((حنا عتيبه))

[فالح الغنامي]

السلام عليكم ورحمة الله وبركاته

تواصلا مع الوجيه الطيبه في منتدى عتيبه اضع بين ايديكم هذه الابيات

المتواضعه ومهما كتبنا عن القبيله فلن نوفيها حقها .. دون قصور في

باقي القبائل فلكلٍ من الطيب نصيب:)

[poem=font="Simplified Arabic,5,crimson,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
ليت النوايا تستوي ونفوسنا القشرا تعود=ليت القلوب السود تصبغ بالبياض الوانها
ليت البلايا اللي مضت تمشي بها عين الحسود=ياليتها ترجع على الحسّاد صوب اعيانها
ياصحابنا اللي باعدت مابيننا بعض السدود=ليت القضيّه تنتهي بكره ويقضي شانها
حنّا عيال اليوم والسّاهي يكفّيه السجود=واللي يبا يقرا الحقيقه يقتفي برهانها
حنّا عتيبه ياولد وجدودنا نعم الجدود=قوم الشجاعه والكرم يصهل صهيل حصانها
قومٍ لهم طيبٍ على طيبٍ وجودٍ فوق جود=من دون ضيف الله حشا ماقفّلت بيبانها
حنّا هل الطالات يوم الكايده نرقى سنود=حنّا مزبنت الكسيره نحتمي ورعانها
حنّا هل الفزعه ليامنّه بغى الظالم يسود=حيّ العتيبي لافزع فزعه يكيل اوزانها
حنّا وحنّا وان بغيت الصدق حنّا عيال عود=اسّس لنا دولة شجاعه ماتطيح اركانها
حنّا على ذبح الفريسه ماتخاشرنا الفهود=حنّا صقور الصيد تصعد للسما جنحانها
يفرح بفزعتنا عقيد القوم خانوه الجنود=ماترتخي راية ورايتنا تغير وزانها
يشهد لنا تاريخنا يوم الردي ماله شهود=يشهد لنا سيف الشجاع اللي علومه عانها
يشهد لنا تاريخنا يوم الّليال البيض سود=يوم القبايل تعتزي بالمعركه فرسانها
نجد العذيّه مالقت من خان فالهيلا عهود=اصغرهم اللي ماكذب واكبرهم اللي صانها
ماخانها ابن حميد واقف يحتميها في صمود=يوم استلم نجد العذيّه مايفك عنانها
مسلط وعسكر والعطاوي وان بغيت اذكر حشود=فرسان يوم المعركه يلعب بها شيطانها
ومن تحت راية دولته عبد العزيز آل السعود=سارت عتيبه في صفوف الحق مع فتيانها
سارت ولافيها ضعيف النفس مافيها شرود=بيض الوجيه اللي نطق بالحق عظم لسانها
بيض السيوف اصواتها غطّى على صوت الرعود=سود الرماح تصيب كبد الخاينه بأسنانها[/poem]


وسلآمتكم واعذرونا على القصور:)