شمال ضلع النير والدرب مدهال

[سود العيون]

قصيدة للشاعر الكبير حزام بن غدري بن راجح الغبيوي العتيبي



[frame="9 80"]ياراكـب اللـي شلّتـه تقطـع الـلال
موصّل ٍ من سـر جيـش ابـن ثانـي

سبق الظليـم إن شافلـه ريغـة أزوال
لا شاف شـوف ٍ وكّـده مـع بيانـي

ركابـه اللـي كامـل العقـل رجـال
اللـي ليـا أرسلتـه بـدرب ٍ شفانـي

من خوف زعوقة ٍ تجي فيـه وجفـال
جـوّد شـداده بالحـقـب والبطـانـي

حبل الرسن حـذرى تمـدّه بالاهمـال
وإنق العصـا مـن ليّـن الخيرزانـي

وحقق بمسراحك على سرحـة المـال
وعلّـق عليـه خفيّـفـات الأوانــي

من القطين اللـي علـى العـد نـزّال
فوق القليـب اللـي شمـال المحانـي

وليـا طـرى عليـك يالقـرم مقيـال
مدسـوس ولا هــس لأم إشبهـانـي

وعن العماس إكسر من الكيف فنجـال
وليّـن شـوي ولاتصـيـر متـوانـي

وروّح ليا ماشافت ضل العشـي مـال
وخل الدواعـر فـي الذريـع اليمانـي

والـدرب مايخفـاك ياطيّـب الـفـال
ياطـا عفيـف اللـي عليـه الخوانـي

شمال ضلـع النيـر والـدرب مدهـال
وناحـر لسـوق مرجّحيـن الوزانـي

ديرة هـل العوجـا قديميـن الافعـال
أهـل الريـاض منـوّرات المبـانـي

وليا دخلـت السـوق نشّـد فـالأزوال
لراعي غرض وانشـد عنـه جدّعانـي

عن بيت ابو ياسـر منـا كـل هشّـال
عـدّه لبيتـه قـدم حــادي وثـانـي

وتلقـى مظـال ٍ فيـه شيبـان وعيـال
وسلّم علـى ربعـي طـوال اليمانـي

سلّم على اللي تحتمـي كـل مشـوال
ليـا رفّعـت بيـن الفخـوذ العوانـي

وقلّه تراي بخيـر ياكـود فـي حـال
ودّيبكـم والبـعـد عنـكـم حـدانـي

وأنتـم عشقتـوا نجـد مافيـه عـذّال
وأنـا قعـدت بـداري اللـي ربانـي

مربـاي والمربـى يقـولـون قـتّـال
كيـف إنـكـره وأبـدلـه ماجفـانـي

سلّـم علـى مقحـم وقلّـه ليـا قـال
مرسلني الشايب وجيـت إلـك عانـي

وارسل معـي هديّـة ٍ مالهـا أمثـال
نصيحـة ً ياجاهـل ٍ فـي المعـانـي

الاولـه خمـس الفرايـض بالاكمـال
حج وزكاه وصـوم شهـر رمضانـي

العبـد لـو أبطـى رحيلـك فالأقبـال
اسمـع تـرى الله ماتـركّ إنسيـانـي

العمـر ماعـود ٍ بغـايـل وغــوال
الباقـي الخـلاّق والخـلـق فـانـي

ولابـد تقفانـا مـوازيـن الاعـمـال
ماتفعـلـه تـلـقـاه يالمـودمـانـي

ترى المراجـل ماتفيـد مـع الأهمـال
ياللـي تبـي مـال ٍ بغيـر إحفظانـي

مال الغنى في بيـت الإهمـال مدخـال
والمرجـلـه يضمّـهـا المرجـلانـي

فيها اجتهد وإلها علـى الـرب حـلاّل
واعنـز علـى الله والله المستعـانـي

ماتكمـل أنـواع الرجالـه بـلا مـال
لـو إن مـال البخـل حولـك مكانـي

والطيـب مالـه فـي المبيعـات دلاّل
حتـى يبيـع فـلان عـلـى فـلانـي

والطيب ماأحد ٍ ياخـذه غيـر بأفعـال
ليا ماقـدرت العشـره أخـذ الثمانـي

وخلّـك لـزلاّت القرابـات حـمّـال
لو شفت في بعض الامـور امتحانـي

اصبر وشل شيل الجمل مثـل ماشـال
لاتـقـرن الـعـقّـال فالسيفـهـانـي

وأهـل الطواغـف لاتلقيهـم الـبـال
وبـان الرفيـق اللـي تشوفـه يبانـي

الجـار لايزعلـك ورعـه ليـا مـال
وليـا هرجلـك فيـه صـك الاذانـي

الجـار زال إنّـه مـع الجـار نـزّال
لـه حـق مايهفيـه غيـر الهـدانـي

وحذراك من صحبة هل الضحك الأنذال
ضحكـة قليـل المـد حلـو اللسانـي

ليا إحتجت وأنت مخيّـل ٍ فيـه بخيـال
أمـرج ليـا إنّـك تلعـب الديدحانـي

يـازيـن بـريّـه وخافـيـه بـطـال
حـلـو ٍ نـبـاه ونيـتـه قلّـبـانـي

علي يابعده ليـا أصبحـت فـي حـال
ومنـي قريّـب حـزّة إنّــه يبـانـي

ولا تستمع في قـول مكثـرة الاقـوال
من نم لـك نـم إبـك مامنـه أمانـي

ومجالـس النمّـأم ومجالـس الضـال
يرخيك مـن عـال الـدّرج للطمانـي

لاتجلـس الا كـود فالمجلـس العـال
مجلـس فهـود ٍ ماتجيـه الحصانـي

إسمع وصـاة مجـرّب ٍ كـل ماقـال
وأنذرك عنـه مجربـه قـد ضوانـي[/frame]