينا
حنا عرب من واقع جدود لجدود

ماقد تعلمنا الخطا واعتدينا
ولا وقفو في صفنا شخص مضهود

الصبر فينا مبتلي وابتلينا
نصبر ولا نرجي من الوقت مردود

لو يشتكي منا التعب ماشكينا
ولا تخلفنا ولا نخلف وعود

حنا ليا منا وعدنا وفينا
واليا نوينا قد الافعال وقدود

غير القلوب الخاشعة مارجينا
والدمعه اللي تجرح اوجان وخدود

لا الكره قايدنا ولا الحقد فينا
ماحن من اللي يجزي الطيب بجحود

هذي عوايد طبعنا واكتفينا
الله خلقنا ازهود نفني له ازهود

اقولها والله وكيل علينا
بسم العلم لاصار عالي ومرصود

[/align]