أرقصي مع نبض قلبي والقصيد

[مامثلي أحد]

-







أرقصي مع نبض قلبي والقصيد .. وداعبي بحر الشعر قبل الرقاد .. لاجلها و لعيونها
صغت الجديد .. و الحروف استسلمت بعد العناد .. أول شيء أهدي هالأبيات لأختي
حصة اللي ماهنا أطلدز منها بخواتي ..لو تدرون وش كثير أحبها حصيص ماتلوموني
يوم كل رد والثاني لازم أطريها و أكثر من ذكرها << خابرها بتقرا حتسيه

حصيص غمصي عيونتس بأحتسي هالسالفة لأني أحس بتسه منها وودي أنبه
و أحذر من بوادر المصائب اللي بتحل بمجتمعنا إلا أن ربي سلم ولطف .. مالكم بالطويلة :

أختي حصة قررت الالتحاق بأحد النوادي النسائية الرياضية تقول أنها بتزين الجسم
عشان رجلها مايعرس عليها .. هالحين هالحريم من يوم تفتح عينها على الدنيا وهي
تهتم بشكلها و وزنها و طولها و كلها عشان الرجل شغلها الشاغل الرجال يالله أن
لا تشغلنا إلا بطاعتك
عاد أختي حصة البطالة والفضاوة والدب في النعمة أجتمعت عندها و خلتها بصوب
والرشاقة بصوب ثاني .. ماخلينا جهاز رياضي بالرياض مارزيناه عندها .. لا سير نفع ..
ولا مشي نفع ومن هنا أتت فكرة الالتحاق بالنادي ..
المهم تزهلقت و شرت الترنق و الكنادر و سجلت بأحد النوادي بشارع العليا ..
عقبها البنت أبطت علي مهوب العادة .. دائما لا زينت حلى جديد زهمت علي عشان
أتقوى عندها و أتذوق حلاها الجديد مهوب لله .. عشان أرفّع بها و أطيرها بالعجة
و أمدحها عند خواتي << شغلته الترفيع

المهم قلت أنقز عندها و أشوف البنت وش جرى في عقلها وراها نست أخوها اللي
مامثله أحد و أنا اللي طمر لسعد الدين و أشيل ذاك التشيز كيك اللي
يحبه قلوبكم و أميّل على بيت حصيص ..
أنا : ألو حصيص يابعد حياني
حصة : هلا وغلا ياحبة عيني
أنا : ضبطي الدلة بسير عليكم
حصة : حياك ياحيي .. أرحب أرحب
وصلت بيت حصة ولقيتها بالحوش تهزع و تصفق ترحيبا بي وبمقدمي الميمون المهم
و أحط حلاي مع الكابتشينو اللي تضبطه حصيص و أقوم أسولف عليها والبنت ماهيب
حولي .. ماخليت علم ولا سالفة في الشمال و الجنوب والمنطقة الوسطى والغربية
ولا تهون الشرقيه ماسردتها لها وهي ولاهيب حولي ..
- حصيص !
- هاه ( تقول فازة من كابوس )
- علامتس و أنا أخوتس ؟ وراتس مانتيب فـ الفورمة ؟
- لا و لاشيء ..
- علميني .. هو أبو جبهة عريضة اللي كبر جبهة فوزية الدريع قايل لتس
شيء علميني و الله أن أدفنه بذا الحوش وابن امه يسنع له خبر ..
- لا ياحيي .. ابن حلال ولاهوب يخالف ومهب يقولي شيء ..
- طيب حصيص .. عينتي لي بنيات مزيونات بذا النادي اللي سجلتي بوه
- هاااه ( وهي اللي تفز ذيك الفزه تقول مقروصة )
- بسم الله عليتس ؟ وش فيتس و أنا أخوتس ؟
والله مدري وش أقولك و أنا أختك .. رحت لم ذاك النادي و أنا أسجل عضويتي عندهم
قالوا لي تبين كورسات رقص ؟ قلت وش هو رقصه ؟ قالو الرقص يزين الجسم و يساعد
ع التخلص من الاسترس والضغوطات و ماهنا أطلدز منه .. المهم قلت لهم بألقي
نظرة عليهم أن جاز لي سجلت بوه .. قالو ا: تعالي .. و أنا اللي أروح صالة الرقص
وليتن مادخلته .. عالم مفاصيخ و رقص شرقي و غربي سالسا وهيب هوب وموسيقى
صاخبه ومدربات مهب مسلمات حتى بوقت الأذان و الصلاة مستمرات بالرقص والموسيقى العالية !!
و بنات المسلمين مندمجات ولا حولهن غاريه على دين .. ولا حياء من الله .. و الله و أنا
واقفه أتمقلهن أن تسني برا السعودية مهب بـ الرياض !!

^


قضى حتسي حصيص والسؤال اللي يتربع هنا :
مثل تلك الأماكن من اللي منحهم التصريح لإقامتها على أرض التوحيد والرسالة ؟
ولماذا تقع تحت مسمى نوادي رياضية للياقة والتخسيس وفي الخفاء صالات رقص
على أيدي كافرات ضاربات بضوابط الدين وأعراف و تقاليد وركائز البلد عرض الحائط ؟


الأمر جداً جلل يا أخوة ..
ويفضي لكثير من الكوارث والمفاسد مالله بها عليم ..
اللهم هل بلغت , اللهم فاشهد ..



* على عجل






-