يالايمتني

[فـهـد العتيبي]

يا لايمتني ما هقيتك ظلومه
ولاني من الي يرفض الحكم لو صح

انا مواطن وانتِ اعدل حكومه
قولي وش التهمه ولو كان تفضح

وماراح اعارض تهمتك بالملومه
لو قيل نطح اللوم باللوم ينجح

من هو بنهجي ما تهيب خصومه
ما مثَّل الا الطيب في كل مسرحْ

ولو تعرفين الحب فهم لعلومه
ما قلتي الا كنَّك ابن الملوح

ما يردع اشواقي من العقل لومه
لو غلطتي من قيمة الروح تطرح

تدرين لو هالعشق تقبل سلومه
انك تسوم الروح كان يتوضح

للنفس عاشقها صحيح وترومه
وكان الفهد يا بنت بالسعر صرح

عندي فغرامك سوم واغليت سُومه
وادري انك الفذه صراحه والانصح

قلت فـغرامك هاكي الروح سَومه
والسوم لا من صار بالروح مربح

تدرين ضيقي كيف انهي همومه
ارسمك لوحه وانفتن فيك واسرحْ

وتدرين من هو يحسد الناس قومه
من بيض الرايات فاليوم الاملح

وتدرين ليه احيا بنفس رحومه
لاني حكيمٍ واعرف اختار الاصلح

ولاني مغامر كان ما هي محسومه
ولان المطيع لحاكمه فاز وافلح

والختم لك هذي بمسك مختومه
من قلب نافس لك وبالحب ينضح

دوم اجرحيني دام صرتي حكومه
من يمنعك دام الولا لك ترجح


فهد العتيبي

__________________