الاقربون اولى بالمعروف

[راعي الوفاء]

لقيت بعض الناس طيب للاجناب =
وربعه بوقت الضيق مايمدحونه
ينفق على القاصي بلا من وحساب=
يبي إليا جت سيرته يمدحونه
وربعه مغطيهم من الهم جلباب =
الفقر يعرفهم وهم يعرفونه
ماجربوا لذة حسانيه الاقراب=
ولا اثنى عليه الي تراكم ديونه
وام اليتامى واليتامى والانساب=
جميعهم بالخير مايذكرونه
هم بالحقيقة مالهم عنه مجناب=
لكن عز انفوسهم حال دونه
إن صار فيه مناسبه عندهم غاب=
ويشره يبيهم لاعزمهم يجونه
وان جوه من دافع وفاء وصل الاقراب=
ام كشر وإلا عطاهم امتونه
النوع هذا ودعه بقضب الباب=
واستقبله بمقدمات المهونه
عليك بـ الي طيبهم نال الاعجاب=
راسين في ميل الزمان وسكونه
على الطبيعة بالكرم والترحاب=
والدين والماعون مايمنعونه
معودين انفوسهم حسن الاداب=
ومعودين عيالهم للخشونه
والطيب جسرٍ تصعده فوق بعتاب=
فوقه من احفاد النشامى نمونه
يهومه الهلاس من بين الاصحاب=
واليا نوى تدخل عظامه اصخونه
وإلا الردى نزله رخامة بسرداب=
ضيق وعشاق الفشل يدخلونه
فيه الحسود يحد ضرسه والانياب=
ويدرج على خيرات غيره عيونه
وفيه البخيل وفيه ظالم وكذاب=
ومدلعٍ مشغول في بنطلونه
ابوه مايحسب من اصحاب الالباب=
ماعلمه بالدرب وامه حنونه
والشعر لو امشي بدعواه جذاب=
اسبح محيطاته وغني الحونه
لكن عندي بيت والقاف ماشاب=
ختمت به والشعر واجد فنونه
الصمت في وقته مريح للاعصاب=
لكن تراه بغير وقته مهونه

للشاعر : فهد بن هجاج البشري