ماعاد لي نفس اتجمل مع الناس

[نفر كويس]

قد توبوني جاحدين المعاريف
ماعاد لي نفس اتجمل مع الناس..

مادام فعلي بأول العام ماشيف
ليه اقطع دروبن توردني الياس..

كلفت نفسي رغم صعب التكاليف
وارويت غيري يوم الارياق يباس..

فتح الصدور اشبه بفتح المظاريف
يبان فرق الناس عن باقي الناس..

لو انها بضرب السيوف المراهيف
ياكم راس عقب ماهيب ينداس..

ويبان شئ كان في وضع تزييف
لكن على الله ياعديمين الاحساس..

يالمقبلين ليا امتلن المغاريف
يالمدبرين ليا اصبح الوضع حساس..

يالشاكرين ليا غدا مرتعي ريف
يالناكرين ليا غدت عشري اسداس..

العمر مره والمكاسب تخاطيف
ومن لاسهر للمجد ماسره نعاس..

مير اركدوا ياقريبين المحاريف
لين احسم الموضوع واقدح من الراس..

قريتكم ساعة فتحت المظاريف
وبين لي القصدير منكم والألماس..

وعرفت ليه الطيب والفعل ماشيف؟؟
لأنه غدا مع ناس ماهم من الناس..



م ن