شبل يشيل القاصره عن خويه

[التركي]

[align=center]يالله يالمطلوب جزل العطيه
ياذ الجلال أرجوك وانت الرحومي
يارب لا تجعل حياتي شقيه
واستر عيوبي يوم تقضف هدومي
تجري بنا الايام صبح وعشيه
والعمر ينقص والليالي تدومي
متعة غرور وكل نفس عريه
ولابد من يوم(ن) للأنفس يسومي
لكن مادام النفس توجد وحيه
لها بعال المجد شف ولزومي
وانا افعل الاسباب مع كل نيه
وارجي عسى حظي بجاهه يقومي
ومقعد هوان النفس يحرم عليه
لو فرشوا لي زل تركي ورومي
ماني غبي والنفس ماهي رديه
وشلون اعيش بخوف مثل الرخومي
والخوف ماعمره يرد المنيه
والعزم ماينقص من العمر يومي
وموتي بدار من ونسها خليه
أحير من جنه بها الذل دومي
وان خاب ضني بالربوع الدنيه
مالي على اقصى الناس حق ولزومي
ومن لايحط المرجله له نحيه
هذاك من لذ الحياة محرومي
والمرجله ماهي بدرب خفيه
ولاهي خراص ولا مجالس علومي
المرجله سنداء صعيبه قويه
تبي لها حلحيل جزل جزومي
حلحيل حيال محنك دهيه
وقلبه على درب المخافه عزومي
شبل يشيل القاصره عن خويه
واللي ببيته لو يزل محشومي
ولا يعترض قاله بليا دعيه
وليا وقف بالدرب سد الثلومي
والنيه النيه تراها مطيه
بالنيه الحسنه تسير وتقومي
وهذي وهايب من جزيل العطيه
ماهي نهابه يدين القرومي
واشره على الطيب ويشره عليه
والطيب عند العارفه له يمومي
ولكن على شفه عيونه شقيه
ويبين طلع الطير قبله يحومي [/align] [align=center]خليف بن ضلعان السليمي[/align]