عبدالله بن عمر شيخ المناعير :: والله ونعم بعزوةٍ تعتزيها

[محمد بن دغيم السميري]

[frame="9 80"]
[poem=font="simplified arabic,5,black,bold,normal" bkcolor="transparent" bkimage="" border="double,10,blue" type=0 line=0 align=center use=ex num="0,black""]
قالوا تمنّا مثل باق الشواعير=ويشنهي اغلى حاجةٍ تمتنيها
قلت المنا واجد وياوارد البير=انا اتمنّا الطيبه واشتهيها
واغلى المُنا طاعة ولي المقادير=قبل الممات وساعةٍ نحتريها
في ساعةٍ تبطل جميع المعاذير=ماتنفع الاعذار ياصانعيها
الساعه اللي مابعدها أيّ تدبير=ولابعدها حاجةٍ نرتجيها
إلاّ العفو والصفح عن كل تقصير=ودي بها والرب يقدر عليها
هاذي تعوّض عن جميع المخاسير=المنوه اللي كل مسلم يبيها
اخير من جمع الذهب والدنانير=اللي حساب الآخره مقتفيها
يكفي من الدنيا ولو خبزة شعير=مدام احصل حاجتي واقتضيها
اقزر ايامي بـ هالكون تقزير=والنفس عن درب العصاه احتديها
وشلون بالله تفرح النفس يامنير=وانا ادري ان الموت لازم يجيها
ماعندنا عن ساعة الموت تقرير=حتى قبل ميعادها نحتسيها
الروح زهره والزهر كله يصير=الى الفنا واجسامنا تكتسيها
اكفان ولحودٍ بليا فنانير=ارضٍ خلقنا الله منها وفيها
نمسي ونصبح مايجينا مسايير=غربة دهر واحبابنا مانجيها
لكن قبل الموت ابا انصحك ياعمير=نصيحةٍ لك خاطري مهتويها
بينك وبين الله لاتقطع السير=واحذر نوايا السوء لاتنتويها
وعساك ماتحتد مثلي على الغير=وتعيش بأحسن حالةٍ ترتضيها
ولاتعرض مثلنا للأعاصير=اذكر علومٍ خاطري مانسيها
يوم الفقر والفقر نقمه وتعزير=وحكايته مدري منين ابتديها
مرارته فيها للأحرار تدمير=فرقاه بالموت الحمر نشتريها
تعصف بي الذكرى وبعض التفاكير=مرّه سوات الصبر ياشاربيها
ليا طرت لي تطرد النوم ويطير=دنياً على الله ياعمر اشتكيها
ماودي اسبب لخاطرك تعكير=خل الكوايا فيّ لاتكتويها
وانته بخير وخالك بخير وامير=اوصيك لازم طاعته وامش فيها
عبدالله بن عمر شيخ المناعير=والله ونعم بعزوةٍ تعتزيها
ليا نخيته ماتعذر بتبرير=حاجتك لوهي كايده يحتميها
يعرف حقوق الله ويرسي كما النير=والطيبه بأغلى الثمن يشتريها
الله ينوّر قبر ابا الشيخ تنوير=واعلى الجنان برحمته يرتقيها
وياعمر لاتسمع لنفاخة الكير=اللي عطوبي سكةٍ ماأنتسيها
ولاصحيت الا على خير ياطير=طبّاخ فاس ٍ خيّبت طابخيها
اهل العلوم مزيّنين الدواكير=اخواننا بالزور تبت يديها
الخوّه اللي مالها ايّات تفسير=منها الضرر والخير يحرم عليها
مسخهم الخالق قرود وخنازير=مجموعة الاوفل ومن يتليها
حديثهم كله ظلايم وتزوير=اقوالهم نفس الابي تزدريها
لعل موتاهم بحفرة زمهرير=واحياهم الله بالمحن يبتليها
صدقتهم وانا على نيّة الخير=والنيّه اللي تنحرف ماأقتنيها
انوي نوايا اهل الوجيه المسافير=واثر إعملاي اهدافهم مغتشيها
جورٍ يفجر صم الاحجار تفجير=يهدم جبال طويق واللي يليها
لأهدافهم ماكان عندي معايير=واقدار ربي مستحيل اتّقيها
يمررون اسوأ المقاصيد تمرير=ولها بروتوكول لمعمّميها
ولها خبير إخراج فني وتصوير=ومعالجاتٍ من قبل مخرجيها
مسبوقةٍ بأعلان عند الجماهير=اللي توامى روسها وتحكيها
ولها وكالاتٍ نشيطه وتصدير=وطيور شلوى من جهل يشتويها
لولا الحكومه قطّعونا الجزازير=الله يعز المملكه ويحميها
في ظل حكام البلاد المشاهير=ملوكنا اللي بالدماء نفتديها
آل السعود منزحين الطوابير=صفوة ملوك ٍ ربنا مصطفيها
[/poem]

عذراً على الإطاله

[/frame]