والكلمه اللي مالها حد مقياس !!!

[عزيزة الجناب]

الخط مايمسك والإرسال محتـاس = والرمز ضاع وكلمة الحق قلها

والطيبة لاجات ترفع على الراس = ولا الـــرديه ردهــا يم أهلها

وحذراك لاتصــدر قــرارات للناس = والــنـاس ميز علمها من جهلها

والكــلـمـه اللــي مالها حد مقياس = قـــدام تنــطقهــا تمعن خللها

مـاني بظالم والعرب عندي أجناس = والناس أجازيها بساير عملها

والعمله اللي تدفعك صوب الإفلاس = كسـبـان لو تحرق بواقي هللها

أحيان تمشي دون وأحـيـان لابــاس = وأحيان تشكي من زوايد عللها

وأحيان لاذعذع من الغرب نـسناس = أقول ليت البدو تربط جملها

ياكــــم بـنيـتـوا بنيتٍ مالها ســاس = بأرضٍ جفاف وغيركم مانزلها

أخــذ الكــلام بطقـــةٍ توجع الراس = واللــي يدورها بصبره قبلها

وياللــي تجيب الزاد للسم دســاس = والــطيبــة دور عليها ونلها

وسلعتك ماهي من مثامين الألماس = ولانته بلاقي في حياتك بدلها

وختـامهــا ياللي تحــبــون الأوناس = الناس قد خالط رضاها زعلها

والـــكلمه اللي مالها حد مقياس = جوزوا وشوفوا ياقرابه بدلها

اعجبتني ونقلتها لكم