قصيدة الشاعر محمد الرويس في مدح الأمير سلمان

[آمال الرواد]

أعزائي مرتادي المنتدى / إليكم قصيدة الشاعر محمد بن خلف الرويس في مدح الأمير سلمان بن عبد العزيز بمناسبة مرور خمسين عاماً على توليه أمارة الرياض :

عز الرياض وعز وادي حنيفه ـــــــــ وعز الأمارة والأمور العظايم

عدل الحكم سلمان بالعز ريفه ـــــــ خمسين عام كل أبوها غنايم

تبصر بعدله عين حي كفيفه ـــــــ المجد له والطيب والعز دايم

وتقصر بحكمه كل يمنىً عنيفه ـــــــ عن بطشها سلمان عوق الخصايم

المنهج القرآن والشرع سيفه ـــــــ وسلمان عدله يرتكي للظلايم

وتنصر بعزه كل رملاً ضعيفه ـــــــ ذاقت من أسباب الحياة الهضايم

كفه لدمعات اليتامى وليفه ـــــــ ياما مسح دمع للأوجان رايم

وليا جمد دم العروق الصخيفه ـــــــ وطير المنايا في سما الحبس حايم

جاه الذي ياخذ من السيف ضيفه ـــــــ ويعتق رقابٍ راهنتها غرايم

من عقب ماهي للسيوف الرهيفة ـــــــ من فضل أخو نورة كستها عمايم

بالجاه فاديها فدتها الكليفة ـــــــ وبالمال شاريها ولا هوب سايم

خمسين عام والأيادي عفيفة ـــــــ لكن على المحتاج مثل الغمايم

خمسين عام وخدمة الشعب كيفه ـــــــ ماقيل ما داوم ولا قيل نايم

وطويق يدري ما على نجد خيفه ـــــــ وأبو فهد في ماكر العز قايم

يرسي كما ترسي الجبال المنيفة ـــــــ ويرقى على متن القمر والنعايم