سجل حضورك اليومي ببيت شعر أو حكمه ..

[قلم ولكن]

يامحلا بأرض(ن) خلا شبة النار=في خبة(ن)عقب المطر مستسيله
وتجهيز كيف(ن) للنشامى والاخيار=كيف الرجال اهل الكرم والفضيله
قم يانديبي واشعم النار بوجار=شعلة سناها تلتهب في المسيله
سمر(ن) ليامن شب توهجر توهجار=لون الذهب في ايدين زين الجديله
وقلّط دلال الكيف مع بن وبهار=ونجر(ن) ليا من دنّ يطرب عويله
ومحماس بنه قربه والجمر حار=وخلك بحمس البن دايم دليله
مابين ني وحرق خله بمقدار=واحذر يجي في حمسة البن ميله
ولازان لونه وعج اشقر للانظار=دقه بنجر(ن) من سمعله يجيله
ثم قلط الرسلان من كف بيطار=واعبر لماها عبرة(ن) تستويله
وخله يفوح البن امرار وامرار=وليا اقطعت قرّب بهاره وهيله
هيل الحبش مع زعفران(ن)ومسمار=له ريحة(ن) تبري الخشوم العليله
زله عليها كفيت من كل الاخطار=وليا خذت فوحين هات الجميله
ودنّ القدوع وهات حلوات الاثمار=خلاص الحسا مافيه غيره بديله
وادرج هل الطالات وافين الاشبار=قوم(ن) على جال المناره ثقيله
فنجال صين(ن) صبته دوم بعيار=مايمتلي الفنجال ولاهي قليله
صبّه كفيت العوق ياطير غيمار=يوم ان ولد اللاش مافيه حيله
ثم ادرجه يمين والكل حضار =بعد الكبير اللي له الشيب زيله
وسوالف الشجعان تحكى وتندار=سوالف(ن) ماهي بحش وفشيله