( الجفا علّة الأحباب )

[محمد العريــدي]

/

\

نص بعد الغياب :


[poem=font="simplified arabic,4,black,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black""]
الآ واجودي وجد عود ٍ بعد ما شاب = حداه الزمان و باح للناس مكنونه
بعد قل شوفه .. و ارثعوبه هل الأطباب = تراكى عقب ساقه على ساق حاجونه
عياله بعد كبروا .. و راحوا بدون اسباب = ولا منهم اللي ينشد العود وشلونه
خذوا ما معه كله و خلوه دون حساب = و قعد يحتري موعد معاشه على شونه
ليا ساقته رجله و عدابها المرقاب = تذكر زمان ٍ فات و اخلف له ظنونه
تذكر عجوزه يوم ساوى القبر بتراب = بكى لين صار القبر طينه من عيونه
في بيت ٍ تهاوى ما بقى له ربع و اصحاب = يا كود الغلا اللي باقي ٍ في آخر ركونه
وجودي وجوده دام لي خاطر ٍ ما طاب = عقب واحد ٍ حال الزمن دوني و دونه
عليه الخفوق اللي ليا مر ذكره ذاب = ليا اطروه ما ودي حرام ٍ يطرونه
تجدد غيابه و الجفا علّة الأحباب = و ما اشين من المظنون لا غاب مظنونه
تضيق الرياض بكبرها , لا ذكرته غاب = و ادنق على الجوال , و ابحث بمخزونه
و لا جاب لي غير الشقا , و حرقة الأعصاب = ليا من زهمت , و قال مقفل تليفونه
اعوّد على اللي يرسله , لو انا منصاب = و اغني بيوته , لو ماهيب موزونه
و انا بيني و بينه مواري غلا و اعجاب = يصون العهود و حالف ٍ حلف ما اخونه
احبه و انا ادري بالغلا , مثل سم الداب = ليا من تفشّى .. ما نفع لو يردونه
لو ان داخلي شرهه على صاحبي و عتاب = لكن المولع في الهوى لا تلومونه
انا اشهد شهادة حق , و اقولها لا غاب = ليا اطروه ما ودي حرام ٍ يطرونه[/poem]