ناصر حفيد الشيوخ اهل الفعول الجسام :: اهل مكانه وشيخه عامراً بيتها

[محمد بن دغيم السميري]

[align=center]قصيده تشرفت بألقائها أمام حشدِ غفير من ضيوف قبيلة السمره في الاحتفال الكبير
الذي اقامه الشيخ/ناصر بن عمر بن زيد:
شيخ قبيلة السمره بمناسبة زواجه وافتتاح المشروع السكني بدغيبجه؛[/align]


[poem=font="Simplified Arabic,4,black,bold,normal" bkcolor="transparent" bkimage="backgrounds/27.gif" border="inset,6,darkred" type=0 line=0 align=center use=ex num="0,black"]
عداد ماغرّد القمري وناح الحمام=واعداد خلق الله الحيين مع ميتها
يامرحبا بالضيوف الغانمين الحشام=ترحيبةِ عن رجال الجود اعدّيتها
بأسم القبيله وبأسم الشيخ ناصرأشمام=في ماقفي والمواقف ماتناسيتها
موقف قبيله وحنّا للقبيله حزام=اللاّزمه مانجنب عن مواقيتها
ماقدّموني بني عمي لهذا المقام=ألاّ ثقه والثقه من ربعي أوليتها
جل احترامي وتقديري وكل اهتمام=ثقه عزيزه من الغالين واغليتها
وان مالفت انتباه منقدين العلام=تحرم عليّ البيوت ان عاد غنّيتها
ناديت على هجوسي بالهمام الهمام=واخترت جزل البيوت اللي تنقّيتها
فرصه ثمينه وانا جيت اغتنمها إغتنام=وضيوف ابن زيد ضيفاني وحييتها
ناصر حفيد الشيوخ اهل الفعول الجسام=اهل مكانه وشيخه عامراَ بيتها
اول ذوي زيد مسسّها على مايرام=منسف وسيف ومعرفه ساطعاّ ليتها
اللي بناها محمد واستلمها إستلام=عبّاس شيخ الجموع اللي علا صيتها
ثم إستلمها شيوخِ نظموها نظام=واليوم وصلت لناصر حسب توقيتها
وحنّا عضودك ياناصر في جميع المهام=ابشر بربعِ تعزّك وانت عزّيتها
واخوانك اهل الوفاء اللي جارهم مايضام=عندي تحيّة معزّه ولهم اهديتها
ذوي عمر وذوي عبّاس من دون اسام=لو تجهل اسماء شيوخ الشمل سمّيتها
الله يديم المعزّه بيننا والوئام=في مثل هالليله اللي كم تمنيتها
وليا مشت قافلة ربعي وصار التحام=شجّعت ربعي على العليا وماشيتها
صلاتي مع الجماعه والجماعه قيام=تكمل وتنقص لحالي كان صلّيتها
والصف واحد ونمشي كلنا للأمام=من ماضيات العصور ليا تقفّيتها
وإن سولفوا بالفعول وبالكرم والكرام=افعال ربعي تنومسني ليا اوحيتها
الاد سامر حمول الخيل يوم الزحام=ورى كبار الهقاوي لا تهقويتها
نطّاحة القوم وحماة الحلل والجهام=ذبّاحة الحيل لطّامة طواغيتها
اهل المهار الاصايل والقنا والحسام=قبيلةِ صعب اعبّر عن نعاتيتها
هشين للضيف وأمّا للاعادي كعام=امجادنا سجل التاريخ تثبيتها
امجاد وافعال لابالله ماهي كلام=لوهي مجرّد سوالف كان ماأطريتها
وان جيت ابا اعدّها ماأحصيتها بالتمام=تجفّ الاقلام لو عدّيت ماأحصيتها
من قبل عهد الإمام وبعد عهد الإمام=لويسمح الوقت بألتفصيل عدّيتها
وتركت عد الفعول ولاعليّه ملام=اللوم سبي الفعول ليا تحلويتها
واللوم في تبعة المقفي وطرد الحرام=والاّ حدود الإله ليا تعدّيتها
واللوم في تركة اللازم ليا جاء الزام=في ساعةِ ماتفيدك ليت ياليتها
واللوم غطّة فعول الغير دون إحترام=ليا حصل ماحصل فالنفس والغيتها
واللوم شقر العصى واللوم فالانهزام=والسبحه المبهمه لن كان هلّيتها
واللوم نقل العلوم اللي تسبب خصام=مجرم ليا جبتها وإن كان ودّيتها
إحذر من الزلّه اللي تحت جنح الظلام=إتشال وتزاد وتعمم ليا أبديتها
يفرح بها المبتلا ويحط فيها خطام=وانت السبب وانت للمسعور دنّيتها
يصبح يحرج عليها الخبل لو ماتسام=وانته تعاتب ضميرك كيف زلّيتها
وانا احذر من الزلل واخشى دروب الاثام=بعد التجارب من الايام قاسيتها
زلّة رفيقي مااسجلها بقلبي دوام=مانيب خسران شي ليا استزلّيتها
وان قمت ابا اعد بالقيراط والاّ الجرام=وقفت دون الحواجز ماتعدّيتها
اجمع ولا اطرح ويكبر دفتري كل عام=لين إمتلأ الصدر والصفحات عبّيتها
والمشكه فالبنادم رغبة الإنتقام=والاّ عروض العباد ليا استحلّيتها
لاتحسب اعراض خلق الله شراب وطعام=اللي تعشّيتها واللي تغدّيتها
هذا طعاماّ أثيم ومأدبه للأم=ابعد عن المرّ والصبره وحلتيتها
وابعد عن المعصيه واحرص على الإلتزام=في طاعة الله ومخطي كان خلّيتها
والعز جمع العرب والذل فالانقسام=والله قوي والخلائق لو تقاويتها
لاقوّه إلاّ برب الخلق منش الغمام=محي الخلائق وبأمره قادر أيميتها
واخير من كل ماقلنا صلاه وسلام=على النبي والمواقف ماتناسيتها[/poem]



[align=center]الشاعر/محمــد بـــن دغيّـــــم السميـــري[/align]