هل تمنــع أختك من دخول النت؟؟

[محـمد]

هل تمنــع أختك من دخول النت؟؟




بسم الله الرحمن الرحيــــم


نحن الآن نعيش في عصر الشبكه العنكبوتيه فالجميع يحاول أن يلحق بهذه
الشبكه والتعرف عليها والاستفاده منها ولايقتصر ذلك على فئه دون أخرى
او على جنس دون الجنس الأخر فهي شبكه مفتوحه لجميع فئات المجتمع
صغار كانوا أم كبار شباب كانوا أم فتيات ولكن يكون الفرق في
طريقه التعامل مع هذه الشبكه العنكبوتيه..
هنالك من يعمل عليها ويربح حيث يخرج منها بفوائد يفيد بها نفسه وغيره
وهناك من يعمل عليها بما يضر بها نفسه ويجلب الاذى لغيره ....
وهناك من حرم دخول الفتاة إلى هذه الشبكه ويرى بانه لاحاجه لدخولها

انا عندي اصدقاء كثير يعارضون ويمانعون بل ويحرمون
استخدام اخواتهم لشبكة الانترنت ...

البعض يقول لمصلحتها؟؟ دون ابداء الاسباب ولا يريد اي نقاش ..
واخر يقول خوفا ومحافظة عليها.....
واخر يضع شروطا وضوابط لذلك...

فمن هنا اوجه له هذا السؤال لماذا تحرم ما احل الله ؟؟
وتحل ذلك لنفسك ومن تشاء وتحرمه على غيرك ؟؟
الكثيــــــر سوف يكون جوابه خوفا عليها من المخاطر هذه الشبكه ..
نعم نحن نتفق جميعا بوجود هذه المخاطر
ولا ننكرر وجوود الكثيـــر الكثير من الفوائد..
فيجب ان نعرف مفاسد ومساوئ الانترنت حتى نعرف خيارته وايجابياته..
فهذه المخاطر لا تقتصر على الفتاة فقط انت ايضاً معرض هذه المخاطر ...
فلا تكن ليناً فتعصر ولا تكن حجراً فتكسر ..


فمن هنــــــا حبيت ان اوضح رأي في هذه المســـاله..



النت عالم واسع ومفيد للي يعرف كيف يستغله صح
يعني النت فيه الزين وفيه الشين بس كل واحد وطريقه
تفكيره وطريقه استغلاله للنت تحدد هل اهو استغل النت
بالطريقه الصحيحه والا لا وهذا الكلام ينطبق على البنت والولد
وبالنسبه دخول البنت للمنتديات ابد ما فيها شي غلط
لان العورات محفوظه ...لاصوت ولاصوره كله كتابه
وما فيه شي خاص كل الكلام عام .... الكل يشوووفه
واذا كانوا اهل البنت عارفين عضويتها بالمنتدى
ويشوفون مشاركاتها وراضين عنها ... يعني انها ما تسوي شي غلط عادي
لانه المنتديات حلقات للتواصل والنقاش وكل اللي بالمنتديات اخوان
والعلاقه مابينهم مبنيه على الاحترام والتقدير
والاحترام ليس لشخصه بل لمستوى التفكير سواء كان رجل أو فتاة..
لاتتعدى العلاقه فيما بينهم هذا الحد..


الإنترنت علم الفتاة الكثيــر من الاشياء التي كانت تجهلها ولا تعلم عنها
وكتاباتها في المنتديات لاتعني أنها جريـــئة...
بالعكس العاقلة من كتبت المواضيع التي ترضي الله
ولاتخالف شريعة الاسلام وتعاليم دينها...
و المنتديات تفيد البنت اكثر من انها تفيد الولد
بحكم ان البنت مرزوعه بالبيت لا تدخل ولا تطلع
يعني تشوف الدنيا وتشوف الناس شلون عايشين تعرف كيف تتعامل معهم
من المنتديات تقدر تتعلم برامج مثل الفوتوشوب والفلاش
وتقدر تطور لغتك من المنتدى
ومن المنتديات تعرف كيف تتكلم مع الناس وتقدر توسع ثقافتك
من المنتديات تعرف كيف تكون محاور جيد ..
وتعرف كيف تطور اسلوبك بالكلام ..
صيحيح انها تقدر تتعلم هذي الاشياء من غير المنتديات
وتلقاها بأماكن كثيره بس بالمنتديات تتشجع وتلقى احد ينافسها ويتعلم معها
اقل شي اذا وحده ما تعرف تلبس والا ما عندها ذوق بالملابس والقصات
والمكياج يتحسن ذوقها وتصير فاهمه
(((يعني ما تصير ملابسها خلاجين وهراديس وشكلها قرويه )))

من حق الفتيات أن يعبروا عن ارائهم..يشاركوا بموضوعاتهم..
كما للشباب الحق في ذلك..
وإذا كانت الكتابة لهدف الرقي في الفكر والإستفادة ..
في الدنيا والدين..
فلا مانع منها... ولكن بشرط
أن تدخل باحترامها وتثبت وجودها من خلال شخصيتها
كمسلمه وتعطي طابعا ومثالاً للمرأه المسلمه..
كثير من الفتيات تكتب مالا يستطيع الشاب كتابته أو مجرد الرد عليه..
والنت ليـس شيطان النت مجرد وسيله اتصال لاستقبال معلومة
او ارسال معلومة فقط لاغير
إلا الناس الشاذيـن الي يستخدمونه في اشياء حرمها الله
والوعي والتربية الصالحة للأبناء يقيهم من العثرات والأشياء الي بالنت..





وبعدين انا عندي 3 اخوات الله يحفظهم لي
كلهم يدخلون الشبكه العنكبوتيه وعلى علمنا
والبنات مساكين والله وش يسووا لوماكتبوا بالمنتديات
وفيه منتديات رائعه اخواتي فيها
ممنوع صور مغنين وممثلين وممنوع اغاني وممنوع كلام فاضي بين الاعضاء
((((ممنوع هوااااش ومطاق )))) هذي منتديات جميله
يمكن البعض حكم على بعض المنتديات
انا الصراحه اشوف ان المنتدى مو اقلال من قيمة البنت بالعكس
فهي قيمتها محفوظه باخلاقها وبكرامتها بالمنتدى


وحبيت اوضح نقطــه بعد
ان الولد اذا بغى بنات يعرف وش لون يجيبهن..
وان البنت اذا بغت تجيب عيال تعرف وش لون تجيبهم..
يعني لوبنت تبي شئ..والله أعلم وشو..بتوصله..ولو كان في بلاد الصين ..
و اذا كانت تبي تخلي نفسها في مهاوي الرذيلة..
بتصير فيها وأن كانت بين يدي والديها..واخوانها ( اذا كان عندها اخوان غيورين )

النــت+ الجوال + الطلعات + التلفزيون..

كلهم مثل بعض سلاح ذو حدين ..
خير وشــر ..
البنت على قد نيتها ..
و بنت عن بنت تفرق وتربيه عن تربيه تفرق
البنت المحترمة نفسها .. ومتربية صح ..
واللي معطينها اهلها الثقه لايمكن أحد يأثر فيها..
حتى لو كان إبليس يزن على راسها ..
مع علمكم أن ابليس اكبر مراوغ ...
لكنها ماتقدر تخون ثقة اهلها فيها ..
لو كانت مقدرة هالثقة وعارفة قيمتها ..

واتمنى من كل بنت تتعوذ من ابليس قبل ما تدخل النت
واي مكان ثاني .. لأن ابليس شااااااطر....

و المواقع التى تزورها يعتمد ايضا
على تربيتها في المقام الاول وقناعة والديها والنت مثل اي وسيلة اتصال اخرى
وعلى حسب استخدامها ومفهومها لدى اي بنت ..
وهل البنت مثلا لا تشاهد التلفزيون الا بمحرم ؟
او لا تتصل بالهاتف الا لشخص اجنبي ؟..الخ

و بعدين كل مكان فيه خير وشر..
ياخوفي بكرى يجي ويقولون البنات لايروحون السوق لان فيه إختلاط
وتتكلم مع البائعين وممكن يقولون كلام حلو لهم
أتمنى نكون واقعين كل مكان فيه خير وشر
والحين صار كل مكان فيه اختلاط لكن
تبقى البنت العاقله عاقله والبنت الداشره داشررهـ



واذا كانت البنت تستخدم الإنترنت استخدام خاطيء
اللـــــه من فوووووووووووق يعاقبها عليه ...
مثل ما انت يا الرجل ستعاااااقب عليه
عمري ما سمعت أن الخطيئه مقصوره على المرأه
وليش غلط إنها تفتح الإنترنت ؟ ليش هي بسه ؟ حاكرينها في البيت ؟
والفتاه السيئة السمعه سيئه على روحها ..
بتضيع شرفها وكرامتها وكرامة أهلها ... وبتطيح من عين الجميع ...
لكن تبقى الفتاه العربيه صاحبة الأخلاق والأصل والشرف والعقل ....
الفتيات ما هم خادمات .. ولا مستويات واطيه ... بالعكس ربنا كرمهن ..



وانا اشوف انه مو تخلف الا تخلف وبقووه هذا الشخص اللي يمنع اخته من
دخول النت (يعذرني)ياإما انه جاهل في سوالف النت يعني مايعرف وشو معنى النت..
اللي يعرفه ان البنت عيب تجلس على النت طيب وش السبب ؟؟ بس كذا وخلاص
او انه من الاشخاص اللي يسؤون استخدام النت ويعتقد ان النت بس للمغازل
( وانا ماانكر هالشي في فئة يستخدمون النت لهذا الغرض )
هذا الشي اللي اثرعلى الاخوان وخلاهم يرفضون جلوس البنت على النت
خوفا عليهم بس مفروض انه يكون واثق من تربية اخته
مثل مايقول المثل اصابع ايدك مو سوا ...

فحرام يحرم اخته من دخول النت والاستفاده من بحر المعلومات اللي فيه
الأنترنت صار مهم ناس يدخلون عشان بحوث
وناس تدخل عشان تقديم على الجامعات وناس تدخل عشان المناقصات
وناس تدخل توصل أرائها للناس الي عجزت توصلها
حتى الحين الصغار فالابتدائي مدرسيهم يطلبون منهم بحوث او مواضيع
من النت يعني النت صار شي اساسي ..


واذا كنت تبغي تمنع انسان من عمل شي فانك لا تستطيع ذلك
الا عن طريق تقييــــد من حريته..
وهذا اصلا ياثر على شخصيته ونفسيته خاصة البنت

واخيرا ان استخدام البنت للنت يعتمد على اختلاف الاعمار
والبيئه المعاصره للبنت..
فالبنت تستطيع ان تضع حولها خطوط حمراء
هي الي تضع لنفسها حدود تمنع انه احد يتجاوزها
يعني الي يحترم نفسه غصب على الناس تحترمه
يعني امشي عدل يحتار عدوك فيك


اتمنى اشوف ردودكم لـــــــــــــكن...

ممنوع دخول المغاتير ويرجى إبراز العقل عند الباب

ونرجو لعواطفكم نوماً هنيئاً ...!

في الانتظـار ...!