العــيــار اللـــي مــا يصيب يدوش

[الشهراني]

[poem=font="Simplified Arabic,5,blue,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]

الا يـا ساكبيـن البـن لاهنتـوا توصوبـي=ترى له خرمة لا عومست بالراس مافاقـي
ذهاب عماس راسي فوح ريح البن مسكوبي=يروق و ينتشي بـه كـل كيّيـف وذواقـي
وانا مرسولي اللي يقضى اللازم ومندوبـي=على بنات فكرٍ مـا تهـاوي كـل عشاقـي
مزاجٍ لاتعدّل سـار فـي تحقيـق مطلوبـي=يعليني على حد الفضـا واشـوف الافاقـي
ولامنه جمعنـا شـوق محبـوب لمحبوبـي=غدا من بيني وبين المعاني همس وعناقـي
ما اكلفها تبادلني الغرام و تلتفـت صوبـي=تجيني طايعه (مشتاقـة تسعـى لمشتاقـي)
وانا ما اقول جتني بالذراع وقـوة اسلوبـي=ولكن موهبه من خالقـي وهـاب الارزاقـي
عساني لا لقيته في نهـار تكشـف عيوبـي=وتحصى ما جنت كل الجوارح جـل ودقاقـي
يجازيني بتنفيس الكـروب ويغفـر ذنوبـي=ويكتب لي عن النار ولهبها عفـو واعتاقـي
تعبت من الظروف اللي تنوخ كل منجوبـي=اشيل الحمل لوكان الحمل ماهـوب ينطاقـي
اقاوم و الزمن يدحم بجنـب حـزّ بجنوبـي=توانى العزم من صكاته ويبسـن الارياقـي
عسى الله لايبيح اهل الضغاين ويش سووبي=عيار سلاحهم لو ما يصيب يشيّـن اخلاقـي
ولاجيت انتحي عن منهجي واخالف دروبـي=وانـزل بيـرق قـد كـان ولازال خفـاقـي
ذكرت ان الحميا زلتـي والطيـب عذروبـي=وقررت انطح امواج البحر واغوص الاعماقي
مادام اني بعين اخوان شمّـا ظافـي ثوبـي=تنزّلني عدالة حكمهم فـي المنـزل الراقـي
فانا ما همني لـو قـل تقديـري وماجوبـي=بعين اللي عصاهم مسبحه والفـرد علاقـي
عشاشيق الظلام اللي توالف كـل عرقوبـي=على درب العلوم الهينـه تحـدا وتنساقـي
مانيب اغتّر لاما شفـت عدوانـي تغنوبـي=اذوق السم كنّي ما عرفته ....والله الواقـي
يموت الحرّ شامخ والقدر ماضي ومكتوبـي=يصيبه لو جعل بينه وبينه ستـر ورواقـي
ولا يغني الجزع مادام كاس الموت مشروبي=على قول ابن ثايب (نرحل ووجه الله الباقي)
[/poem]
الشاعر/ عبدالله ابن معجب الشهراني