ياللي تقول ان السفر لي وسيلة

[محمد مذكر المغيبي]

[poem=font="Simplified Arabic,6,black,normal,normal" bkcolor="transparent" bkimage="" border="none,8,black" type=0 line=1 align=center use=ex num="0,black"]
يااللي تقول ان السفر لي وسيله = منه اطلاع وفيه تنسى البهاذيل

ماني خويك روحتي ويش هي له = سافر عساها يالسنافي تساهيل

انا لياسجيت راعي طويله = في ديرتٍ تسوى هل الشام والنيل

دارٍ محبتها لروحي عديله = وكلٍ على داره يجر المواويل

شمالها البرقة وواد الثقيلة = وتحدها الفيضة من الغرب وكحيل

ديار ربعٍ يحتمون الدخيله = لطامة العايل وذباحة الحيل

اسمٍ عزيز وفخر من ينتمي له = ربعي متيهت البكار المباهيل

نمشي بها مانشتقي بالدليله = حنا دلايلها لياخرمس الليل

ونقضي بها كل الليال الجميله = سجة قدم فيها مزوح وتعاليل

مع دلةٍ فنجالها ينعني له = يازين صبه في جديد الفناجيل

ماكثر الوزنه ولاهي قليله = متفنن فيها مدير المعاميل

وسوالفٍ تشف الكبود العليله = مابه وجود لراعي القال والقيل

في مرتعٍ توه توقف مسيله = عليه من نو الثريا هماليل

والا ترى الدنيا متاع وهزيله = عزي لمنهو جالها بالمحابيل

كلٍ بها طرقي وعابر سبيله = ولاياخذ الا ماكتب من محاصيل

وصلات ربي عد وبل المخيلة = على نبياً فصل الحق تفصيل[/poem]