عتابه ياعصابة راسي ... هذي من هيله

[التركي]

[align=center]يافهيد شب النار مع باحـة الشـوف
ترى حلات الكيف مـع فكـة الريـق
عان الحطب في ثنوة الدعب مجعوف
والما من القلتـه قـراح المذاويـق
أخذ الكريك وحـط للنـار مجـروف
نـار عليهـا يجلسـون المطاليـق
خل الخشب في ترعة النار مصفـوف
وادفق عليه القاز من فـوق تدفيـق
ولا جا لشعلتها تواشـي وعاصـوف
حط البريـق وفـرق النـار تفريـق
ومن ماركة بغداد قم هات لي نـوف
عفراً تنافـس بالبيـاض الغرانيـق
عفراً طويلة جيد والوسـط ملهـوف
مكبوسة الغطوه على حلقها الضيـق
طويلة العرقـوب والخشـم معكـوف
جبـرة حديـده والجوانـب لواهيـق
من البكار العفر تاخذ لهـا وصـوف
وتاخذ وصوف ملهفـات السماحيـق
تاخذ لهـا منهـن مثنـاه وكتـوف
لوكان محرقها سنـا النـار تحريـق
والثانيه رسـلان والشكـل معـروف
والثالثـه رسـلان والرابـع بريـق
واحمس لنا بـنٍ شرينـاه بجـزوف
جابـه يمانـيِ عيونـه بلاحـيـق
من شجرته من يم خـولان مقطـوف
مـن وارد الخـولان مافيـه تبريـق
خابرك انا يا فهيد فالشغل شاحـوف
وموفق فـي حمسـة البـن توفيـق
لا تنطل المحماس يا فهيد فالجـوف
اخاف يلحقهـا سنـا النـار بلحيـق
للنار جوف وجال وجنوب وطـروف
وللحمس يفهق صالي الجمر تفهيـق
حفها على سمرِ شديد اللهب حـوف
حتى تعرق من سنـا النـار تعريـق
ولا اندار لون الحب ثم صار مشيوف
جاللنجاض ابهـا صفـار وتراميـق
قم صبهـا بمبـردٍ عـود وسعـوف
مقمـرٍ عـوده يجـي لـه تباريـق
ثم هات لي نجر كما الطير مكتـوف
وقفـة نـداويٍ يـتـل المسابـيـق
اطول من الرسلان يوم انها وقـوف
ليا ناشها المهوى يجي له تصاعيـق
ولقم وبهر واودع الهيـل مدغـوف
ومن العويـدي ذوق الهيـل تذويـق
حتى يجي الفنجال لا صار محيـوف
دم الغـزال اللـي يجـي فالمعاليـق
والا الخضاب اللي على كف غطروف
نجلاً تخـازر بالعيـون العشاشيـق
يجمدعلى الشـارب لياصارمشفـوف
وصف الخوير إن صارفالوصف تدقيق
بريةٍ تبعـد صلـف كـل مصلـوف
تجلا العمس ماهيب شاهي سواويـق
ليا ذرف منهـا علـى الكبـد ذاروف
يبي يهـود شـارد الفكـر ويريـق
هات الشداد وعطني الجاعد الصـوف
فراش اهل هجـنٍ تبـوج الرقاريـق
تراي انـا والهـم لايـف ومليـوف
وهجسي من البارح يجي له تخافيـق
وليا عزف هجس الغنا كل معـزوف
تنفـك بيبـان القصيـد المغالـيـق
جني بنات الفكـر زافـات وصفـوف
وقمت اتخير فـي قـراح الطواريـق
للشعر مثل الصيد قطعان وخشـوف
الصيـد طعمـه والنـوادر توافيـق
نبا نخلي عاصـي البيـت معسـوف
ثم راحت القيفـان عقبـه مواسيـق
وليا اعتدل هجسٍ له ايـام معكـوف
يمـة طريـق معلقـات العشاريـق
ياصاح انا قلبي من الـود مشعـوف
حب البنـات ملصـقٍ فيـه تلصيـق
شاعيه مجمولٍ ولـي فيـه معـروف
وموثقٍ لي معـه بعـض المواثيـق
غيدا النوابي عمرهـا متـن وردوف
زملوق غصنٍٍ من طـوال الزماليـق
ليا بينت خـدٍ كمـا بـارق قنـوف
رخم السحاب اللي خشومه مدانيـق
وعينٍ هدبها لا شبـح كنـه سيـوف
عين اشقر مربـاه روس الشواهيـق
تنسف فليل غاطن ٍالمتـن منسـوف
على مثل غرمول عـرق الصعافيـق
مـرودمٍ بالحـال ماهيـب حرجـوف
ولا شافها راع الهوا جالـه شهيـق
ملهوفة السرجوف والجسم غظـروف
والمفرع اللي فيه للشمـس تشريـق
صدرٍ تقول من ابيض القطن منـدوف
طلـع النهـود مفتـقٍ فيـه تفتيـق
ياما عليك الاحـي الـورق واسـوف
ورق علـى دوحٍ غصونـه مواريـق
أمـر بيتـك واتـعـداك واطــوف
وانا على شوفك شفـوق المشافيـق
ادرا علـى سمعتـك واذل واخـوف
من اهل الهروج مكثريـن النقانيـق
كم واحدٍ لوكـان ماهـوب مكلـوف
يطقهـا لـو جنبـت عنـه بلحيـق
ترى التعب في راحة النفس مخلـوف
شوف العيون يزود النفـس تشويـق
هذا ويا من له نحـا البـال ملفـوف
شوفك يسليني عن الهـم والضيـق
ليتك تصافحنـي بذرعـان وكفـوف
والا علـي تدنـق الوجـه تدنـيـقٍ [/align]