الزمن دوار

[ساري]

[poem=font="Simplified Arabic,6,white,bold,normal" bkcolor="transparent" bkimage="backgrounds/21.gif" border="none,4,gray" type=0 line=0 align=center use=ex num="0,black"]
عسى الله ينجيني من المدفـع اللـي ثـار=بعيد المدى اللـي كـل الأهـداف يعطبهـا
يخـوف ويرعـب كـل ماثـار ياستـار=يهـد المبـانـي والـرواسـي يشطبـهـا
حديث المديـل اللـي علـى كهربـا وزار=عسـى الله يعيـن القـوة اللـي يحاربهـا
رماني وجاني من سهومه مطـر وغبـار=ولغـات المدافـع بالصواريـخ أخاطبهـا
ألا ياهـلا يامرحبـا والكبـار صـغـار=وتـرى النـاس تهديـد العـدا مايهيبهـا
عزمنا على عسـف النظـا نسـع الأزوار=وجزمنا على مس الكتـب فـي غواربهـا
وكربنا الأشدة فوقهن في حقـب وخصـار=ونسفنـا مواركهـا وشلـنـا مزاهبـهـا
ونوينـا علـى رد النقـا للعميـل جهـار=على شـان صعبـات المواقـف يجربهـا
تـدور المعـارك والجنايـز لهـا قبـار=لهـا مـن يكفنهـا ويركـز نصايبـهـا
حصل ماحصل والمبتدي ماعليـه حيـار=وترى اللـي تقـدم لحيتـه عنـد شاربهـا
وترا الشك ودى له رياجيـل يـم شهـار=تربـع بليـس بروسهـم ليـن خربـهـا
مع الدرب الأيمن رح وخل الشكوك يسـار=تراهـا بعيـدة عنـك وأنـتـه تقربـهـا
عطيناك بشـتٍ ماتخالـف بهـا الأنظـار=نقينا المشالـح ليـن جبنـا لـك أطيبهـا
وقبلت الهدية ثم مدري وش اللـي صـار=لقينـاك يـوم تصلـي العـيـد قالبـهـا
وأنا ياعلـي مانـي مـراوغ ولا غـدار=أقـدر خويـي والمحابيـل مـا أنصبهـا
وأجنب عن الشينـة ونفسـي لهـا مقـدار=مع الطيب تمشـي والـردا مـا يناسبهـا
وأنا ماني اللـي يعتـرض سكـة المـرار=أنا لي طريـق وباقـي الطـرق أجنبهـا
أخل العرب وأسرارها ما أبحث الأسـرار=أجنـب ولالـي فـي خطاهـا وصايبهـا
أعرف أن لو أنه يطـق الحجـار حجـار=تقـوم السبـاع إلهـا سبـاعٍ تجاوبـهـا
وتصير القضية مسألة بحـث واستفسـار=وعلـى راس منشيهـا تعـود عواقبـهـا
وتراك انت راع الرمية اللي بـدون عيـار=طريقـة خطـا مـدري عليـه مصوبهـا
تبجح وتنظـر لـي بتصغيـر واستهتـار=كبيرة عليك ولا أعـرف ويـش واجبهـا
وتقول أنك انت الشاعر الماهـر البيطـار=جميـع المثايـل مفـردٍ فـي غرايبـهـا
وأنا خابر انك لك بضايـع مـع التجـار=على كل سـوقٍ يشـري الزيـن تجلبهـا
وبالأسهـم تساهـم بالجنيهـات والـدولار=مع أرقى البنوك اللي تضاعـف مكاسبهـا
وترى كل ديرة غيـر ديـرة بهـا خبـار=أهـل معرفـة بسباعهـا مـن ثعالبـهـا
وترى كل ديرة غير ديـرة بهـا صقـار=يعرف الصقور الرقش ويعـرف أ رانبهـا
وأنا يوم سويت القصيـدة خبـر وانـذار=وأنا ما أحسب انـك تشتبـه فـي مآربهـا
وتعبت وتعبنا والنتيجة ما غيـر أصفـار=والأصفار بالأصفـار وشلـون نضربهـا
وأنا مسهمي ماهو بناقـص مـع الشعـار=أروض صعيبـات المثـايـل وأرتبـهـا
وأسوق القوافي لين تمشـي مـع المعبـار=كما سـوق هجـنٍ حنـوة العـود تدبهـا
على درب شيـخٍ كـل يـومٍ يصبـح دار=يسـج النشيـط مـن النظـا ليـن يتعبهـا
وأجيب البيوت المفـردة وأتـرك التكـرار=نقيـض الفـوا رغ بنـدقـي ماتزهبـهـا
وأطب الفياض المخضرة واقطف النـوار=اقـص الزهـور الناعمـة مـن ذوايبهـا
واطب المـزارع واتنقـى مـن الأثمـار=أنقـي نبـات اثمارهـا مـن شوايبـهـا
وأغوص البحور اللي بها الحص والمحـار=وأخلـص عميلـي دينتـه قبـل يطلبهـا
وأعرف البضايع واعرف السوق والأسعار=واثمـن واقـدر سلعتـي قبـل أطببـهـا
وترى اللي سواك نشيمه شيمـة الخطـار=وفـاء والنفـوس الطيبـة ليـه نغضبهـا
لاكنا على اللـي فيـه زودة لغانـا حـار=مشاهـيـب سـنـاء ويــل نجذبـهـا
تواهج توهج شقر الأسيـاخ وسـط النـار=لـوانـا نمثنيـهـا صـفـاتٍ تذوبـهـا
وترى الشعر فتل ونقض ماهو بخبط أشجار=وترى الفرق بعقـول الرجـال ومواهبهـا
وترى الحكمة البلغة وبـاق الكـلام بخـار=يمـر الحلـوق الناشفـة مـا يرطبـهـا
والايـام والدنيـا تـرى مالهـا استقـرار=علـى نجومهـا تطلـع نجـومٍ تغيبـهـا
الأيـام تخفـي غيبـهـا والـزمـن دوار=بطش بالملـوك وحالهـا عـن مناصبهـا
على عروشها مثل النوادر علـى الأوكـار=وتصـف العساكـر بالطريـق لمواكبهـا
تلاشوا مثل نبتٍ بروض وطـاه عصـار=عواصـف ريـاحٍ طيـرت بـه هبايبهـا
نواعم غصونه طار فيهـا الهـوى التيـار=وبقايـا عروقـة جـارح السيـل سالبهـا
تعيش الأوادم بالأمـل والعمـار قصـار=وراهـا محاسـب والله اللـي يحاسبـهـا
رجانـا وملجانـا هـو الواحـد القـهـار=ولـي العبـاد اللـي يحـقـق مطالبـهـا
وقرينا الكتاب اللي نزل لأولـي الأبصـار=بشيـر ونذيـر ولابـه آيــه نكذبـهـا
قرينـاه بالغنـة والأخفـا وبالأظـهـار=وبالإدغـام واللـي بالحركـات نعربـهـا
وتبعنا طريق اللي كسـر شكوكـة الكفـار=ونقيـم الصـلاة الواجبـة مـع رواتبهـا
وتركت المجال لصاحبي لجـل مايحتـار=تقصـرت ولـى لـو تقصيـت أشيبـهـا
وأنا خابر انه صقـر ماياكـل االاسـوار=وطعام الصقور الجارحـة مـن مخالبهـا
وتقبـل تحياتـي وهـذا اخـر المشـوار=قصيـدة جديـدة بـأزرق الحبـر كاتبهـا
قصيدة تشـره مابهـا شجـب واستنكـار=نظيفـه عفيفـة مابـهـا مــا يعيبـهـا
علـى مبتداهـا رايـةٍ للسـلام شـعـار=وعلـى منتهاهـا العـود الأزرق يطيبهـا
وصلاة الله الباري علـى سيـد الأبـرار=شفيـع الخلايـق يـوم تكشـف حقايبهـا
نبيٍ أوحي لـه بالرسالـة وهـو بالغـار=بها خصـه الله مـن عبـاده وفـاز ابهـا[/poem]