نهاره أقشر من تحدا الشيابين

[سيف العطاوي]

[align=center]قصيده مدح في ناصر غازي الشيباني وفي الشيابين عامةً مبتدأً بوصف الجمس للشاعر الكبير سعود ابن رحيم العطـــــاوي[/align]


[poem=font="Arial,5,black,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
قم ياعلي لاهنت ياذخر الأجواد = في لازمٍ ماينتأجل لبعدين
عندك سويش اللي مزهب للأبعاد = قم لاعدمتك شغل الجمس هالحين
جمسٍ ملحف عن نظر كل حساد = ماودنا بإذن الله تصيبه العين
حديث في صنعه بتاريخ ميلاد = موديل جمسي من موديلات الألفين
ماجا على حظي بتسديد الأقصاد = ولا شريته بالمعاريض والدين
بالكاش جبته خاضع لي ومنقاد = ماينقصه ياكود سجه وتمرين
اليا ارتهج صوته كما صوت رعاد = رعادٍ تردد صداه الضلاعين
ولاّ كما طبل الحرايب إليا ناد = يشدا لقرع الطبل صوت الشكامين
يفز فزة من صحا عقب مرقاد = من بعد ما ولاّ من الليل ثلثين
تذكر الغندور مجلي الأنجاد = وقام يتقلب لين سمع المواذين
إليا نطحته وصف هرشٍ بلا قياد = مجهم مهوب من الجمال الملاوين
طويل جنب أرثم خشم فج الأعضاد = أبو البكار الغالية بالمثامين
وليا تبعته لامشا الخط من غاد = تقول ذيبٍ محتدينه هل الضين
ذيبٍ على راع الغنم هم و أنكاد = فدعبهم وامسو بفعله محازين
ياطا السهل والنفد ويويق الأطواد = ومع جرهدي القار يطوى الأراضين
إليا انحدر يزداد وإليا رقا زاد = تقول في جنوبه مركّب جناحين
مامهجه بين الدير كل كداد = ولا الذي فيده حبوبٍ وهروين
يزهنه إللي مثل تيجان الاسياد = خمس الجميحيات زين على زين
ورفارفه حجان مركوز الانهاد = غروٍ جماله فاق كل المزايين
وفيه المكيف والمسجل مع الراد = وفي بطنه استبنه للأسفار تأمين
ماله حلايا فالمواتر ولابلاد = أنا اشهد إن مصنعينه شياطين
نصه لقرمٍ ياعلي ماله أنداد = زيزوم حزات اللقا فالميادين
صميدعٍ صنديد ذرنوح مقداد = يهوي على خصمه سوات الشياهين
هذاك ابن غازي على الجود وراد = للجود في وجهه رموز وعناوين
من لابةٍ تعرف على روس الأشهاد = أذكارهم عند الموالي والأقصين
فالسلم واحدهم عن الطيب ماحاد = تلقى الشحم عند النشاما الكريمين
وفالحرب للأخصام عثره وميعاد = نهاره أقشر من تحدا الشيابين
ألاد مشيب لاحتما الهوش بعناد = على العدا جسرين مافيهم دوين
يردون حاض الموت زافات وأفراد = عقّيلهم وقت الحرايب مجانين
كم قرمٍ مجرب بعد فعلهم هاد = وكم من كتيبه ذوقوها الأمرّين
وكم علقوا وسمٍ على أرقاب الأذواد = هلال ثم مطرق ومطرق على يمين
أبديت ماحل القريحه من أوكاد = ماقلتها مضاهاه ولاّ بتخمين
فعلٍ مؤرخ من على عصر الاجداد = بروس الرجال وفي سطور الدواوين
ومن بعد هذا ياعلي قرم الاولاد = بادر بنشدة مامضاله سبوعين
عسى الفرج منقاد والله وماراد = ماكاتبه ربي يبا يصير ويبين
دنياً تبدل ماعرفنالها أبعاد = وبعض البشر معها علينا معاوين
راحت يا ابو مشعل مواعيد وجهاد = من التخرج عام سته وعشرين
وحنا على ماقيل سرداد مرداد = نقبل ونقفي كل يومٍ بتقنين
والرِجل ما والله تهنت بمقعاد = ويصلا الضماير مثل حر الكوانين
ولونها يا ناصر بضرب الأياد = أنا من اللي يرجحون الموازين
والله وأنا ابن روق لجعلهم أشراد = مثل القطا لاشاف فالجو شاهين
بفعلٍ يغث أكباد ويداوي أكباد = حتى إنهم يمشون حسب القوانين
والله يديم اللي عمروها بالأمجاد = ترثت معزي للقياده سلاطين
سادو على كل المناطق والابداد = وخلو جميع الناس فيها متساوين
لين البهايم من مراحين الأوهاد = قامت توايق فوق مبدا السراحين[/poem]

[align=center]ملاحظه : القصيده منقوله

تقبلوا تحياتي,,,[/align]