( عيــد الخرفان )

[وضووح]

السلام عليكم ورحمة الله وبركاته
موضوع عجبني وحبيت انقله لكم

بننتقل للضفه الثانيه من عيد الأضحى
كل المواضيع ماقصرو وجابو فضل الصيام وفضل ايام عشر ذو الحجه
والتكبير وطريقة الحج , ماشاءالله الكل ماقصر
بس بنشطح بكم شوي للجهه الثانيه من عيد الأضحى
جهة الخرفان وجهة الكبده وجهة الزيارات والعادات وجهة المواقف اللي تصير
كم واحد قطع اصبعه الساطور وكم واحد هج منه خروف



عاد اجواء العيد سبحان الله تفرق من عائله لعائله
هذولا ناس يجتمعون عند جدهم
وذولا ناس يذبحون بالمقصب
وذولا ناس يجيبون لهم خروف واحد ويطقطون عليه على خفيف
بس الأجواء بشكل عام حلوه , خصوصا اجواء الجمعا من بعد صلاة العيد

وطبعا سوالف العيد تتمركز حول كم نقطه الا وهي
كم ذبحتو ؟
فلان ذبح معكم ؟
فلانه وش لابسه يوم تجيكم <<
متى خلصتو ذابح ؟
وكل عائله عاد او شخص يجيك ويسرد
اول واحد يقولك ماجت 9 الا وحنا خالصين
والثاني يقول تأخر علينا اخوي وماخلصنا الا الظهر
والثالث يقول والله قلنا بهن كلهن ويعد لك اياهن وطبعا اكيد بينهن وصايا لأحد اجداده
وطبعا فيه نقطه مهمه
ثق ثقه تامه ان غداك وعشاك لمدة شهر قدام لايخلو من اللحم بجميع اشكاله وجميع انواع الكبسات باللحم وملحقات الخروف



وهذي عادات اغلب الناس
يمكن يختلف بجزئيات بسيطه
مثل هذولا يجتمعون بمزرعه
وذولا يجتمعون باستراحه
وذولا يسافرون للديره عند اهلهم
وطريقة الأجتماع
بس بشكل عام هو عيد جميل عيد فيه حركه
له طعم الذبح والشغل بالبيت وله اجواء جميله
صح تعب
بس والله فيه ضحك فيه هبال فيه جمعه
صح انه على حساب هالمسيكين الخروف
بس يظل حدث سنوي دااائم منتظر
ومهما جربو الناس المطابخ او المقاصب
غير جو البيت بهالأجواء وجو الجمعه واللمه والهواش اللي يصير ماااافيه





الموضوع بقصصكم واحداثكم وخرفانكم بين ايدكم فا لاا تبخلون علينا بمشاركاتكم
وكل عام وانتم بخير

سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ