قصيدة جديدة للشاعر / فيصل السواط

[تركي السواط]

السلام عليكم ورحمة الله وبركاته
جبت لكم قصيدة جديدة لفيصل السواط بعنوان :

(روضة التفاح)
وقفت بساحة العشق القديم وروضة التفاح

أدوّر لي على تفاحةٍ مـن عام مسروقه

يبشـّرني بها ريح المطر والبارق اللي لاح

واقول الله يجيبك يا سحابٍ لاحت بْروقه

بعَد ما قفـّلـَت باب الهـوى بالقفل والمفتاح

ظروفٍ ما عطت قلب المواليف ابسط حقوقه

يا عيني ما على درب المحبه واحدٍ مرتاح

هنيّ اللي سكاكين الغلا ما مَرّت عْروقه

وانا ما بين تخدير الجروح ومشـْرط الجرّاح

أنازع سكـْرة الفرقا عشان عيون مخلوقه

عطتني في فضاها الفين كيلو واربعين جْناح

وقالت ما عليك مْن الزمن والوقت وسْبُوقه

تحرّر واطلق عْنان المحبّه واترك اللي راح

وانا والله لـ اعِيضك من دفا صدْري ومعلوقه

وعز الله قِدَح مَرْوَ الحنايا واشعَل المصباح

وصار النور يرْمي نور من تحْته ومن فوقه

تولـّت بنت ابوها خافقي واثـْر الهـوى سفـّاح

تناوَشني على من تنثر الخفـّاق وتـْحُوقه

تعلـّق في سنابلـْها الثرى والفاس والفلاح

وصارت قرْبة حروف القصايد غصْب مشقوقه

يا طيبك يازمانٍ كان ما بين النجوم وطاح

على راس الأماني واصبحَت فالنفس محروقه

ولا ادري ليه ضاقت وانهَكت يمناي والمسباح

رفيقة حلمي اللي كان واجمل بنت معشوقه

تحدّثني عن اشواق الثرى للما حديث ارواح

تعَاتبني وانا اسمع كلمةٍ ماهيب منطوقه

يا ليت ادري وش اللي صابها في قلبها وارتاح

تعَبت وصارت عْظام النشايد مالها طـُوقه

عليّه بالحرام اني عشقتك والقلوب صْحاح

ولا زالت مكانتـْك بْفيَاض الروح مرموقه

تعالي يا غلا العشق القديم وروضة التفاح

ما عاد ابغا سوى تفاحةٍ من عام مسروقه